Mark Zuckerberg: మెటాలో భారీ ఉద్యోగాల కోతలు.. ఇక లేఆఫ్లు ఉండకపోవచ్చన్న జుకర్బర్గ్
ఈ వార్తాకథనం ఏంటి
కృత్రిమ మేధ సాంకేతికతను వేగంగా వినియోగంలోకి తెస్తున్న ప్రపంచవ్యాప్తంగా ఉన్న టెక్ సంస్థలు పెద్దఎత్తున ఉద్యోగాల కోతలు చేపడుతున్నాయి. ఈ క్రమంలో ఫేస్బుక్కు మాతృసంస్థైన మెటా కూడా తన ఉద్యోగుల్లో సుమారు 10 శాతం మందిని తొలగించే ప్రక్రియను ఇప్పటికే ప్రారంభించింది. ఈ ఏడాదిలో మరిన్ని ఉద్యోగాల కోతలు ఉండొచ్చనే వార్తలు ఇటీవల విస్తృతంగా ప్రచారంలోకి వచ్చాయి. అయితే ఇకపై ఈ ఏడాదిలో అదనపు లేఆఫ్లు ఉండకపోవచ్చని సంస్థ సీఈఓ మార్క్ జుకర్బర్గ్ ఉద్యోగులకు పంపిన సందేశంలో వెల్లడించారు.
వివరాలు
సంస్థ ఎదుగుదలలో భాగమైన ఉద్యోగులకు వీడ్కోలు చెప్పాల్సి రావడం బాధాకరమే: జుకర్బర్గ్
"విజయం అనేది సులభంగా దక్కేది కాదు. కృత్రిమ మేధ మన జీవితాలపై అత్యంత ప్రభావం చూపించే సాంకేతికతగా మారుతోంది. ఈ రంగంలో వేగంగా ముందుకు సాగే సంస్థలే భవిష్యత్ తరాలకు దారిచూపే స్థాయికి చేరుకుంటాయి. సంస్థ ఎదుగుదలలో భాగమైన ఉద్యోగులకు వీడ్కోలు చెప్పాల్సి రావడం ఎప్పుడూ బాధాకరమే. ఆ బాధను నేను కూడా అనుభవిస్తున్నాను" అని జుకర్బర్గ్ పేర్కొన్నారు. అమెరికా, ఐరోపా, సింగపూర్ దేశాల్లో పనిచేస్తున్న కొంతమంది ఉద్యోగులకు మొదట ఇంటి నుంచే పని చేసే అవకాశం కల్పించిన మెటా, అనంతరం వారిని ఉద్యోగాల నుంచి తొలగిస్తున్నట్లు ఇ-మెయిల్ ద్వారా సమాచారం పంపింది. ఇదే సమయంలో ఉద్యోగాలు కోల్పోయిన వారికి సంస్థ ఎంత మొత్తంలో పరిహారం అందిస్తుందన్న అంశం కూడా చర్చనీయాంశమైంది.
వివరాలు
ఉద్యోగి కుటుంబానికి 18 నెలల పాటు ఆరోగ్య బీమా సదుపాయం
అమెరికాలో ఉద్యోగాలు కోల్పోయిన వారికి 16 వారాల ప్రాథమిక వేతనానికి సమానమైన మొత్తాన్ని అందించనున్నట్లు అంతర్జాతీయ మీడియా కథనాలు వెల్లడించాయి. అదనంగా సంస్థలో పనిచేసిన ప్రతి ఏడాదికి మరో రెండు వారాల వేతనం చెల్లించనున్నారు. అంతేకాకుండా ఉద్యోగి కుటుంబానికి 18 నెలల పాటు ఆరోగ్య బీమా సదుపాయం కొనసాగించనున్నారు. అమెరికా వెలుపల ఉద్యోగాలు కోల్పోయిన వారికి కూడా దాదాపు ఇదే తరహా ప్రయోజనాలు కల్పించే అవకాశం ఉందని సమాచారం.