NVIDIA: ఎన్విడియా షేర్లలో 10 శాతం పతనం.. హువాంగ్‌కు పదవీ గండం?
ఈ వార్తాకథనం ఏంటి
ప్రముఖ చిప్‌ల తయారీ సంస్థ నివిడియా (NVIDIA) షేర్లు భారీగా పడిపోయాయి. కంపెనీ సీఈఓ జెన్సన్ హువాంగ్ వ్యక్తిగత వ్యవహారాలు, సంస్థలో నాయకత్వ మార్పులపై వస్తున్న వార్తల నేపథ్యంలో ఆఫ్టర్ అవర్స్ ట్రేడింగ్‌లో షేర్లు ఏకంగా 10 శాతం వరకు క్షీణించాయి. 'ది న్యూయార్క్ టైమ్స్' కథనం ప్రకారం.. ఎన్విడియా హెల్త్‌కేర్ విభాగం వైస్ ప్రెసిడెంట్ కింబర్లీ పావెల్‌తో హువాంగ్ వివాహేతర సంబంధం కొనసాగిస్తున్నట్లు ఆరోపణలు వచ్చాయి. గతంలోనూ చైనా గూఢచారిగా అనుమానిస్తున్న ఆలిస్ హువాంగ్‌తో తనకు సంబంధం ఉన్నట్లు హువాంగ్ అంగీకరించినట్లు కథనం పేర్కొంది. మరోవైపు, జెన్సన్ హువాంగ్‌ను సీఈఓ పదవి నుంచి తప్పించే అంశాన్ని ఎన్విడియా డైరెక్టర్ల బోర్డు పరిశీలిస్తున్నట్లు 'ది వాల్ స్ట్రీట్ జర్నల్' వెల్లడించింది.
వివరాలు
కుంభకోణం ప్రభావం.. ఎన్విడియా షేర్ల రేటింగ్ తగ్గించిన ఆర్థిక సంస్థలు
జెన్సన్ హువాంగ్ వ్యక్తిగత వ్యవహారాలపై వచ్చిన ఆరోపణలు ఎన్విడియా షేర్లపై ప్రతికూల ప్రభావం చూపుతున్నాయి.
పలు ఆర్థిక సంస్థలు ఈ కంపెనీ షేర్ల రేటింగ్‌ను తగ్గించాయి. తాజాగా బెర్న్‌స్టెయిన్ సంస్థ ఎన్విడియా రేటింగ్‌ను 'అవుట్‌పెర్ఫామ్' నుంచి 'మార్కెట్ పెర్ఫామ్'కు తగ్గించింది.
అలాగే షేరు ధర లక్ష్యాన్ని 400 డాలర్ల నుంచి 200 డాలర్లకు కుదించింది.
బైర్డ్ సంస్థ కూడా షేర్ల రేటింగ్‌ను 'న్యూట్రల్'కు తగ్గించగా.. మోర్గాన్ స్టాన్లీ తన టాప్ పిక్స్ జాబితా నుంచి ఎన్విడియాను తొలగించింది.
ఆఫ్టర్ అవర్స్ ట్రేడింగ్‌లో నమోదైన నష్టాలు కొనసాగితే.. సాధారణ ట్రేడింగ్ ప్రారంభమయ్యే సమయానికి ఎన్విడియా మార్కెట్ విలువ 4 లక్షల కోట్ల డాలర్ల దిగువకు పడిపోయే అవకాశం ఉంది.
వివరాలు
ఎన్విడియా సంక్షోభంతో ఇతర ఏఐ కంపెనీల షేర్లకూ నష్టాలు
ఎన్విడియాపై వచ్చిన ఆరోపణల ప్రభావం ఆ కంపెనీ షేర్లకే పరిమితం కాలేదు. కృత్రిమ మేధ (ఏఐ) రంగంతో సంబంధం ఉన్న ఇతర కంపెనీల షేర్లు కూడా ఆఫ్టర్ అవర్స్ ట్రేడింగ్‌లో నష్టాలను చవిచూశాయి.
కోర్‌వీవ్ (CoreWeave Inc.) షేర్లు 5 శాతానికి పైగా పడిపోయాయి. ఇంటెల్ (Intel Corp.), డెల్ టెక్నాలజీస్ (Dell Technologies Inc.) షేర్లు చెరో 3 శాతం మేర క్షీణించాయి.
సూపర్ మైక్రో కంప్యూటర్ (Super Micro Computer) షేర్లు కూడా 4 శాతానికి పైగా నష్టపోయాయి.
వివరాలు
హువాంగ్ భవితవ్యంపై అనిశ్చితి.. ఎన్విడియాలో ఆందోళన
ఎన్విడియాలో జెన్సన్ హువాంగ్ భవిష్యత్తు ఇప్పుడు ప్రశ్నార్థకంగా మారింది.
ఈ పరిణామాలపై జోన్స్‌ట్రేడింగ్ సంస్థ చీఫ్ మార్కెట్ స్ట్రాటజిస్ట్ మైఖేల్ ఓ రూర్క్ స్పందించారు.
ప్రస్తుత పరిస్థితి చాలా సవాలుతో కూడుకున్నదని పేర్కొన్నారు. ఈ ఏడాది కంపెనీ అమ్మకాలు 70 శాతం పెరుగుతాయని హువాంగ్ అంచనా వేసిన విషయాన్ని ఆయన గుర్తుచేశారు.
ఒకవేళ హువాంగ్ స్థానంలో మరొకరు బాధ్యతలు చేపడితే.. వచ్చే ఏడాదంతా కంపెనీలో తలెత్తే సమస్యలను పరిష్కరించడానికే సమయం కేటాయించాల్సి వస్తుందని అభిప్రాయపడ్డారు.