Silver Price: కొనుగోలుదారులకు ఊరట.. రూ.2 లక్షల దిగువకు వెండి ధర
ఈ వార్తాకథనం ఏంటి
ఈ ఏడాది ప్రారంభంలో భారీగా పెరిగి సామాన్యులకు అందనంత ఎత్తుకు చేరిన వెండి ధరలు ప్రస్తుతం తగ్గుముఖం పడుతున్నాయి. అంతర్జాతీయంగా నెలకొన్న అనిశ్చిత పరిస్థితుల నేపథ్యంలో కిలో వెండి ధర రూ.2 లక్షల దిగువకు చేరింది. శుక్రవారం హైదరాబాద్‌ బులియన్‌ మార్కెట్‌లో ఒక దశలో కిలో వెండి ధర రూ.1.97 లక్షలకు పడిపోయింది. దీంతో వెండి కొనుగోలుదారులకు కొంత ఊరట లభించినట్లయింది. గురువారం మార్కెట్‌ ముగిసే సమయానికి హైదరాబాద్‌ బులియన్‌ మార్కెట్‌లో 10 గ్రాముల మేలిమి బంగారం ధర రూ.1,46,460గా, కిలో వెండి ధర రూ.2,03,460గా నమోదైంది. అయితే శుక్రవారం ఉదయం మార్కెట్‌ ప్రారంభమైన వెంటనే ఈ రెండు లోహాల ధరల్లో తగ్గుదల కనిపించింది.
వివరాలు
అంతర్జాతీయ మార్కెట్‌లోనూ తగ్గిన బంగారం,వెండి ధరలు
ఒక దశలో 10 గ్రాముల మేలిమి బంగారం ధర రూ.1.45 లక్షలకు, కిలో వెండి ధర రూ.1.97 లక్షలకు దిగివచ్చాయి. ఆ తర్వాత మార్కెట్‌లో ధరలు హెచ్చుతగ్గులకు లోనవుతున్నాయి.
మరోవైపు అంతర్జాతీయ మార్కెట్‌లోనూ బంగారం,వెండి ధరలు తగ్గాయి.
స్పాట్‌ గోల్డ్‌ ఔన్సు ధర 4,035 డాలర్ల వద్ద ఉండగా.. వెండి ఔన్సు ధర 54.35 డాలర్లకు పడిపోయింది.
దేశీయ కమొడిటీ ఎక్స్ఛేంజ్‌ ఎంసీఎక్స్‌లో శుక్రవారం ఉదయం ఒక దశలో వెండి ఫ్యూచర్స్‌ ధర రూ.1,93,545 వద్ద ట్రేడయింది.
గత ముగింపు ధరతో పోలిస్తే ఇది సుమారు రూ.6 వేల తగ్గుదల కావడం గమనార్హం.
వివరాలు
పది నెలల తర్వాత ఇప్పుడు మళ్లీ ఆ స్థాయికి
వెండి ధరలు తగ్గడానికి పలు అంతర్జాతీయ పరిణామాలు కారణమవుతున్నాయి. ద్రవ్యోల్బణంపై ఆందోళనలు, అమెరికాలో వడ్డీరేట్లు అధిక స్థాయిల్లోనే కొనసాగవచ్చన్న అంచనాలు మార్కెట్లపై ప్రభావం చూపుతున్నాయి.
ప్రపంచ తయారీ రంగం నెమ్మదించడం, ఆర్థిక వృద్ధిపై ఆందోళనలు పెరగడంతో పారిశ్రామిక రంగం నుంచి వెండికి లభించే గిరాకీ తగ్గుతోంది.
దీంతో వెండి ధరలు క్రమంగా దిగివస్తున్నాయి. గతేడాది డిసెంబర్‌లో తొలిసారిగా కిలో వెండి ధర రూ.2 లక్షల మార్కును దాటింది.
అయితే సరిగ్గా పది నెలల తర్వాత ఇప్పుడు మళ్లీ ఆ స్థాయికి దిగువకు చేరడం గమనార్హం.
అంతర్జాతీయ పరిణామాలు, పారిశ్రామిక గిరాకీలో మార్పులు వెండి ధరలపై ప్రభావం చూపుతున్నాయి.