Stock Market: నష్టాలతో ముగిసిన దేశీయ స్టాక్ మార్కెట్ సూచీలు.. 25,100 దిగువకు నిఫ్టీ
ఈ వార్తాకథనం ఏంటి
దేశీయ స్టాక్ మార్కెట్ సూచీలు మోస్తరు నష్టాలతో ముగిశాయి.భౌగోళిక ఉద్రిక్తతలు,వాణిజ్య అనిశ్చిత పరిస్థితులు మార్కెట్ భావనపై ప్రతికూల ప్రభావం చూపాయి. ఒక దశలో సెన్సెక్స్ వెయ్యికి పైగా పాయింట్లు కోల్పోయినప్పటికీ, మధ్యాహ్నం తర్వాత మళ్లీ లాభాల్లోకి వచ్చి చివరికి మోస్తరు నష్టాలతోనే ముగిసింది. నిఫ్టీ కూడా ఇంట్రాడేలో 25,100 దిగువకు చేరింది. రోజంతా సూచీలు లాభనష్టాలు మారుతూ కొనసాగాయి. సెన్సెక్స్ ఉదయం 81,794.65 పాయింట్ల వద్ద ప్రారంభమై (క్రితం ముగింపు: 82,180.47) నష్టాల్లో కొనసాగింది. ఇంట్రాడేలో కనిష్ఠంగా 81,124.45 పాయింట్లను తాకింది. చివరగా 270.84 పాయింట్ల నష్టంతో 81,909.63 వద్ద ముగిసింది.
వివరాలు
రూపాయి-డాలర్ మారకం విలువ జీవనకాల కనిష్ఠ స్థాయికి
నిఫ్టీ 75 పాయింట్ల నష్టంతో 25,157.50 వద్ద స్థిరపడింది. రూపాయి-డాలర్ మారకం విలువ జీవనకాల కనిష్ఠ స్థాయికి చేరి 91.73కు చేరింది. సెన్సెక్స్ 30 సూచీ లో ఐసీఐసీఐ బ్యాంక్, ట్రెంట్, బిఇఎల్, యాక్సిస్ బ్యాంక్, హెచ్డీఎఫ్సీ బ్యాంక్ షేర్లు ప్రధానంగా నష్టపోయాయి. మరోవైపు, ఎటెర్నల్, అల్ట్రాటెక్ సిమెంట్, ఇండిగో, రిలయన్స్, అదానీ పోర్ట్స్ షేర్లు లాభపడ్డాయి. అంతర్జాతీయ మార్కెట్లో బ్రెంట్ క్రూడ్ ధర 64.33 డాలర్ల వద్ద కొనసాగుతుండగా, బంగారం 4,862 డాలర్ల వద్ద ట్రేడ్ అవుతోంది.