Basmati Rice: బాస్మతి బియ్యం ఎగుమతులపై కేంద్రం ఆంక్షలు
ఈ వార్తాకథనం ఏంటి
బాస్మతి బియ్యం ముసుగులో తెల్ల బియ్యం అక్రమంగా ఎగుమతి చేస్తున్న అక్రమార్కుల ఆట కట్టించేందుకు కేంద్రం కీలక నిర్ణయం తీసుకుంది.
టన్నుకు 1,200డాలర్ల(రూ.99,057) కంటే తక్కువ ధర పలికే బాస్మతి బియ్యాన్ని ఎగుమతి చేయకూడదని ప్రభుత్వం నిర్ణయించింది. ఈ మేరకు ఆదివారం వాణిజ్య మంత్రిత్వ శాఖ ఓ ప్రకటన విడుదల చేసింది.
టన్నుకు 1,200డాలర్ల కంటే తక్కువ పలికే బియ్యాన్ని నమోదు చేయవద్దని కేంద్ర వాణిజ్య ప్రమోషన్ బాడీ ఏపీఈడీఏని ఆదేశించింది.
అంతేకాదు నిర్దేశిత ధర కంటే తక్కువ మొత్తంతో గతంలో చేసుకున్న ఒప్పందాలను కూడా నిలిపివేస్తున్నట్లు కేంద్రం చెప్పింది.
దీనిపై భవిష్యత్ కార్యాచరణను అంచనా వేయడానికి ఏపీఈడీఏ చైర్మన్ ఆధ్వర్యంలో కమిటీని కేంద్రం ఏర్పాటు చేయనుంది.
కేంద్రం
బియ్యం రిటైల్ ధరల నియంత్రణకు వైట్ రైస్ ఎగుమతులపై కేంద్రం ఆంక్షలు
బియ్యం రిటైల్ ధరలను నియంత్రించేందుకు, దేశీయ సరఫరాను పెంచడానికి కేంద్ర ప్రభుత్వం అనేక చర్యలు తీసుకుంటోంది.
అందులో భాగంగానే గతేడాది సెప్టెంబరులో బ్రోకెన్ రైస్ ఎగుమతులపై నిషేధం విధించింది. గత నెలలో బాస్మతీయేతర తెల్ల బియ్యంపై ఆంక్షలు విధించింది.
అలాగే పార్-బాయిల్డ్ నాన్ బాస్మతి బియ్యంపై 20 శాతం ఎగుమతి సుంకాన్ని కేంద్రం విధించింది.
ఈ క్రమంలో కొందరు అక్రమార్కులు బాస్మతి రైస్ ముసుగులో తెల్లబియాన్ని అక్రమంగా రవాణా చేయడం కేంద్రం దృష్టికి రావడంతో తాజాగా.. మరిన్ని కఠిన చర్యలకు ఉపక్రమించింది.
బాస్మతి బియ్యం ముసుగులో తెల్ల బాస్మతీయేతర బియ్యాన్ని అక్రమంగా ఎగుమతి చేయడాన్ని నిరోధించడానికి అదనపు రక్షణలను ప్రవేశపెట్టాలని ఏపీఈడీఏకి ఆదేశాలు జారీ చేసింది.