TRAI: టెలికాం రంగంలో కీలక మార్పులు.. ఐపీ టెక్నాలజీకి ట్రాయ్ ఆదేశాలు
ఈ వార్తాకథనం ఏంటి
భారత టెలికాం రంగంలో కీలక మార్పులకు టెలికాం రెగ్యులేటరీ అథారిటీ ఆఫ్ ఇండియా (ట్రాయ్) శ్రీకారం చుట్టింది. టెలికాం నెట్‌వర్క్‌ల మధ్య కాల్స్‌ను అనుసంధానించే ఇంటర్‌కనెక్షన్ వ్యవస్థను ఆధునికీకరించేందుకు కొత్త నిబంధనలను ప్రకటించింది. ఈ మేరకు 'టెలికమ్యూనికేషన్ ఇంటర్‌కనెక్షన్ (మూడో సవరణ) రెగ్యులేషన్స్-2026'ను విడుదల చేసింది. ఈ నిబంధనలు 2027 జనవరి 1 నుంచి అమల్లోకి రానున్నాయి. వీటి ద్వారా కాల్స్ నాణ్యత మెరుగుపడటంతో పాటు నెట్‌వర్క్ సామర్థ్యం పెరుగుతుందని ట్రాయ్ తెలిపింది.
వివరాలు
ఇంటర్‌కనెక్షన్ పాయింట్లలో మార్పులు
ప్రస్తుతం షార్ట్ డిస్టెన్స్ ఛార్జింగ్ ఏరియా (ఎస్‌డీసీఏ), లాంగ్ డిస్టెన్స్ ఛార్జింగ్ ఏరియా (ఎల్‌డీసీఏ) స్థాయిలో ఉన్న ఇంటర్‌కనెక్షన్ పాయింట్లను ఇకపై లైసెన్స్డ్ సర్వీస్ ఏరియా (ఎల్ఎస్ఏ) స్థాయికి మార్చనున్నారు.
ప్రస్తుతం ఉన్న కాల్స్ ట్రాఫిక్‌ను మూడేళ్లలో దశలవారీగా ఎల్ఎస్ఏ స్థాయికి బదిలీ చేయాలని ట్రాయ్ ఆదేశించింది.
ఈ మార్పుతో కాల్స్ రూటింగ్ సులభతరం అవుతుంది. కాల్ కనెక్ట్ అయ్యేందుకు పట్టే సమయం తగ్గడంతో పాటు సేవల్లో విశ్వసనీయత పెరుగుతుంది.
వివరాలు
ఐపీ ఆధారిత టెక్నాలజీకి మార్పు
ఇంటర్‌కనెక్షన్ వ్యవస్థలో ప్రస్తుతం ఉపయోగిస్తున్న పాత ఈ1/టీడీఎం టెక్నాలజీ స్థానంలో ఆధునిక ఇంటర్నెట్ ప్రోటోకాల్ (ఐపీ)ఆధారిత సాంకేతికతను తీసుకురానున్నారు.
ఇకపై కొత్తగా ఏర్పాటు చేసే అన్ని ఇంటర్‌కనెక్షన్లు తప్పనిసరిగా ఐపీ ఆధారితంగానే ఉండాలని ట్రాయ్ స్పష్టం చేసింది.
ఇప్పటికే ఉన్న పాత టెక్నాలజీ పాయింట్లను కూడా మూడేళ్లలోపు పూర్తిగా ఐపీ వ్యవస్థకు మార్చాల్సి ఉంటుంది.
దీనివల్ల బ్యాండ్‌విడ్త్ వినియోగం మెరుగుపడటంతో పాటు కాల్స్ నాణ్యత పెరుగుతుంది.
పీఓఐల సరెండర్‌కు అవకాశం
కొత్త సవరణల్లో భాగంగా టెలికం సంస్థలు తమ కార్యాచరణ అవసరాలకు అనుగుణంగా పాయింట్స్ ఆఫ్ ఇంటర్‌కనెక్షన్ (పీఓఐ)లను స్వచ్ఛందంగా అప్పగించే వెసులుబాటు కల్పించారు.
గతంలో వీటిని డిస్‌కనెక్ట్ చేసే నిబంధన మాత్రమే ఉండేది. తాజా మార్పులతో సంస్థలకు మరింత వెసులుబాటు లభించనుంది.
వివరాలు
ఆలస్యపు చెల్లింపులపై వడ్డీ.. జరిమానాలు
ఇంటర్‌కనెక్షన్ ఛార్జీల చెల్లింపులో జాప్యం జరిగితే విధించే వడ్డీపై కూడా ట్రాయ్ స్పష్టత ఇచ్చింది.
ఎస్‌బీఐ ఏడాది కాలపు మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేట్ (ఎంసీఎల్ఆర్)కు అదనంగా 2 శాతం వడ్డీ వసూలు చేసుకోవచ్చు.
అలాగే బ్యాంక్ గ్యారంటీల కాలపరిమితిని ఆరు నెలల నుంచి 12 నెలలకు పెంచింది.
కొత్త నిబంధనల అమలును పర్యవేక్షించేందుకు ట్రాయ్ పటిష్ఠమైన వ్యవస్థను ఏర్పాటు చేయనుంది.
నిబంధనలు ఉల్లంఘించే సంస్థలపై దశలవారీగా ఆర్థిక జరిమానాలు విధించనుంది. ఈ మార్పుల ద్వారా టెలికాం నెట్‌వర్క్‌ల మధ్య అనుసంధానం మరింత సమర్థంగా మారనుంది.