Form 121: ఫారం 121 గురించి తెలుసా? ఆదాయపు పన్ను కొత్త నిబంధనలు ఇవే
ఈ వార్తాకథనం ఏంటి
మీరు ఎప్పుడైనా బ్యాంక్కు వెళ్లి, మీ ఫిక్స్డ్ డిపాజిట్ (FD) వడ్డీపై టీడీఎస్ (TDS) కట్ కాకుండా ఉండేందుకు ఫారం 15G లేదా ఫారం 15H సమర్పించి ఉంటే, ఇక అలాంటి ఫారాలు ఏప్రిల్ 1, 2026 నుంచి అందుబాటులో ఉండవు. ప్రభుత్వం కొత్తగా అమలు చేసిన 2025 ఆదాయపు పన్ను చట్టం ప్రకారం, ఈ రెండు ఫారాలను రద్దు చేసింది. వాటి స్థానంలో "ఫారం 121" అనే ఒకే ఫారాన్ని ప్రవేశపెట్టింది. అయితే ఈ మార్పు గురించి ఇప్పటికీ చాలా మందికి స్పష్టమైన అవగాహన లేదు.
వివరాలు
ఫారం 121 అంటే ఏమిటి?
ఫారం 121 అనేది టీడీఎస్ కోత లేకుండా కొన్ని నిర్దిష్ట ఆదాయాలను పొందేందుకు ఉపయోగించే భారత ప్రభుత్వ అధికారిక డిక్లరేషన్ పత్రం. ఒక ఆర్థిక సంవత్సరంలో మీ ఆదాయం పన్ను పరిమితికి లోపుగా ఉంటే, మీకు చెల్లింపులు చేసే సంస్థలకు (ఉదాహరణకు బ్యాంకులు, బీమా కంపెనీలు, ఉద్యోగదాతలు మొదలైనవి) మీరు ఫారం 121 సమర్పించవచ్చు. దీని ద్వారా, " మొత్తం పన్ను బాధ్యత సున్నా కాబట్టి, ఆదాయం నుండి టీడీఎస్ కట్ చేయకండి" అని తెలియజేయవచ్చు. ఈ ఫారం 121 ను ప్రభుత్వం ఆదాయపు పన్ను నియమాలు, 2026 లోని నియమం 211(1) ప్రకారం ప్రవేశపెట్టింది. దీనికి చట్టబద్ధమైన ఆధారం 2025 ఆదాయపు పన్ను చట్టంలోని సెక్షన్ 393(6) ద్వారా లభించింది.
వివరాలు
కొత్త ఫారం పాత ఫారాలను భర్తీ చేస్తుందిలా
ఫారం 15G — 60 సంవత్సరాల కంటే తక్కువ వయస్సు ఉన్న వ్యక్తులు, ఇతర కేటగిరీలకు ఉపయోగకరం. ఫారం 15H — 60 సంవత్సరాలు లేదా అంతకంటే ఎక్కువ వయస్సు గల సీనియర్ సిటిజన్లకు ఉపయోగకరం. 2026-27 ఆర్థిక సంవత్సరానికి ప్రారంభం నుండి ఈ రెండు పాత ఫారాలు రద్దు చేయబడ్డాయి. ఇకపై వాటి స్థానంలో ఫారం 121 ఒక్కటే ఉపయోగించాల్సి ఉంటుంది.