అన్నపూర్ణ స్టూడియో రివ్యూ: పీరియాడిక్ లవ్ స్టోరీ ప్రేక్షకులను మెప్పించిందా?
చైతన్యా రావు, లావణ్య హీరోహీరోయిన్లుగా నటించిన అన్నపూర్ణ స్టూడియో చిత్రం ఈరోజు థియేటర్లలో రిలీజైంది. ఓ పిట్టకథ ఫేమ్ చెందు మొద్దు దర్శకత్వం వహించిన ఈ సినిమా ఎలా ఉందో చూద్దాం. కథ: గోదావరి జిల్లాల్లో కపిలేశ్వరపురం అనే గ్రామంలో చంటి (చైతన్యా రావు) అనే కుర్రాడు తన తల్లి అన్నపూర్ణ పేరు మీద ఫోటో స్టూడియో నడుపుతుంటాడు. వయసు మీద పడుతున్నా పెళ్ళి కుదరక ఇబ్బంది పడుతుంటాడు. అందమైన అమ్మాయి కనిపిస్తే చాలు ఆమెతో పెళ్ళి ఐపోయినట్టు ఊహించేసుకుంటాడు. ఈ క్రమంలో ఒక ఫంక్షన్ లో గౌతమి(లావణ్య) కనిపిస్తుంది. అలా వాళ్ళిద్దరూ ప్రేమించుకుంటారు. ఈ విషయం, జ్యోతిష్యుడైన చంటి తండ్రికి తెలుస్తుంది.
సినిమా ఎలా ఉందంటే?
చంటి ప్రేమ గురించి తెలుసుకున్న తండ్రి, గౌతమికి ఒక రహస్యాన్ని చెబుతాడు. అదే టైమ్ లో ఒక మర్డర్ కేసులో చంటి ఇరుక్కుంటాడు. అసలు చంటి తండ్రి చెప్పిన రహస్యమేంటి? మర్డర్ కేసు మిస్టరీ ఏంటనేదే కథ. 80ల కాల నాటి అమాయకత్వాన్ని ఈ సినిమాలో చక్కగా చూపించారు. ఫస్టాఫ్ అంతా హాయిగా నవ్వుకుంటూ గడిచిపోతుంది. చంటికి ఇంకా పెళ్ళి కావట్లేదని ఫ్రెండ్స్ ఏడిపించడాలు, ఇంకా అమ్మాయి దొరకట్లేదని చంటి బాధపడటాలు అంతా సరదాగా గడిచిపోతుంది. ఎక్కడా బోర్ అనిపించకుండా స్మూత్ గా పోతూ ఉంటుంది. ఇక సెకండాఫ్ లో కథ మెయిన్ లైన్లోకి రావడం వల్ల కామెడీ తగ్గిపోయింది. క్లైమాక్స్ లో వచ్చిన ట్విస్టు, ప్రేక్షకులను అబ్బుర పరుస్తుంది.
ఎవరెలా చేసారంటే?
వయసు పైబడ్డ యువకుడిగా చైతన్యా రావు మెప్పించాడు. గౌతమి పాత్రలో లావణ్య, అచ్చం తెలుగమ్మాయిలా అందంగా ఉంది. వీరిద్దరూ తమ తమ పాత్రలకు న్యాయం చేసారు. ఈ సినిమాకు ప్రధాన బలం మ్యూజిక్. 80ల కాలంలోకి తీసుకెళ్ళడంలో ప్రిన్స్ హెన్రీ అందించిన మ్యూజిక్ ఎంతగానో సాయపడింది. కెమెరా వర్క్ డీసెంట్ గా ఉంటుంది. నిర్మాణ విలువలు సూపర్బ్. నిర్మాణంలో ఎక్కడా కూడా కాంప్రమైజ్ కాలేదని అర్థమవుతుంది. ఈ సినిమా టైమ్ పీరియడ్.. 80ల కాలం కాబట్టి కొన్ని సీన్లను కూడా 80ల కాలం నాటి ఫిలిమ్ మేకింగ్ స్టైల్ లో చూపించారు. అది కొంచెం ఇబ్బంది పెడుతుంది. ఓవరాల్ గా చూస్తే, హ్యాపీగా ఫ్యామిలీతో వెళ్లి క్లీన్ సినిమాను ప్రశాంతంగా చూసి రావొచ్చు.
