Billionaire Web Series: విజయ్ మాల్యా కథతో అర్జున్ రాంపాల్.. నవంబర్లో షూటింగ్!
ఈ వార్తాకథనం ఏంటి
ఒకప్పుడు దేశంలోని అత్యంత సంపన్న వ్యాపారవేత్తల్లో ఒకరు.. విలాసవంతమైన జీవితం, భారీ వ్యాపార సామ్రాజ్యం, సొంత ఎయిర్లైన్స్.. ఆ తర్వాత కోట్లాది రూపాయల రుణాలు, ఆర్థిక సంక్షోభాలు, బ్యాంకులతో వివాదాలు, న్యాయపరమైన కేసులు, విదేశాలకు వెళ్లడం.. విజయ్ మాల్యా పేరు చుట్టూ ఇలాంటి ఎన్నో సంచలన అంశాలు ఉన్నాయి. ఇప్పుడు ఇదే నేపథ్యం నుంచి స్ఫూర్తి పొంది మరో ఆసక్తికరమైన వెబ్ సిరీస్ ప్రేక్షకుల ముందుకు రాబోతోంది. బాలీవుడ్ నటుడు అర్జున్ రాంపాల్ ప్రధాన పాత్రలో నటించనున్న ఈ సిరీస్కు 'బిలియనీర్' అనే టైటిల్ను ఖరారు చేసినట్లు తెలుస్తోంది. అయితే ఇది విజయ్ మాల్యా జీవితానికి సంబంధించిన పూర్తి బయోపిక్ కాకపోవడం ఈ ప్రాజెక్ట్లోని మరో ఆసక్తికరమైన అంశం.
వివరాలు
ఫిక్షనల్ బిజినెస్ డ్రామాగా మూవీ..
'బిలియనీర్' ఓ ఫిక్షనల్ బిజినెస్ డ్రామాగా తెరకెక్కుతోంది. సాధారణ స్థాయి నుంచి ఎదిగి.. భారీ వ్యాపార సామ్రాజ్యాన్ని నిర్మించుకున్న ఓ సంపన్న వ్యాపారవేత్త ప్రయాణం చుట్టూ ఈ కథ సాగనుంది.
డబ్బు, అధికారం, పలుకుబడి పెరిగే కొద్దీ అతని జీవితంలో చోటుచేసుకునే మార్పులు, ఆశయాలు, నిర్ణయాలు, వ్యక్తిగత సంబంధాలపై వాటి ప్రభావం, చివరకు ఎదురయ్యే పరిణామాలను ఈ సిరీస్లో చూపించనున్నట్లు సమాచారం.
ఈ పాత్రకు విజయ్ మాల్యా జీవితం స్ఫూర్తిగా నిలిచినప్పటికీ.. కథలోని పాత్రలు, సంఘటనలను పూర్తిగా ఆయన జీవితంతో అనుసంధానం చేయడం లేదని మేకర్స్ స్పష్టం చేస్తున్నట్లు తెలుస్తోంది.
ఇక ఈ ప్రాజెక్ట్లో అర్జున్ రాంపాల్ ప్రధాన ఆకర్షణగా నిలవనున్నారు.
వివరాలు
'బిలియనీర్' సిరీస్కు హన్సల్ మెహతా, రాబీ గ్రెవాల్ దర్శకత్వం..
ఇప్పటికే పలు విభిన్న పాత్రల్లో నటించిన ఆయన.. ఈ సిరీస్లో విజయ్ మాల్యాను పోలిన పాత్రలో కనిపించనున్నారు.
దీంతో ఈ పాత్ర అర్జున్ రాంపాల్కు నటుడిగా మరింత సవాల్గా మారనుంది.
'బిలియనీర్' సిరీస్కు హన్సల్ మెహతా, రాబీ గ్రెవాల్ దర్శకత్వం వహించనున్నారు.
వాస్తవ సంఘటనల నుంచి స్ఫూర్తి పొందిన కథలను సహజంగా, డ్రామాటిక్గా తెరకెక్కించడంలో హన్సల్ మెహతాకు మంచి గుర్తింపు ఉంది.
ఆయన ఈ ప్రాజెక్ట్లో భాగం కావడంతో సిరీస్పై ఆసక్తి మరింత పెరుగుతోంది.
ఈ సిరీస్ షూటింగ్ నవంబర్ 2026లో ప్రారంభం కానున్నట్లు సమాచారం.
ప్రస్తుతం ప్రీ-ప్రొడక్షన్ పనులు జరుగుతున్నాయి. ఇతర నటీనటులు ఎవరనే విషయం, షూటింగ్ షెడ్యూల్, విడుదల తేదీ వంటి వివరాలను మేకర్స్ ఇంకా వెల్లడించాల్సి ఉంది.