The Paradise Censor Cuts: 'ది ప్యారడైజ్'పై సెన్సార్ కత్తెర.. ఏకంగా 21 సీన్లకు కత్తెర!
ఈ వార్తాకథనం ఏంటి
న్యాచురల్ స్టార్ నాని, యంగ్ డైరెక్టర్ శ్రీకాంత్ ఓదెల కాంబినేషన్లో అత్యంత ప్రతిష్ఠాత్మకంగా తెరకెక్కుతున్న చిత్రం 'ది ప్యారడైజ్'. ఇప్పటికే ఈ సినిమాపై భారీ అంచనాలు నెలకొన్నాయి. అయితే ఇప్పుడు ఈ మూవీ చుట్టూ అనూహ్యంగా పొలిటికల్ దుమారం మొదలైంది. సినిమా సెన్సార్ కార్యక్రమాలు పూర్తయిన నేపథ్యంలో వెలుగులోకి వచ్చిన కొన్ని అంశాలు సినీ వర్గాల్లో ఆసక్తిని పెంచుతున్నాయి. కేవలం రా యాక్షన్ మాత్రమే కాకుండా.. సమకాలీన రాజకీయాలను టార్గెట్ చేస్తూ సినిమాలో వివాదాస్పద డైలాగులు, రాజకీయ నాయకుల ప్రస్తావనలు ఉన్నట్లు తాజాగా సమాచారం బయటకు వచ్చింది. దీంతో 'ది ప్యారడైజ్'పై ఒక్కసారిగా హైప్ మరింత పెరిగింది. సాధారణంగా సినిమాల్లో హింస, రక్తపాతం వంటి అంశాలపై సెన్సార్ బోర్డు ఆంక్షలు విధించడం సహజమే.
వివరాలు
పొలిటికల్ లీడర్ల పేర్లపై అభ్యంతరాలు?
కానీ 'ది ప్యారడైజ్' విషయంలో రాజకీయ అంశాలపైనా సెన్సార్ బోర్డు ప్రత్యేకంగా దృష్టి సారించినట్లు తెలుస్తోంది.
సినిమా కథలో నేరుగా కొందరు రాజకీయ నాయకుల పేర్లు ప్రస్తావనకు వచ్చినట్లు సమాచారం. అంతేకాకుండా రాజకీయ వ్యవస్థను తీవ్రంగా విమర్శించేలా ఉన్న కొన్ని సంభాషణలపైనా సెన్సార్ బోర్డు సభ్యులు అభ్యంతరం వ్యక్తం చేసినట్లు తెలుస్తోంది.
ఈ నేపథ్యంలో వివాదాస్పదంగా ఉన్న పేర్లతో పాటు కీలక డైలాగులను తొలగించాలని లేదా అవసరమైన మార్పులు చేయాలని చిత్ర బృందానికి సూచించినట్లు సమాచారం.
అయితే దర్శకుడు శ్రీకాంత్ ఓదెల కథలో ఎవరిని టార్గెట్ చేశారు? ఆ అగ్ర రాజకీయ నేతలు ఎవరు? సినిమాలో ఎలాంటి రాజకీయ అంశాలను ప్రస్తావించారు? అనే ప్రశ్నలు ప్రస్తుతం సోషల్ మీడియాలో చర్చనీయాంశంగా మారాయి.
వివరాలు
'ది ప్యారడైజ్'లో 21 మార్పులు
సెన్సార్ బోర్డు నిబంధనల ప్రకారం 'ది ప్యారడైజ్'లో మొత్తం 21 మార్పులు చేయాల్సి వచ్చినట్లు సమాచారం.
సినిమాలోని రక్తపాతం, టార్చర్కు సంబంధించిన పలు సన్నివేశాలను సెన్సార్ సూచనల మేరకు ట్రిమ్ చేసినట్లు తెలుస్తోంది.
అలాగే అభ్యంతరకరంగా భావించిన పదజాలాన్ని మ్యూట్ చేశారు. కొన్ని సన్నివేశాల్లో కనిపించే స్మోకింగ్, సిగరెట్ బ్రాండ్లకు సంబంధించిన వివరాల్లోనూ మార్పులు చేసినట్లు సమాచారం.
వివరాలు
25 సెకన్ల విజువల్స్ తొలగింపు
సెన్సార్ మార్పుల్లో భాగంగా సినిమాలోని దాదాపు 25 సెకన్ల విజువల్స్ను పూర్తిగా తొలగించినట్లు తెలుస్తోంది.
మరోవైపు వివాదాస్పదంగా ఉన్న సుమారు 1 నిమిషం 25 సెకన్ల దృశ్యాలను ఇతర సన్నివేశాలతో రీప్లేస్ చేసినట్లు సమాచారం.
అంటే సెన్సార్ ప్రక్రియలో పలు సన్నివేశాలను తొలగించడంతో పాటు మరికొన్ని సన్నివేశాల్లో మార్పులు చేసి సినిమాను విడుదలకు సిద్ధం చేసినట్లు తెలుస్తోంది.
వివరాలు
2 గంటల 54 నిమిషాల 4 సెకన్ల నిడివి
అన్ని కట్స్, మార్పులు పూర్తయిన తర్వాత 'ది ప్యారడైజ్' సినిమా తుది నిడివి 2 గంటల 54 నిమిషాల 4 సెకన్లుగా ఫిక్స్ అయినట్లు సమాచారం.
అంటే దాదాపు మూడు గంటల పాటు సాగే భారీ యాక్షన్ డ్రామాగా ఈ సినిమా ప్రేక్షకుల ముందుకు రానుంది.
సెన్సార్ ప్రక్రియలో చోటుచేసుకున్న మార్పులు, తొలగింపులను పరిశీలిస్తే.. సమాజంలోని వాస్తవ పరిస్థితులను వెండితెరపై ఎంత బోల్డ్గా చూపించేందుకు దర్శకుడు ప్రయత్నించారనే ఆసక్తి సినీ అభిమానుల్లో నెలకొంది.
అయితే సినిమాలోని రాజకీయ ప్రస్తావనలు, వివాదాస్పద డైలాగులకు సంబంధించిన పూర్తి వివరాలు అధికారికంగా వెలువడాల్సి ఉంది.
సెన్సార్ ఆంక్షలు, మార్పుల నడుమ 'ది ప్యారడైజ్' సెప్టెంబర్ 24న ప్రేక్షకుల ముందుకు రానుంది.