Rajamouli: వెండితెరపై ఇతిహాసాలకు పూర్తి న్యాయం జరగలేదు.. రాజమౌళి సంచలన వ్యాఖ్యలు!
ఈ వార్తాకథనం ఏంటి
భారతీయ ఇతిహాసాలను వెండితెరపై ఆవిష్కరించే విధానంపై ప్రముఖ దర్శకుడు ఎస్‌.ఎస్‌. రాజమౌళి తాజాగా ఓ పాడ్‌కాస్ట్‌లో ఆసక్తికర వ్యాఖ్యలు చేశారు. ఇప్పటివరకు సినిమాల్లో భారతీయ ఇతిహాసాలను చూపించిన తీరుపై తాను ఎప్పుడూ పూర్తిస్థాయిలో సంతృప్తి చెందలేదని ఆయన వెల్లడించారు. ఎన్నో క్లాసిక్‌ పౌరాణిక చిత్రాలు తనకు ఇష్టమైనప్పటికీ, గొప్ప ఇతిహాస గ్రంథాలకు మాత్రం తెరపై పూర్తి న్యాయం జరగలేదని తన అభిప్రాయాన్ని వ్యక్తం చేశారు. ఇతిహాసాలను రచించిన విధానానికి, వాటిని సినిమాల రూపంలో వెండితెరపై ఆవిష్కరించిన తీరుకు మధ్య చాలా వ్యత్యాసం ఉందని రాజమౌళి పేర్కొన్నారు.
వివరాలు
అభిమానుల్లో మరింత ఆసక్తి
ఈ లోటు తనను ఎన్నో ఏళ్లుగా ఆలోచింపజేస్తోందని తెలిపారు.
చివరకు ఈ అంశాన్నే తాను ఒక సవాల్‌గా స్వీకరించినట్లు వెల్లడించారు. భారతీయ ఇతిహాసాలను తెరపై మరింత అద్భుతంగా ఎలా చూపించవచ్చనే ప్రశ్న తనలో తలెత్తిందని చెప్పారు.
ఇప్పుడు నువ్వు ఏం చేయబోతున్నావు? వాటిని ఎలా చూపించబోతున్నావు?'' అని తనను తానే ప్రశ్నించుకున్నట్లు రాజమౌళి వివరించారు.
ఇతిహాసాలను వెండితెరపై ఆవిష్కరించే విషయంలో తనకు ఎదురైన ఈ ప్రశ్నలే చివరకు 'వారణాసి' సినిమాకు ప్రధాన ఆలోచనగా మారాయని తెలిపారు.
ఇప్పటికే 'వారణాసి' సినిమాలో రామాయణానికి సంబంధించిన కొన్ని సన్నివేశాలను తెరకెక్కించనున్నట్లు రాజమౌళి గతంలో వెల్లడించారు.
తాజాగా ఆయన చేసిన వ్యాఖ్యలతో ఈ సినిమాలో రామాయణ ఘట్టాలను ఏ విధంగా చూపించబోతున్నారనే ఆసక్తి అభిమానుల్లో మరింత పెరిగింది.
వివరాలు
'ఈగ' నాలో ఆత్మవిశ్వాసాన్ని పెంచింది: రాజమౌళి
తన కెరీర్‌లో 'ఈగ' సినిమాకు ప్రత్యేకమైన స్థానం ఉందని రాజమౌళి తెలిపారు. ఆ చిత్రం తనలో ఆత్మవిశ్వాసాన్ని పెంచిందని వెల్లడించారు.
కథానాయకుడిగా ఒక ఈగను ఎంచుకుని సినిమా తెరకెక్కించడం తన కెరీర్‌లో చేసిన అతిపెద్ద ప్రయోగమని ఆయన పేర్కొన్నారు.
ఈగ నాకు అత్యంత ఇష్టమైన చిత్రం. ఎందుకంటే నేను చేసిన అతిపెద్ద ప్రయోగం అదే. ఈ రోజుకీ ఒక ఈగను ప్రధాన పాత్రధారిగా పెట్టి సినిమా తీయాలనే ఆలోచనే కొత్తగా అనిపిస్తుంది.
ఆ కథలోని భావోద్వేగాలు మాలో ఎంతో ఉత్సాహాన్ని నింపాయని రాజమౌళి వివరించారు.
సాధారణంగా ప్రేక్షకులు, సినీ విశ్లేషకులు తన కెరీర్‌ను 'బాహుబలి'కి ముందు, 'బాహుబలి'కి తర్వాత అని విభజిస్తుంటారని ఆయన పేర్కొన్నారు.
వివరాలు
వారణాసిపై పెరిగిన అంచనాలు
అయితే, వ్యక్తిగతంగా తనను తాను మాత్రం 'ఈగ'కు ముందు, 'ఈగ'కు తర్వాత అనే కోణంలో చూసుకుంటానని వెల్లడించారు.
ఇలా ఒకవైపు భారతీయ ఇతిహాసాలను వెండితెరపై ఆవిష్కరించడంపై తన ఆలోచనలను పంచుకున్న రాజమౌళి, మరోవైపు తన కెరీర్‌లో ప్రయోగాత్మక చిత్రమైన 'ఈగ' తనకు అందించిన ఆత్మవిశ్వాసం గురించి కూడా ఆసక్తికర విషయాలను వెల్లడించారు.
ఈ వ్యాఖ్యలతో మహేశ్‌ బాబుతో రూపొందిస్తున్న 'వారణాసి'పై ప్రేక్షకుల్లో అంచనాలు మరింత పెరిగాయి.