సైంధవ్: వెంకీ సరసన అండర్ రేటెడ్ గ్లామర్ బ్యూటీ
రానా నాయుడు తో ఓటీటీ ప్రేక్షకులకు కనిపించి అందరికీ షాక్ ఇచ్చిన వెంకటేష్, ప్రస్తుతం సైంధవ్ సినిమా ద్వారా థియేటర్లలో కనిపించేందుకు సిద్ధమవుతున్నాడు. తన కెరీర్లో 75వ సినిమాగా రూపొందుతున్న ఈ చిత్రాన్ని "హిట్" ఫ్రాంఛైజీల దర్శకుడు శైలేష్ కొలను డైరెక్ట్ చేస్తున్నారు. సైంధవ్ కూడా హిట్ తరహాలోనే యాక్షన్ డ్రామాగా ఉండనుందని ఇదివరకు రివీల్ చేసిన గ్లింప్స్ ద్వారా అర్థమైంది. తాజాగా ఈ సినిమా నుండి ఖతర్నాక్ అప్డేట్ వచ్చింది. సైంధవ్ మూవీలో వెంకటేష్ జోడీగా ఎవరు కనిపించనున్నారో తెలిసిపోయింది. కన్నడ బ్యూటీ శ్రద్ధా శ్రీనాథ్, వెంకటేష్ సరసన సైంధవ్ మెరవనుందని అంటున్నారు. ప్రస్తుతానికి అధికారిక సమాచారం బయటకు రాలేదు కానీ శ్రద్ధా శ్రీనాథ్ ఫిక్స్ అయిపోయినట్టేనని చెప్పుకుంటున్నారు.
రెండవ హీరోయిన్ గా రుహానీ శర్మ
ఇదే నిజమైతే అటు శ్రద్ధా శ్రీనాథ్ కీ, ఇటు సైంధవ్ సినిమాకు లాభం చేకూరుతుందని కామెంట్స్ చేస్తున్నారు. జెర్సీ చిత్రం ద్వారా తెలుగు ప్రేక్షకులకు పరిచయమైన శ్రద్ధా శ్రీనాథ్, ఆ తర్వాత క్రిష్ణ అండ్ హిస్ లీల సినిమాతో విజయం అందుకుంది. ఆ తర్వాత మళ్ళీ తెలుగులో పెద్దగా గుర్తింపు వచ్చే సినిమాలు చేయలేదు. ఇప్పుడు సైంధవ్ లో కనిపిస్తే తెలుగులో ఆమె కెరీర్ పుంజుకుంటుందని, అలాగే సైంధవ్ సినిమాకు గ్లామర్ యాడ్ అవుతుందని అంటున్నారు. అలా ఉంచితే సైంధవ్ సినిమాలో మరో హీరోయిన్ గా రుహానీ శర్మ కనిపించనుందట. శైలేష్ కొలను దర్శకత్వం వహించిన హిట్ ఫస్ట్ కేస్ చిత్రంలో నటించింది రుహానీ శర్మ.
