తనతో స్నేహం చేయాలంటూ క్రితిశెట్టి వెంటపడుతున్న స్టార్ కిడ్: క్లారిటీ ఇచ్చిన బేబమ్మ
ఉప్పెన చిత్రంతో తెలుగు సినిమా ఇండస్ట్రీలోకి ఎంటరైన క్రితిశెట్టి, ఆ తర్వాత శ్యామ్ సింగరాయ్, బంగార్రాజు సినిమాలతో మంచి విజయాలు సాధించింది. అయితే గతకొన్ని రోజులుగా క్రితిశెట్టిపై సోషల్ మీడియాలో అనేక పుకార్లు వస్తున్నాయి. తనను ఓ బడా హీరో కొడుకు వేధిస్తున్నాడనీ, స్నేహం చేయమని అడుగుతున్నాడని పుకార్లు వచ్చాయి. తాజాగా ఈ విషయమై క్రితిశెట్టి స్పందించింది. సోషల్ మీడియాలో వస్తున్న వార్తల్లో ఎలాంటి నిజం లేదనీ, అవన్నీ అవాస్తవాలనీ, తనను ఎవరూ వేధించడం లేదని ఆమె పేర్కొంది. ఎలాంటి ఆధారం లేకుండా ఇలాంటి తప్పులు వార్తలు రాయవద్దని, పుకార్లు సృష్టించడం మానుకోవాలని క్రితిశెట్టి తెలియజేసింది. దీంతో పుకార్లకు ఫుల్ స్టాప్ పడినట్టయ్యింది.
మళయాలం, తమిళం సినిమాలలో నటిస్తున్న క్రితిశెట్టి
ఉప్పెన, శ్యామ్ సింగరాయ్, బంగార్రాజు చిత్రాల తర్వాత తెలుగులో క్రితిశెట్టికి హిట్ దక్కలేదు. వారియర్, మాచర్ల నియోజకవర్గం, ఆ అమ్మాయి గురించి మీకు చెప్పాలి, కస్టడీ చిత్రాలు ఫ్లాప్ టాక్ తెచ్చుకున్నాయి. దీంతో ప్రస్తుతం మళయాలం, తమిళ చిత్రాల్లో నటిస్తోంది. మళయాలంలో టోవినో థామస్ హీరోగా రూపొందుతున్న మూవీలో నటిస్తోంది. అలాగే తమిళంలో జయం రవి సరసన ఓ సినిమా చేస్తోంది. మరి ఈ రెండు చిత్రాలతో విజయాల బాట పడుతుందేమో చూడాలి. ప్రస్తుతానికి ఆమె చేతిలో తెలుగు చిత్రాలేవీ లేవు.
