నాగచైతన్య నెక్స్ట్: బోటు డ్రైవర్ గా రూటు మారుస్తున్నాడు
ఇటీవల కాలంలో అక్కినేని ఫ్యామిలీ నుండి వచ్చిన సినిమాలన్నీ బాక్సాఫీస్ వద్ద నిరాశను మిగిల్చాయి. నాగార్జున ఘోస్ట్, అఖిల్ ఏజెంట్, నాగ చైతన్య థాంక్యూ, కస్టడీ చిత్రాలు డిజాస్టర్లుగా మిగిలాయి. కస్టడీ చిత్రంపై నాగచైతన్య ఎన్నో ఆశలు పెట్టుకున్నాడు. క్రితి శెట్టి హీరోయిన్ గా కనిపించిన ఈ సినిమా, ప్రేక్షకులను అలరించడంలో విఫలమైంది. ఈ నేపథ్యంలో అక్కినేని ఫ్యామిలీకి హిట్ కావాలని అభిమానులు అందరూ కోరుకుంటున్నారు. దానికి ముహూర్తం మరికొద్ది రోజుల్లో కుదరబోతుందని వినిపిస్తోంది. తాజాగా 2018 సినిమా ప్రమోషన్లలో భాగంగా నిర్మాత బన్నీ వాసు మాట్లాడుతూ అక్కినేని నాగచైతన్య తర్వాతి చిత్రం గురించి ఆసక్తికర విషయాలు వెల్లడి చేశాడు.
బోటు డ్రైవర్ గా నాగ చైతన్య
నాగ చైతన్య తర్వాతి చిత్రం గీతా ఆర్ట్స్ 2 బ్యానర్లో ఉండబోతుందని, మత్స్యకారుల జీవితాల నేపథ్యంలో కథ ఉంటుందని అన్నాడు బన్నీవాసు. మత్స్యకారులకు సహాయం చేసే బోటు డ్రైవర్ గా నాగచైతన్య కనిపిస్తాడని, గుజరాత్ లో జరిగిన నిజ జీవిత సంఘటన ఆధారంగా ఈ సినిమాను తెరకెక్కిస్తున్నామని చెప్పేసాడు. యాక్షన్, ప్రేమ, ట్విస్టులు కలబోసి భారీ బడ్జెట్ తో సుమారు 60కోట్ల ఖర్చుతో తెరకెక్కించనున్నారట. ఈ సినిమాకు కార్తికేయ దర్శకుడు చందు మొండేటి దర్శకత్వం వహించనున్నాడని టాక్ వినిపిస్తోంది. ఈ సినిమాలో నాగచైతన్య లుక్ చాలా కొత్తగా ఉండనుందట. మరి ఈ సినిమాను ఎప్పుడు స్టార్ట్ చేస్తారో చూడాలి.
