నాకు ఆ టైమ్ ఇప్పుడే వచ్చింది.. హిందీ సినిమాపై నయనతార కామెంట్స్
లేడీ సూపర్ స్టార్ గా పేరు తెచ్చుకున్న నయన తార, కనెక్ట్ సినిమాతో ప్రేక్షకుల ముందుకు వచ్చింది. తెలుగు, తమిళం, మళయాలం, హిందీ భాషల్లో ఈ సినిమాను విడుదల చేసారు. ఐతే తెలుగులో రిలీజైన వారం రోజులకు హిందీలో విడుదలైంది ఈ సినిమా. ఈ నేపథ్యంలో బాలీవుడ్ మీడియాతో ముచ్చటించిన నయన తార, హిందీ సినిమా గురించి ఆసక్తికర కామెంట్స్ చేసింది. ఎన్నో ఏళ్ళుగా ఇండస్ట్రీలో ఉన్నా కూడా ఇప్పటి వరకు హిందీ సినిమాల్లోకి ఎందుకు రాలేదని ప్రశ్నించగా, ఇన్ని రోజులూ కుదర్లేదని, ప్రస్తుతం ఇది సరైన సమయం అని తెలియజేసింది. కనెక్ట్ సినిమాను హిందీలో డబ్ చేసారు. కానీ నయన తర్వాత బాలీవుడ్ ఎంట్రీ షారుఖ్ ఖాన్ జవాన్ తో ఉండనుంది.
నా ఫేవరేట్ హిందీ సినిమాలు అవే
జవాన్ సినిమాకు అట్లీ దర్శకత్వం వహిస్తున్నారు. కనెక్ట్ మూవీ ప్రమోషన్లలో మాట్లాడిన నయన తార, హిందీ సినిమాలు చాలా చూసానని చెప్పుకొచ్చింది. "మీరు ఏ హిందీ సినిమా పేరైనా చెప్పండి, ఆ సినిమా నేను చూసే ఉంటాను" అని అంది. తను చూసిన హిందీ సినిమాలన్నింటిలో కుచ్ కుచ్ హోతా హై అనే సినిమా ఫేవరేట్ అనీ, అలాగే కభీ ఖుషీ కబీ ఘమ్ సినిమా కూడా బాగా ఇష్టమని పేర్కొంది. ఈ రెండు షారుకు ఖాన్ సినిమాలే కావడం విశేషం. ఇంకా సినిమాల గురించి మాట్లాడుతూ, ప్రస్తుతం ఏ భాష నుండి సినిమా వచ్చినా కంటెంట్ బాగుంటే ఆదరిస్తున్నారని, చిన్నా పెద్దా అనే తేడా లేకుండా అన్ని సినిమాలను చూస్తున్నారని అంది.
