Nivetha Pethuraj: ఫ్యాన్స్‌కు సర్‌ప్రైజ్ ఇచ్చిన నివేదా పేతురాజ్.. వ్యాపారవేత్త రాజ్‌హిత్ ఇబ్రాన్‌తో త్వరలో వివాహం
ఈ వార్తాకథనం ఏంటి
ప్రముఖ టాలీవుడ్ నటి నివేదా పేతురాజ్ తన అభిమానులకు ఓ తీపి కబురు అందించారు. త్వరలోనే ఆమె వైవాహిక జీవితం ఆరంభం కానుందని స్వయంగా సోషల్ మీడియాలో ప్రకటించారు. తనకు వరుడిగా రాబోయే వ్యక్తిని అభిమానులకు పరిచయం చేస్తూ, ఇప్పటికే నిశ్చితార్థ కార్యక్రమం కూడా పూర్తయ్యిందని వెల్లడించారు. ఈ సందర్భంగా ఆమె ఇన్‌స్టాగ్రామ్‌లో పంచుకున్న ఫోటో ప్రస్తుతం ఇంటర్నెట్‌లో వైరల్ అవుతోంది. నివేదా పేతురాజ్ వివాహం చేసుకోబోయే వ్యక్తి పేరు రాజ్‌హిత్ ఇబ్రాన్. ఆయన ఒక వ్యాపారవేత్త అని సమాచారం. రాజ్‌హిత్ దుబాయ్‌కు చెందిన ప్రముఖ వ్యాపారవేత్త అని సినీ వర్గాల్లో చర్చ నడుస్తోంది. ఈ జంట పెళ్లి ఈ ఏడాది చివరి నాటికి జరగే అవకాశముందని తెలుస్తోంది.
వివరాలు
అభిమానులు,శ్రేయోభిలాషుల ఆనందం
అంతేగాక ఈ వేడుకను ఎలాంటి ఆర్భాటాలు లేకుండా, కుటుంబ సభ్యులు,అత్యంత సన్నిహితుల సమక్షంలో సాదాసీదాగా నిర్వహించాలని ఇరు కుటుంబాలు నిర్ణయించుకున్నట్లు సమాచారం. పెళ్లికి సంబంధించిన అధికారిక వివరాలు త్వరలోనే వెల్లడి కానున్నాయి. నివేదా పెళ్లి వార్త వెలువడగానే ఆమె అభిమానులు,శ్రేయోభిలాషులు ఆనందంతో వ్యక్తం చేస్తున్నారు. సోషల్ మీడియా వేదికగా కొత్త జంటకు శుభాకాంక్షలు వెల్లువెత్తుతున్నాయి.
వివరాలు
'ఒరు నాల్ కూతు'తో నటిగా అరంగేట్రం
ఇదిలా ఉంటే చాలామంది ఆమె కాబోయే భర్త గురించి మరిన్ని వివరాలు తెలుసుకోవడానికి ఆసక్తిగా వెతుకుతున్నారు. నటిగా నివేదా పేతురాజ్ తన ప్రయాణాన్ని తమిళ చిత్రమైన 'ఒరు నాల్ కూతు' ద్వారా ప్రారంభించారు. అనంతరం తెలుగు ప్రేక్షకులకు ఆమెను పరిచయం చేసిన సినిమా 'మెంటల్ మదిలో'. ఆ తర్వాత 'అల వైకుంఠపురములో', 'చిత్రలహరి', 'బ్రోచేవారెవరురా', 'దాస్ కా ధమ్కీ' వంటి విజయవంతమైన సినిమాలలో నటించి, తనకంటూ ప్రత్యేకమైన గుర్తింపు తెచ్చుకున్నారు.