పవన్ కళ్యాణ్ క్రిస్మస్ బహుమతులు… ఆనందంలో ఆ డైరెక్టర్
జనసేన అధ్యక్షుడు పవన్ కళ్యాణ్ అటు రాజకీయాల్లో ఇటు సినిమాల్లో బిజీగా గడుపుతున్నాడు. క్రిష్ దర్శకత్వంలో రూపొందుతున్న పాన్ ఇండియా సినిమా హరిహర వీరమల్లు కోసం ఇటీవల 40రోజుల పాటు షూటింగ్ లో పాల్గొన్నాడు. ఈ షెడ్యూల్ లో సినిమాలోని ప్రధాన యాక్షన్ సన్నివేశాలను తెరకెక్కించారట. అదలా ఉంటే ప్రస్తుతం పవన్ పంపిన క్రిస్మస్ బహుమతులు టాక్ ఆఫ్ ద టౌన్ గా నిలుస్తున్నాయి. ప్రతీ సంవత్సరం వేసవిలో తన తోటలోని మామిడి పండ్లను ఇండస్ట్రీలో తనకు ఇష్టమైన వారికి బహుమతిగా పంపిస్తుంటారన్న సంగతి తెలిసిందే. త్రివిక్రమ్, నితిన్ లకు మామిడి పండ్లు అందినట్లు సోషల్ మీడియా ద్వారా తెలిసింది. ప్రస్తుతం పవన్ కళ్యాణ్ బహుమతుల లిస్టులో క్రిస్మస్ కూడా చేరింది.
ఆనందంలో వేణు శ్రీరామ్
వకీల్ సాబ్ సినిమా దర్శకుడు వేణు శ్రీరామ్ కి పవన్ కళ్యాణ్ నుండి బహుమతి అందింది. గిఫ్ట్ తో పాటు శుభాకాంక్షలు తెలియజేస్తూ కవర్ లెటర్ కూడా పంపారు పవన్ కళ్యాణ్. వేణు శ్రీరామ్ తో పాటు మరికొంత మందికి ఇండస్ట్రీ జనాలకు ఈ బహుమతులు అందాయట. ప్రస్తుతానికి వాళ్ళ పేర్లు బయటకు రాలేదు. వేణు శ్రీరామ్ భార్య ఈ విషయాన్ని సోషల్ మీడియా ద్వారా ప్రకటించింది. పవన్ కళ్యాణ్ నుండి బహుమతులు అందడం ఆనందంగా ఉందని ఆమె తెలిపింది. పవన్ కళ్యాణ్ తో వకీల్ సాబ్ సినిమాకి ముందు, ఎమ్ సీ ఏ, ఓ మై ఫ్రెండ్ చిత్రాలను తెరకెక్కించాడు వేణు శ్రీరామ్.
