తెలుగు సినిమా: ఉస్తాద్ రామ్ తో ధమాకా శ్రీలీల రొమాన్స్ షురూ
ఎనర్జిటిక్ స్టార్ రామ్ పోతినేని ఇస్మార్ట్ శంకర్ సినిమాతో ఉస్తాద్ రామ్ గా మారిపోయాడు. ఐతే ఇస్మార్ట్ విజయం తర్వాత రామ్ ఖాతాలో మరో విజయం చేరలేదు. కరోనా సమయంలో వచ్చిన "రెడ్" సినిమా ఓ మోస్తారుగా అనిపించినా, ది వారియర్ మాత్రం బాక్సాఫీసు వద్ద తేలిపోయింది. ప్రస్తుతం మరో మాస్ మసాలా మూవీతో ప్రేక్షకుల ముందుకు రానున్నాడు రామ్. బోయపాటి శ్రీను దర్శకత్వంలో సినిమా చేస్తున్నాడు ఉస్తాద్ రామ్. షూటింగ్ కూడా ఆల్రెడీ మొదలైంది. ఈ సినిమాలో రామ్ ని ఇంతకుముందు చూడని విధంగా కొత్తగా చూపించబోతున్నాడట బోయపాటి. యాక్షన్ సీక్వెన్సెస్ తో పాటు హాస్యం కూడా ప్రధానంగా ఉండనుందట. అన్ని వర్గాల ప్రేక్షకులకు నచ్చే విధంగా రూపు దిద్దుకుంటుందని అంటున్నారు.
రామ్ సరసన ధమాకా శ్రీలీల
అన్ని హంగులతో రెడీ అవుతోన్న ఈ సినిమాలో ధమాకా హీరోయిన్ శ్రీలీల, రామ్ సరసన నటిస్తుంది. ఇటీవల రవితేజ హీరోగా వచ్చిన ధమాకా సినిమాతో హిట్ అందుకుంది శ్రీలీల. ప్రస్తుతం రామ్ సరసన ఈ సినిమా షూటింగ్ లో జాయిన్ అయ్యిందని వినిపిస్తోంది. ఈ సినిమాను పాన్ ఇండియా రేంజ్ లో విడుదల చేయాలని అనుకుంటున్నారట. శ్రీనివాస సిల్వర్ స్క్రీన్ బ్యానర్ పై రూపొందుతున్న ఈ సినిమాను శ్రీనివాస చిట్టూరి నిర్మిస్తున్నారు. సాంకేతికంగా అత్యుత్తమంగా ఈ సినిమాను తీర్చి దిద్దడానికి ప్లాన్ చేస్తున్నారు. దానిలో భాగంగానే మ్యూజిక్ డైరెక్టర్ గా థమన్ ని ఎంపిక్ చేసారు. ధమాకాతో దుమ్ము దులిపిన శ్రీలీలకు ఈ సినిమా ఎలాంటి ఫలితాన్ని అందిస్తుందో చూడాలి.
