Ramayana Part 1 Review: రణ్‌ బీర్ కపూర్ రామాయణ ఎలా ఉందంటే
ఈ వార్తాకథనం ఏంటి
'రామాయణ' సినిమా అంటేనే అంచనాలు ఆకాశాన్ని తాకుతాయి. అందులోనూ రణ్‌ బీర్ కపూర్ రాముడిగా, సాయి పల్లవి సీతగా, యష్ రావణుడిగా కనిపించడంతో ఈ సినిమాపై మొదటి నుంచే ఆసక్తి పెరిగింది. అయితే తెరపై సినిమా మొదలైన వెంటనే రాముడిని కాకుండా రావణుడిని పరిచయం చేయడం కాస్త ఆశ్చర్యం కలిగిస్తుంది. కానీ కథను గమనిస్తే ఆ నిర్ణయం వెనుక కారణం అర్థమవుతుంది. రావణుడి తపస్సు, బ్రహ్మ ఇచ్చిన వరం, ముల్లోకాలపై అతని ఆధిపత్యం నుంచే రాముడి అవతారానికి కారణం ఏర్పడుతుంది. అందుకే ఈ కథను ముందుగా రావణుడి కోణంలో మొదలుపెట్టడం కొత్తగా అనిపిస్తుంది.
Details
రాముడి ప్రయాణం.. కథకు అసలు బలం
రావణుడి ఆగడాలకు ముగింపు పలకడానికి విష్ణువు రాముడిగా అవతరించడం, దశరథుడి కుమారుడిగా పెరగడం, సీతను వివాహం చేసుకోవడం, ఆ తర్వాత వనవాసానికి వెళ్లడం వంటి కీలక ఘట్టాలను దర్శకుడు పెద్దగా సాగదీయలేదు.
రామాయణం గురించి పూర్తిగా తెలియని ప్రేక్షకుడికి కూడా కథ అర్థమయ్యేలా సన్నివేశాలను వరుసగా తీసుకెళ్లారు.
ముఖ్యంగా రాముడు, సీత మధ్య అనుబంధాన్ని హడావుడి లేకుండా చూపించడం బాగుంది.
స్వయంవరం నుంచి వనవాసం వరకు కథను త్వరగా ముందుకు తీసుకెళ్లడం వల్ల సినిమా ఎక్కడా అనవసరంగా ఆగిపోయినట్టు అనిపించదు.
Details
సీత అపహరణతో మారిన సినిమా మూడ్
శూర్పణఖగా రకుల్ ప్రీత్ సింగ్ ఎంట్రీ ఇచ్చిన తర్వాత కథ ఒక్కసారిగా మరో మలుపు తీసుకుంటుంది.
రాముడిపై ఆమెకు కలిగిన ఆకర్షణ, ఆ తర్వాత జరిగిన పరిణామాలు రావణుడి కోపానికి కారణమవుతాయి. అక్కడి నుంచి సీతను అపహరించే ఘట్టం వరకు సినిమా మరింత సీరియస్‌గా మారుతుంది.
జటాయువు ఎపిసోడ్ కూడా సినిమాలో గుర్తుండిపోయే భాగంగా నిలుస్తుంది. అయితే ఇక్కడే కొంతమంది ప్రేక్షకులకు ఒక చిన్న అసంతృప్తి కలగొచ్చు.
హనుమంతుడి ఎంట్రీ లేకపోవడం, పెద్ద యాక్షన్ బ్లాక్స్‌ కోసం ఎదురుచూసిన వారికి మొదటి భాగం కొంచెం తక్కువగా అనిపించవచ్చు. కానీ సెకండ్ పార్ట్‌కు బలమైన పునాది వేయడమే ఈ భాగం ప్రధాన ఉద్దేశంగా కనిపిస్తుంది.
Details
మూడు గంటల నిడివి.. అయినా బోర్ కొట్టదు
సుమారు 3 గంటల 15 నిమిషాల నిడివి ఉన్న సినిమా ఇది. సాధారణంగా ఇంత నిడివి అంటే కథ ఎక్కడైనా నెమ్మదించిందా అనే అనుమానం వస్తుంది.
కానీ 'రామాయణ పార్ట్ వన్'లో ఆ సమస్య పెద్దగా కనిపించదు. కొన్ని సన్నివేశాలను మరింత కుదించే అవకాశం ఉన్నప్పటికీ, దర్శకుడు కథలోని ముఖ్యమైన ఘట్టాలకు తగినంత సమయం ఇచ్చాడు.
ముఖ్యంగా యుద్ధ సన్నివేశాలు, జటాయువు పోరాటం, శూర్పణఖ ఎపిసోడ్ వంటి భాగాలు ప్రేక్షకుడిని స్క్రీన్‌ వైపు చూస్తూనే ఉండేలా చేస్తాయి.
Details
రణ్బీర్ రాముడిగా.. సాయి పల్లవి సీతగా
రణ్బీర్ కపూర్ రాముడి పాత్రలో ఎక్కడా అతిగా నటించకుండా చాలా సటిల్‌గా కనిపించాడు. అతని లుక్‌, బాడీ లాంగ్వేజ్‌, భావోద్వేగాలు పాత్రకు సరిపోయాయి.
సాయి పల్లవి సీతగా కనిపించిన తీరు కూడా ప్రేక్షకులను ఆకట్టుకుంటుంది. ఆమె పాత్రలో ప్రశాంతత, గౌరవం రెండూ కనిపిస్తాయి.
లక్ష్మణుడిగా రవి దూబె తన పరిధిలో మంచి పెర్ఫార్మెన్స్ ఇచ్చాడు. ఇక యష్ విషయానికి వస్తే మాత్రం సినిమా మొత్తంలో అతని రావణుడి పాత్ర ప్రత్యేకంగా నిలుస్తుంది. యష్ స్క్రీన్‌పై కనిపించినప్పుడల్లా పాత్రకు ఒక ప్రత్యేకమైన శ్వాగ్‌ కనిపిస్తుంది.
Details
అసలు హీరో.. తెరపై కనిపించిన విజువల్ ప్రపంచం
'రామాయణ'లో కథతో పాటు ప్రేక్షకుడిని ఎక్కువగా ఆకట్టుకునేది దాని విజువల్ ప్రపంచం. DNEG రూపొందించిన VFXలో భారీ సెట్లు, రాక్షసులు, వింత జీవులు, యుద్ధ సన్నివేశాలు చాలా సహజంగా కనిపిస్తాయి.
ముఖ్యంగా రావణుడి ఎంట్రీ, శూర్పణఖ ఎపిసోడ్‌లోని యాక్షన్, క్లైమాక్స్‌లో జటాయువు పోరాటం సాంకేతికంగా బలంగా నిలిచాయి.
ఎక్కడా VFX ప్రత్యేకంగా కనిపించకుండా సన్నివేశంలో భాగమైపోవడం సినిమాకు ప్లస్. హాలీవుడ్ స్థాయి విజువల్ ట్రీట్ ఇవ్వాలన్న ప్రయత్నం తెరపై స్పష్టంగా కనిపిస్తుంది.
Details
రెహమాన్‌, హన్స్ జిమ్మర్ సంగీతం ఇచ్చిన బలం
విజువల్స్‌కు తోడు ఏ.ఆర్. రెహమాన్‌, హన్స్ జిమ్మర్ అందించిన సంగీతం సినిమాకు మరో స్థాయి తీసుకొచ్చింది.
ప్రతి సన్నివేశాన్ని మరింత ఎలివేట్ చేసేలా BGM పనిచేస్తుంది. ముఖ్యంగా రావణుడి ఎంట్రీ, యుద్ధ ఘట్టాలు, భావోద్వేగ సన్నివేశాల్లో బ్యాక్‌గ్రౌండ్ స్కోర్ ప్రభావం స్పష్టంగా తెలుస్తుంది.
భారీ విజువల్స్‌కు తగ్గట్టుగా సంగీతాన్ని ఉపయోగించడంతో సినిమా ఒక సాధారణ పౌరాణిక చిత్రంలా కాకుండా అంతర్జాతీయ స్థాయి సినిమాటిక్ అనుభూతిని ఇస్తుంది.
Details
మొత్తంగా ఎలా ఉంది?
'రామాయణ పార్ట్ వన్'ను ఒకే మాటలో చెప్పాలంటే.. ఇది ముగిసిన కథ కంటే మొదలైన మహా ప్రయాణంలా అనిపిస్తుంది.
రాముడి జననం నుంచి సీత అపహరణ వరకు కీలక ఘట్టాలను వేగంగా పరిచయం చేస్తూ, రెండో భాగంపై ఆసక్తిని పెంచడంలో సినిమా సక్సెస్ అయ్యింది.
హనుమంతుడి ఎంట్రీ లేకపోవడం కొందరికి మైనస్‌గా అనిపించినా, పోస్ట్ క్రెడిట్స్‌లో ఇచ్చిన హింట్ రెండో భాగంపై అంచనాలను పెంచుతుంది.
నటీనటుల పెర్ఫార్మెన్స్, VFX, యాక్షన్, BGM కలిసి సినిమాను గ్రాండ్ ఎక్స్‌పీరియన్స్‌గా నిలబెట్టాయి.
మొత్తంగా, భారీ అంచనాలతో వచ్చిన 'రామాయణ' మొదటి భాగం ఆ అంచనాలను చాలా వరకు అందుకుంటూ, అసలు కథ కోసం రెండో భాగం వైపు ప్రేక్షకులను ఆసక్తిగా చూసేలా చేస్తుంది.