Ram Gopal Varma: రాప్తాడు ఘటనతో సినిమాల్లో హింసపై చర్చ.. ఆర్జీవీ ఏమన్నారంటే?
ఈ వార్తాకథనం ఏంటి
సినిమాల్లో హింసాత్మక సన్నివేశాలు యువతపై ప్రభావం చూపుతున్నాయనే చర్చ మరోసారి తెరపైకి వచ్చింది. ఇటీవల జరిగిన ఓ దాడి ఘటన నేపథ్యంలో సినిమాల్లో హింసను చూపించడంపై విమర్శలు వెల్లువెత్తుతున్నాయి. ఈ నేపథ్యంలో ప్రముఖ దర్శకుడు రామ్‌గోపాల్‌ వర్మ స్పందించారు. సినిమాల్లో హింసను ప్రదర్శించడం వల్ల సమాజంలో నేరాలు పెరుగుతున్నాయని ఆరోపించడం సరైనది కాదని అభిప్రాయపడ్డారు. సినిమాలపై వస్తున్న విమర్శలు సరైన దిశలో లేవని పేర్కొన్నారు. ఈ మేరకు ఆదివారం తన ఎక్స్‌ ఖాతాలో ఓ పోస్టు చేశారు. ''కిడ్నాప్‌లు పెరుగుతున్నాయని రామాయణాన్ని నిందించడం ఎంత తప్పో.. హింస పెరుగుతోందని సినిమాలను నిందించడం కూడా అంతే తప్పు'' అని ఆర్జీవీ వ్యాఖ్యానించారు. సమాజంలో జరుగుతున్న నేరాలకు సినిమాలను బాధ్యులుగా చేయడాన్ని ఆయన తప్పుబట్టారు.
వివరాలు
పాఠశాలలో విద్యార్థినిపై రంపం దాడి..
అనంతపురం జిల్లా రాప్తాడులోని ఓ పాఠశాలలో ఇటీవల జరిగిన దాడి ఘటన ఈ చర్చకు కారణమైంది.
21 ఏళ్ల యువకుడు పదో తరగతి తరగతి గదిలోకి ప్రవేశించి 15 ఏళ్ల బాలికపై ఎలక్ట్రిక్‌ రంపంతో దాడి చేశాడు.
ఆమెను కాపాడేందుకు ప్రయత్నించిన మరో విద్యార్థినికి కూడా గాయాలయ్యాయి. ప్రాథమిక పోలీసు విచారణ ప్రకారం.. నిందితుడు బాధిత బాలికకు బంధువుగా తెలుస్తోంది.
కొంతకాలంగా ఆమెను వేధిస్తున్నట్లు సమాచారం.
ఈ దాడిలో గాయపడిన బాలికకు బెంగళూరులోని మణిపాల్‌ ఆసుపత్రిలో చికిత్స అందిస్తున్నారు. ప్రస్తుతం ఆమె ఆరోగ్య పరిస్థితి నిలకడగా ఉన్నట్లు సమాచారం.
వివరాలు
'యానిమల్‌' సన్నివేశంపై విమర్శలు..
ఈ ఘటన తర్వాత సందీప్‌ రెడ్డి వంగా దర్శకత్వంలో రణ్‌బీర్‌ కపూర్‌ నటించిన 'యానిమల్‌' సినిమాలోని ఓ సన్నివేశంపై సోషల్‌ మీడియాలో తీవ్ర చర్చ మొదలైంది.
ఆ సన్నివేశంలో రణ్‌బీర్‌ కపూర్‌ ఏకే-47 తుపాకీతో పాఠశాల తరగతి గదిలోకి ప్రవేశిస్తాడు. ఈ సన్నివేశాన్ని ప్రస్తావిస్తూ పలువురు సినిమాల్లో హింసను గొప్పగా చూపిస్తున్నారని విమర్శిస్తున్నారు.
మరికొందరు హింసను పురుషత్వానికి చిహ్నంగా చిత్రీకరించడం వల్ల యువతపై ప్రతికూల ప్రభావం పడే అవకాశం ఉందని ఆందోళన వ్యక్తం చేస్తున్నారు.
ముఖ్యంగా పాఠశాల నేపథ్యంలో హింసాత్మక సన్నివేశాలను చూపించడంపై అభ్యంతరాలు వ్యక్తమవుతున్నాయి.
వివరాలు
గతంలోనూ సందీప్‌ రెడ్డి వంగాకు మద్దతు..
దర్శకుడు రామ్‌గోపాల్‌ వర్మకు సందీప్‌ రెడ్డి వంగాతో మంచి అనుబంధం ఉంది. గతంలోనూ ఆయన సందీప్‌ రెడ్డి వంగా సినిమాల శైలిని పలుమార్లు ప్రశంసించారు. ఆయన దర్శకత్వ ప్రతిభకు మద్దతుగా నిలిచారు.
ఇప్పుడు 'యానిమల్‌' సినిమాలోని హింసాత్మక సన్నివేశాలపై విమర్శలు వస్తున్న సమయంలోనూ ఆర్జీవీ తన అభిప్రాయాన్ని స్పష్టంగా వెల్లడించారు.
సినిమాల్లో హింసను చూపించడాన్ని సమాజంలో పెరుగుతున్న నేరాలకు నేరుగా ముడిపెట్టడం సరికాదని తన వ్యాఖ్యల ద్వారా పేర్కొన్నారు.