Yellamma: దేవిశ్రీప్రసాద్‌ 'ఎల్లమ్మ' రిలీజ్‌ డేట్‌ ఫిక్స్‌.. ఎప్పుడంటే?
ఈ వార్తాకథనం ఏంటి
ప్రముఖ సంగీత దర్శకుడు దేవిశ్రీప్రసాద్‌ కథానాయకుడిగా పరిచయం అవుతున్న చిత్రం 'ఎల్లమ్మ'. ఈ సినిమా వచ్చే ఏడాది మార్చి 5న ప్రేక్షకుల ముందుకు రానుంది. 'బలగం' చిత్రంతో ఘన విజయాన్ని అందుకున్న వేణు ఎల్దండి ఈ సినిమాకు దర్శకత్వం వహిస్తున్నారు. శ్రీవెంకటేశ్వర క్రియేషన్స్‌ పతాకంపై శిరీష్‌ నిర్మిస్తుండగా.. దిల్‌రాజు సమర్పకులుగా వ్యవహరిస్తున్నారు. దసరా పండగను పురస్కరించుకుని చిత్ర నిర్మాతలు 'ఎల్లమ్మ' విడుదల తేదీని అధికారికంగా ప్రకటించారు. దీంతో దేవిశ్రీప్రసాద్‌ను హీరోగా వెండితెరపై చూడాలనుకుంటున్న అభిమానుల్లో ఈ సినిమాపై ఆసక్తి నెలకొంది.
వివరాలు
సంస్కృతి, సంప్రదాయాల నేపథ్యంలో కథ
సంస్కృతి, సంప్రదాయాలతో ముడిపడిన కథాంశంతో 'ఎల్లమ్మ' తెరకెక్కుతోంది. భావోద్వేగాలకు పెద్దపీట వేస్తూ దర్శకుడు వేణు ఎల్దండి ఈ చిత్రాన్ని రూపొందిస్తున్నారు.
'బలగం'తో ప్రేక్షకులను ఆకట్టుకున్న ఆయన.. మరోసారి భావోద్వేగభరితమైన కథతో ప్రేక్షకుల ముందుకు రానున్నారు.
ఈ సినిమాలో దేవిశ్రీప్రసాద్‌ 'పర్షి' అనే యువకుడి పాత్రలో కనిపించనున్నారు. కథానాయకుడిగా నటించడంతోపాటు ఈ చిత్రానికి ఆయనే సంగీతాన్ని కూడా అందిస్తున్నారు.
దీంతో నటన, సంగీతం రెండింటిలోనూ దేవిశ్రీప్రసాద్‌ తన ప్రతిభను చూపించనున్నారు.
వివరాలు
ఐదు భాషల్లో 'ఎల్లమ్మ'
తెలుగు ప్రేక్షకులతోపాటు ఇతర భాషల వారినీ ఆకట్టుకునేలా 'ఎల్లమ్మ'ను రూపొందిస్తున్నారు.
ఈ సినిమా తెలుగుతోపాటు హిందీ, తమిళం, కన్నడ, మలయాళ భాషల్లోనూ విడుదల కానుంది.
వచ్చే ఏడాది మార్చి 5న ప్రేక్షకుల ముందుకు రానున్న ఈ చిత్రంపై సినీ అభిమానుల్లో ఆసక్తి నెలకొంది.