Anupam Kher: దలేర్ మెహందీకి అనుపమ్ ఖేర్ మద్దతు.. ఆయన మద్యం తాగరంటూ వ్యాఖ్యలు!
ఈ వార్తాకథనం ఏంటి
ప్రముఖ పంజాబీ గాయకుడు దలేర్ మెహందీకి ప్రముఖ నటుడు అనుపమ్ ఖేర్ మద్దతుగా నిలిచారు. దలేర్ మెహందీ తనకు చాలా ఏళ్లుగా తెలుసునని, ఆయన మద్యం సేవించరని అనుపమ్ ఖేర్ వెల్లడించారు. ఇటీవల ఉత్తరాఖండ్‌లో జరిగిన ఓ కార్యక్రమంలో దలేర్ మెహందీకి చేదు అనుభవం ఎదురైన విషయం తెలిసిందే. మద్యం తాగి ప్రదర్శన ఇస్తున్నారంటూ ఉత్తరాఖండ్ మంత్రి సుబోధ్ ఉనియాల్ వేదికపైనే గాయకుడిపై ఆరోపణలు చేయడం వివాదానికి దారితీసింది. ఈ ఘటనపై స్పందించిన అనుపమ్ ఖేర్.. దలేర్ మెహందీకి అండగా నిలిచారు.
వివరాలు
దలేర్ మెహందీ మద్యం సేవించరు: అనుపమ్ ఖేర్
దలేర్ మెహందీ తనకు చాలా ఏళ్లుగా తెలుసునని అనుపమ్ ఖేర్ తెలిపారు. ''నాకు తెలిసినంత వరకు దలేర్ మెహందీ మద్యం సేవించరు.
నేను కలిసిన మంచి మనుషుల్లో ఆయన కూడా ఒకరు. గత రెండు, మూడేళ్లుగా ఆయన ఆరోగ్యం బాగోలేదు. బహుశా కార్యక్రమ నిర్వాహకులకు ముందుగానే మాట ఇచ్చి ఉండటంతో.. ప్రదర్శనకు రాకుండా ఉండలేకపోయి ఉంటారు.
ఇచ్చిన మాటకు కట్టుబడి ఉండటం ఆయన తన వృత్తిపట్ల చూపించే నిబద్ధతకు నిదర్శనం'' అని అనుపమ్ ఖేర్ పేర్కొన్నారు.
సోషల్ మీడియాలో వైరల్ అవుతున్న వీడియోను చూసి తనకు చాలా బాధ కలిగిందని ఆయన చెప్పారు.
బహిరంగ వేదికపై ఎవరూ మరొకరితో అలా మాట్లాడకూడదని అభిప్రాయపడ్డారు. ఒక గాయకుడిని అందరి ముందు విమర్శించడం సరికాదని అన్నారు.
వివరాలు
మంత్రికి అనుపమ్ ఖేర్ సూచన..
ఈ ఘటనపై ఉత్తరాఖండ్ మంత్రి సుబోధ్ ఉనియాల్‌ను ఉద్దేశించి కూడా అనుపమ్ ఖేర్ స్పందించారు.
దలేర్ మెహందీ ప్రదర్శనపై మీకు కోపం ఉండొచ్చు. కానీ అందరి ముందు వేదికపైకి వెళ్లి ఆయనను ఆ విధంగా అవమానించాల్సిన అవసరం ఏముంది? అదే విషయాన్ని ఆయనతో విడిగా కూర్చొని, గౌరవంగా కూడా చెప్పొచ్చు కదా అని వ్యాఖ్యానించారు.
దలేర్ మెహందీ ఇలాంటి పరిస్థితిని ఎదుర్కోవాల్సి రావడం తనకు ఎంతో బాధ కలిగించిందని అనుపమ్ ఖేర్ తెలిపారు.
ఈ ఘటనపై విచారం వ్యక్తం చేస్తూ మంత్రి తరఫున దలేర్ మెహందీకి క్షమాపణలు కూడా చెప్పారు.