ఆర్ఆర్ఆర్: ఆస్కార్ పొందే అవకాశం ఉన్న జాబితాలో ఎన్టీఆర్ పేరు
ప్రపంచ సినిమా అవార్డ్స్ అన్నింటిలో ఆస్కార్ స్థానం ప్రత్యేకం. ఏ దేశ కళాకారులైనా ఒక్కసారైనా ఆస్కార్ అందుకోవాలని ఆశపడుతుంటారు. ఆస్కార్ కోసమే సినిమాలు చేస్తుంటారు కూడా. అంతటి గొప్పదనం ఉన్న ఆస్కార్ అవార్డ్ ఎన్టీఆర్ అభిమానులను ఊరిస్తోంది. రాజమౌళి తెరకెక్కించిన ఆర్ఆర్ఆర్ సినిమా, ప్రపంచ వ్యాప్తంగా ప్రశంసలు అందుకుంది. ఇంకా అందుకుంటూనే ఉంది. పశ్చిమ దేశాలైతే ఆర్ఆర్ఆర్ సినిమాను నెత్తిన పెట్టుకుంటున్నాయి. ఎన్ కోర్ ల రూపంలో మళ్ళీ మళ్ళీ థియేటర్లలో వేసుకుని మరీ చూస్తున్నారు. నిన్నటికి నిన్న 98సెకండ్లలో 932టికెట్ల అమ్మకాలు అమెరికాలోని ఐమ్యాక్స్ చైనీస్ థియేటర్ లో జరిగాయంటే ఆర్ఆర్ఆర్ ప్రభావం పశ్చిమ దేశాల మీద ఎంత ఉందో అర్థం చేసుకోవచ్చు.
వెరైటీ మ్యాగజైన్ ప్రిడిక్షన్ లిస్ట్ లో ఎన్టీఆర్ పేరు
ప్రపంచ వ్యాప్తంగా ప్రశంసలు అందుకుంటున్న ఆర్ఆర్ఆర్ కి అవార్డులు కూడా అదే రేంజ్ లో ఉంటున్నాయి. ఆల్రెడీ గోల్డెన్ గ్లోబ్ అవార్డ్ కి రెండు విభాగాల్లో నామినేట్ అయ్యింది. ప్రస్తుతం ఆస్కార్ అవార్డ్స్ కి కూడా నామినేట్ అవుతుందని అంచనా వేస్తున్నారు. బెస్ట్ పిక్చర్, బెస్ట్ డైరెక్టర్, బెస్ట్ యాక్టర్ విభాగాల్లో నామినేట్ అయ్యేఅవకాశం ఉందని వెరైటీ అనే మ్యాగజైన్ ప్రెడిక్షన్ లిస్ట్ ని విడుదల చేసింది. బెస్ట్ యాక్టర్ విభాగంలో పదిమందిని చేర్చింది వెరైటీ మ్యాగజైన్. ఆ పదిమందిలో ఎన్టీఆర్ పేరు కూడా ఉంది. దీంతో ఎన్టీఆర్ అభిమానులు ఆనందంగా ఉన్నారు. మరి వెరైటీ మ్యాగజైన్ చెప్పినట్టు ఆస్కార్ నామినేషన్లలో ఎన్టీఆర్ పేరు ఉంటుందో లేదో చూడాలి.
