Song Jae Rim: దక్షిణ కొరియా నటుడు సాంగ్ జే రిమ్ కన్నుమూత
దక్షిణ కొరియాకు చెందిన ప్రముఖ నటుడు సాంగ్ జే రిమ్ (39) తన నివాసంలో మృతి చెందారు. సాంగ్ జే రిమ్ మరణానికి సంబంధించి ప్రస్తుతం స్పష్టమైన కారణం వెల్లడికాలేదు. 'ది మూన్ ఎంబ్రేసింగ్ ది సన్', 'క్వీన్ వూ' వంటి కే-డ్రామాల్లో కీలక పాత్రలు పోషించిన సాంగ్ జే రిమ్ తన ప్రతిభతో మంచి గుర్తింపు పొందారు. సాంగ్ జే రిమ్ మరణ వార్త విని ఆయన అభిమానులు తట్టుకోలేకపోతున్నారు. తమ ప్రియ నటుడు ఇకపై ఈ ప్రపంచంలో లేరన్నది నమ్మలేకపోతున్నామని వారు సోషల్ మీడియాలో ఆవేదన వ్యక్తం చేస్తున్నారు. ప్రపంచవ్యాప్తంగా ఉన్న ఆయన అభిమానులు తీవ్ర శోకంలో మునిగిపోయారు.
'ది మూన్ ఎంబ్రేసింగ్ ది సన్' ద్వారా పరిశ్రమలోకి..
మీడియా ద్వారా అందిన సమాచారం ప్రకారం, పోలీసులు సాంగ్ జే రిమ్ మృతిపై దర్యాప్తు ప్రారంభించారు. అతని ఇంటి నుంచి ఒక సూసైడ్ నోట్ అందుకున్నట్లు సమాచారం. ఈ ఆధారాలతో అతను ఆత్మహత్య చేసుకున్నట్లు పోలీసులు అనుమానిస్తున్నారు. అయితే, దీనిపై సియోల్ పోలీసులు, జే రిమ్ కుటుంబం ఇంకా అధికారికంగా ఎలాంటి వివరణ ఇవ్వలేదు. సాంగ్ జే రిమ్ అంత్యక్రియలు నవంబర్ 14న జరగనున్నాయి. అతని మృతిపై తీవ్ర విషాదాన్ని వ్యక్తం చేస్తూ అభిమానులు సోషల్ మీడియాలో సంతాప సందేశాలు అందిస్తున్నారు. 2009లో నటన ప్రారంభించిన సాంగ్ జే రిమ్,2011లో 'ది మూన్ ఎంబ్రేసింగ్ ది సన్' ద్వారా పరిశ్రమలోకి అడుగు పెట్టాడు. ఆ తర్వాత తన నటనతో పెద్ద గుర్తింపు సాధించుకున్నాడు.
