సల్మాన్ ఖాన్ కు మరోసారి బెదిరింపులు: ఏప్రిల్ 30వ తేదీన చంపేస్తామంటూ కాల్స్
ఈ వార్తాకథనం ఏంటి
బాలీవుడ్ నటుడు సల్మాన్ ఖాన్ కు మరోసారి చావు బెదిరింపులు వచ్చాయి. నిన్నరాత్రి 9గంటలకు ముంబై పోలీస్ కంట్రోల్ రూమ్ కి బెదిరింపు కాల్ వచ్చినట్లు సమాచారం. రాకీ భాయ్ పేరుతో జోధ్ పూర్ నుండి సల్మాన్ ఖాన్ కు బెదిరింపు కాల్ వచ్చిందని, ఏప్రిల్ 30వ తేదీన దబాంగ్ యాక్టర్ సల్మాన్ ఖాన్ ని చంపేస్తామని బెదిరించారు. ప్రస్తుతం ఈ కాలర్ పై కేస్ నమోదైంది. పోలీసులు ఇన్వెస్టిగేషన్ మొదలెట్టారు. గతంలోనూ సల్మాన్ ఖాన్ కు ఇలాంటి బెదిరింపులే వచాయి. అప్పుడు ఈ-మెయిల్ రూపంలో వచ్చాయి. ఇప్పుడు కాల్ చేసి బెదిరించారు. తనకు వస్తున్న చావు బెదిరింపుల నేపథ్యంలో, బుల్లెట్ ప్రూఫ్ కారును కొన్నాడు సల్మాన్. నిస్సాన్ పాట్రోల్ SUVని కొనుక్కున్నాడు.
Details
ఇండియన్ మార్కెట్లో దొరకని నిస్సాన్ పాట్రోల్ SUV
నిస్సాన్ పాట్రోల్ SUV కారు ఇండియన్ మార్కెట్లోకి ఇంతవరకూ రాలేదు. ప్రత్యేకంగా తనకోసమే దిగుమతి చేయించుకున్నాడు సల్మాన్ ఖాన్. ప్రస్తుతం సల్మాన్ ఖాన్ నుండి కిసీ కా భాయ్ కిసీ కీ జాన్ అనే సినిమా వస్తోంది. ఈ చిత్ర ట్రైలర్ ని నిన్న సాయంత్రం ముంబైలో రిలీజ్ చేసారు. ట్రైలర్ ఈవెంట్ లో సల్మాన్ ఖాన్, పూజా హెగ్డే, తదితరులు అందరూ పాల్గొన్నారు. కిసీ కా భాయ్ కిసీ కీ జాన్ సినిమా గురించి: తమిళ చిత్రమైన వీరమ్ సినిమాకు హిందీ రీమేక్ గా ఈ సినిమా రూపొందింది. వీరమ్ సినిమాను తెలుగులో కాటమ రాయుడు గా రీమేక్ చేసారు. ఏప్రిల్ 21వ తేదీన ఈ సినిమా రిలీజ్ అవుతుంది.