Andhra Pradesh: అత్యధిక కర్మాగారాలున్న రాష్ట్రాల్లో ఏపీకి 6వ స్థానం.. టాప్‌లో తమిళనాడు
ఈ వార్తాకథనం ఏంటి
దేశంలోని పెద్ద రాష్ట్రాల్లో కర్మాగారాల సంఖ్య పరంగా ఆంధ్రప్రదేశ్‌ ఆరో స్థానంలో నిలిచింది. 2024-25 పారిశ్రామిక రంగానికి సంబంధించిన వార్షిక సర్వే నివేదికను కేంద్ర గణాంకాలు, అమలు మంత్రిత్వ శాఖ (MoSPI) విడుదల చేసింది. ఈ నివేదిక ప్రకారం దేశవ్యాప్తంగా ఉన్న మొత్తం కర్మాగారాల్లో ఆంధ్రప్రదేశ్‌లో 15,602 ఉన్నాయి. కర్మాగారాల సంఖ్యలో తమిళనాడు అగ్రస్థానం దేశంలో అత్యధిక కర్మాగారాలు ఉన్న రాష్ట్రాల్లో తమిళనాడు 41,221 కర్మాగారాలతో మొదటి స్థానంలో ఉంది. 33,084 కర్మాగారాలతో గుజరాత్‌ రెండో స్థానంలో, 27,879 కర్మాగారాలతో మహారాష్ట్ర మూడో స్థానంలో నిలిచాయి. ఆంధ్రప్రదేశ్‌లో 15,602 కర్మాగారాలు ఉండగా.. తెలంగాణలో 13,937 కర్మాగారాలు ఉన్నాయి. దీంతో తెలంగాణ ఏడో స్థానంలో నిలిచింది.
వివరాలు
తయారీ రంగంలో గణనీయమైన వృద్ధి
2024-25 ఆర్థిక సంవత్సరంలో దేశ తయారీ రంగం గణనీయమైన పురోగతి సాధించినట్లు వార్షిక సర్వే నివేదిక వెల్లడించింది.
అంతకుముందు ఏడాదితో పోలిస్తే పారిశ్రామిక ఉత్పత్తి 7.81శాతం పెరిగింది.
ఇదే సమయంలో తయారీ రంగంలో ఉపాధి 7.19శాతం,వేతనాలు 12.08 శాతం, మూలధన పెట్టుబడులు 11.10 శాతం, నికర ఆదాయం 9.68 శాతం పెరిగాయి. నికర లాభంలోనూ 7.73 శాతం వృద్ధి నమోదైంది.
ఈ రంగాలదే కీలక వాటా
బేసిక్‌ మెటల్స్‌, మోటారు వాహనాలు, రసాయనాలు, రసాయన ఉత్పత్తులు, ఫార్మాస్యూటికల్స్‌, ఆహార ఉత్పత్తుల పరిశ్రమలు దేశ తయారీ రంగంలో కీలకంగా నిలిచాయి.
ఈ ఆరు విభాగాలు కలిపి దేశ తయారీ రంగం మొత్తం స్థూల విలువ జోడింపులో (GVA) 45 శాతానికి పైగా వాటాను అందించాయి.
వివరాలు
ఉపాధి కల్పనలో ఐదు రాష్ట్రాలదే 56 శాతం వాటా
తయారీ రంగంలో ఉపాధి కల్పన పరంగా తమిళనాడు, మహారాష్ట్ర, గుజరాత్‌, ఉత్తరప్రదేశ్‌, హరియాణ రాష్ట్రాలు దేశంలో తొలి ఐదు స్థానాల్లో నిలిచాయి.
దేశవ్యాప్తంగా తయారీ రంగం ద్వారా లభించిన మొత్తం ఉపాధిలో ఈ ఐదు రాష్ట్రాల వాటా 56 శాతంగా ఉందని నివేదిక పేర్కొంది.
పెరిగిన కర్మాగారాలు, సంస్థల సంఖ్య
దేశవ్యాప్తంగా కర్మాగారాలు, సంస్థల సంఖ్య కూడా పెరిగింది. 2023-24లో మొత్తం 2.60 లక్షల సంస్థలు, కర్మాగారాలు ఉండగా.. 2024-25 నాటికి వాటి సంఖ్య 2.67 లక్షలకు చేరింది.
అంటే ఏడాది వ్యవధిలో దేశ పారిశ్రామిక రంగంలో నమోదైన సంస్థలు, కర్మాగారాల సంఖ్యలో గణనీయమైన పెరుగుదల నమోదైంది.