PSR Anjaneyulu: సీనియర్ ఐపీఎస్ అధికారి పీఎస్సార్‌కు మరో ఎదురుదెబ్బ.. మరో కేసు నమోదు
ఈ వార్తాకథనం ఏంటి
సీనియర్ ఐపీఎస్ అధికారి పీఎస్సార్ ఆంజనేయులకు మళ్లీ ఎదురుదెబ్బ తగిలింది.
ఇప్పటికే ముంబైకి చెందిన నటి కాదాంబరి జిత్వానీ వేధింపుల కేసులో అరెస్ట్ అయ్యి, ప్రస్తుతం సీఐడీ అధికారులు కస్టడీలో దర్యాప్తు చేపట్టిన నేపథ్యంలో తాజాగా ఆయనపై మరో కేసు నమోదైంది.
ఈసారి మాత్రం ఆరోపణలు మరింత తీవ్రమైనవిగా మారాయి. ఏపీపీఎస్సీ గ్రూప్-1 ప్రధాన పరీక్ష జవాబు పత్రాల మూల్యాంకనంలో అవకతవకలు జరిగాయన్న ఆరోపణలతో పాటు, నిధుల దుర్వినియోగం కూడా జరిగిందని వచ్చిన ఫిర్యాదులపై పోలీసులు కేసు నమోదు చేశారు.
పీఎస్సార్ ఆంజనేయులు ఏపీపీఎస్సీ ప్రధాన కార్యదర్శిగా ఉన్న సమయంలో ఈ అక్రమాలు జరిగినట్లు సమాచారం.
Details
మూడు కేసులు నమోదు
ఈ ఘటనపై స్పందించిన అధికారులు, పీఎస్సార్‌పై భారత దండన సంహితాలో 409 (భద్రతా బాధ్యతల దుర్వినియోగం), 420 (మోసం) సెక్షన్ల కింద కేసు నమోదు చేశారు.
ఇప్పటికే పీఎస్సార్‌పై సినీనటి జిత్వానీ వేధింపుల కేసు, ఎంపీ రఘురామ కృష్ణంరాజుపై కస్టోడియల్ టార్చర్‌ కేసులు నమోదయ్యాయని తెలిసిందే.
ఇప్పుడు తాజా ఏపీపీఎస్సీ అక్రమాల కేసుతో కలిపి ఆయనపై మొత్తం మూడు కేసులు నమోదవడం తీవ్ర చర్చనీయాంశంగా మారింది.
సీనియర్ స్థాయిలో ఉన్న ఐపీఎస్ అధికారి పీఎస్సార్ ఆంజనేయులు వరుసగా వివాదాస్పద కేసుల్లో ఇరుక్కోవడం పోలీసు వ్యవస్థపై నమ్మకాన్ని కదిలించే అంశంగా మారుతోంది.
ఈ పరిణామాలపై సంబంధిత శాఖలు మరింత లోతుగా దర్యాప్తు జరుపుతున్నట్టు సమాచారం.