AP Local Body Elections: రిజర్వేషన్లే ఆలస్యం.. ఏపీలో స్థానిక ఎన్నికలకు అన్ని ఏర్పాట్లు పూర్తి
ఈ వార్తాకథనం ఏంటి
ఆంధ్రప్రదేశ్‌లో స్థానిక సంస్థల ఎన్నికలకు అధికారులు సన్నాహాలు దాదాపు పూర్తి చేశారు. 100 పట్టణ స్థానిక సంస్థలు, 13,313 గ్రామ పంచాయతీలు, 9,983 ఎంపీటీసీ, 661 జడ్పీటీసీ స్థానాలకు ఎన్నికలు నిర్వహించేందుకు అవసరమైన ఏర్పాట్లు సిద్ధమయ్యాయి. ఓటర్ల జాబితాలు, పోలింగ్‌ కేంద్రాలు, బ్యాలెట్‌ బాక్సుల ఏర్పాట్లపై అధికారులు ఇప్పటికే చర్యలు చేపట్టారు. అయితే ఆయా స్థానాలకు రిజర్వేషన్లు ఖరారు కావాల్సి ఉండటంతో ఎన్నికల నోటిఫికేషన్‌ జారీ ప్రక్రియ నిలిచింది.
వివరాలు
ఓటర్ల జాబితాలు సిద్ధం
రాష్ట్ర ఎన్నికల సంఘం ఆదేశాల మేరకు పురపాలక, పంచాయతీరాజ్‌ శాఖలు ఓటర్ల జాబితాల ప్రచురణ ప్రక్రియను పూర్తి చేశాయి.
వాటి ఆధారంగా ఎస్సీ, ఎస్టీ, బీసీ, మహిళా ఓటర్ల వివరాలను గుర్తించే ప్రక్రియను కూడా చేపట్టారు.
ముఖ్యంగా పట్టణ స్థానిక సంస్థల్లో రిజర్వేషన్ల కోసం సెప్టెంబరు 8 నుంచి 21 వరకు ప్రత్యేకంగా వర్గాల వారీ ఓటర్ల గుర్తింపు చేపట్టారు.
పోలింగ్‌ కేంద్రాల ఏర్పాటుతో పాటు ఎన్నికల నిర్వహణకు అవసరమైన సిబ్బందిని కూడా సిద్ధం చేస్తున్నారు.
ఎన్నికల ప్రక్రియకు సంబంధించిన వివరాలను అధికారులు రాష్ట్ర ఎన్నికల సంఘానికి నివేదించారు.
రిజర్వేషన్ల ప్రక్రియ పూర్తయిన వెంటనే నోటిఫికేషన్‌ విడుదల చేసేందుకు ఎన్నికల సంఘం సిద్ధంగా ఉంది.
వివరాలు
23 పట్టణ సంస్థలు, 38 పంచాయతీలపై కోర్టు కేసులు
కోర్టుల్లో పెండింగ్‌లో ఉన్న కేసుల కారణంగా మరో 23 పట్టణ స్థానిక సంస్థలు, 38 గ్రామ పంచాయతీల్లో ఎన్నికల ఏర్పాట్లు తదుపరి దశలో చేపట్టనున్నారు.
సంబంధిత న్యాయపరమైన అంశాలు పరిష్కారమైన తర్వాత ఆయా సంస్థల్లో ఎన్నికల ప్రక్రియను ముందుకు తీసుకెళ్లే అవకాశం ఉంది.
2026లో స్థానిక సంస్థల ఎన్నికలు నిర్వహించాల్సిన అవసరం ఉన్నట్లు కేంద్ర పంచాయతీరాజ్‌ శాఖ గణాంకాలు కూడా పేర్కొంటున్నాయి.
వివరాలు
అక్టోబరు-డిసెంబరులో ఎన్నికలు పూర్తి చేసేలా..
మున్సిపల్‌, పంచాయతీరాజ్‌ సంస్థలకు అక్టోబరు నుంచి డిసెంబరు మధ్య ఎన్నికలు పూర్తి చేసి, కొత్త ఏడాది ప్రారంభం నాటికి కొత్త పాలకవర్గాలను ఏర్పాటు చేయాలన్న లక్ష్యంతో ప్రభుత్వం ఏర్పాట్లు వేగవంతం చేసింది.
న్యాయపరమైన అంశాలను అధిగమించి రిజర్వేషన్ల ప్రక్రియను పూర్తి చేయాలని ప్రభుత్వం భావిస్తోంది.
రిజర్వేషన్లు ఖరారైన వెంటనే ఎన్నికల నోటిఫికేషన్‌ జారీకి మార్గం సుగమం కానుంది.
అయితే ప్రస్తుతం రాష్ట్ర ఎన్నికల సంఘం పట్టణ స్థానిక సంస్థల ఎన్నికలకు అధికారిక పోలింగ్‌ తేదీలను ప్రకటించలేదు.
వివరాలు
ఎన్నికల సిబ్బందికి శిక్షణ
ఎన్నికల నోటిఫికేషన్‌ త్వరలో వెలువడే అవకాశం ఉందన్న సమాచారంతో రాష్ట్ర పురపాలక, పట్టణాభివృద్ధి శాఖ క్షేత్రస్థాయిలో అధికారులను, కమిషనర్లను, ఎన్నికల సిబ్బందిని సమాయత్తం చేస్తోంది.
ఇందులో భాగంగా ప్రాంతీయ స్థాయి సమావేశాలు నిర్వహిస్తున్నారు. విశాఖపట్నంలో తొలి ప్రాంతీయ సదస్సు ప్రారంభమైంది.
అనంతరం రాజమహేంద్రవరం, గుంటూరు, అనంతపురంలోనూ సదస్సులు నిర్వహించనున్నారు. ఎన్నికల విధులు నిర్వర్తించే సిబ్బందికి శిక్షణ కూడా ఇస్తున్నారు.
వివరాలు
లక్ష బ్యాలెట్‌ బాక్సులు సిద్ధం
ఎన్నికల నిర్వహణ కోసం జిల్లాలకు మొత్తం లక్ష బ్యాలెట్‌ బాక్సులను పంపిస్తున్నారు.
ఇందులో ఇప్పటికే సుమారు 30 వేల బాక్సులు జిల్లాలకు చేరుకున్నాయి.
పురపాలక, పంచాయతీరాజ్‌ శాఖలు కొత్తగా 50 వేల బ్యాలెట్‌ బాక్సులను సమకూర్చుకున్నాయి. మరో 20 వేల వరకు పాత బ్యాలెట్‌ బాక్సులు అందుబాటులో ఉన్నాయి.
అదనంగా తెలంగాణ నుంచి మరో 30 వేల బాక్సులను తీసుకొస్తున్నారు.
వివరాలు
పుర ఎన్నికలకే తొలి ప్రాధాన్యం
మొదట పురపాలక ఎన్నికలు నిర్వహించే అవకాశం ఉండటంతో నగరాలు, పట్టణాలకు అవసరమైన ఎన్నికల సామగ్రి, సిబ్బంది ఏర్పాట్లకు అధికారులు ప్రాధాన్యం ఇస్తున్నారు.
పట్టణ స్థానిక సంస్థల ఎన్నికల్లో మేయర్లు, మున్సిపల్‌ చైర్‌పర్సన్లను ప్రత్యక్షంగా ఎన్నుకునే విధానం అమల్లోకి వచ్చింది.
వార్డు సభ్యుల ఎన్నికలతో పాటు మేయర్‌, చైర్‌పర్సన్‌ ఎన్నికలకు ప్రత్యేక ఓటింగ్‌ విధానం ఉంటుంది.
736 డివిజన్లు, వార్డులు అదనం
రాష్ట్రంలోని 100 పురపాలక, నగరపాలక సంస్థలు, నగర పంచాయతీల్లో పునర్విభజనతో డివిజన్లు, వార్డుల సంఖ్య పెరిగింది.
గతంలో ఉన్న 3,206 డివిజన్లు, వార్డుల సంఖ్యను 3,942కు పెంచారు. అంటే అదనంగా 736 డివిజన్లు, వార్డులు ఏర్పడ్డాయి.
దీంతో రాబోయే స్థానిక సంస్థల ఎన్నికల్లో పోటీ చేసే స్థానాల సంఖ్య కూడా పెరగనుంది.