Assam: అస్సాంలో దారుణం.. హోటల్‌లో సామూహిక కాల్పులు.. ఐదుగురు మృతి,మరొకరి పరిస్థితి విషమం
ఈ వార్తాకథనం ఏంటి
అస్సాం రాజధాని గౌహతిలో జరిగిన సామూహిక కాల్పుల ఘటన తీవ్ర కలకలం రేపింది. నగరంలోని బోరా సర్వీస్ ప్రాంతంలో ఉన్న బిలాస్ ఇన్ హోటల్‌లో ఈ దారుణం చోటుచేసుకుంది. ఈ ఘటనలో ఐదుగురు ప్రాణాలు కోల్పోగా.. మరో వ్యక్తి తీవ్రంగా గాయపడ్డారు. ఆయన పరిస్థితి విషమంగా ఉన్నట్లు సమాచారం. ఘటనకు సంబంధించిన వివరాలను స్థానిక పోలీసులు వెల్లడించారు.
వివరాలు
ఆస్తి వివాదమే కారణం?
పోలీసుల ప్రాథమిక విచారణ ప్రకారం.. హోటల్ యజమానికి, దానిని లీజుకు తీసుకున్న వ్యక్తికి మధ్య కొంతకాలంగా ఆస్తి వివాదం కొనసాగుతోంది.
హోటల్ లీజు ఒప్పందానికి సంబంధించిన ఈ తగాదాలే కాల్పులకు కారణమని గౌహతి పోలీసు కమిషనర్ పార్థ సారథి మహంత తెలిపారు.
ఇద్దరి మధ్య వివాదం తీవ్రం కావడంతో ఆగ్రహానికి గురైన లీజుదారుడు తన వద్ద ఉన్న లైసెన్స్ కలిగిన .32 బోర్ పిస్టల్‌తో కాల్పులు జరిపినట్లు ప్రాథమికంగా గుర్తించారు.
వివరాలు
యజమాని తరఫు వ్యక్తులే మృతి
హోటల్‌లో ఒక్కసారిగా కాల్పులు జరగడంతో అక్కడున్నవారు తీవ్ర భయాందోళనలకు గురయ్యారు.
నిందితుడు జరిపిన కాల్పుల్లో ఆరుగురు తీవ్రంగా గాయపడ్డారు. వారిలో ఐదుగురు తీవ్ర రక్తస్రావంతో ప్రాణాలు కోల్పోయారు.
మృతి చెందిన వారంతా హోటల్ యజమానికి సంబంధించిన వ్యక్తులేనని పోలీసులు వెల్లడించారు.
తీవ్రంగా గాయపడిన మరో వ్యక్తిని వెంటనే సమీపంలోని ఆస్పత్రికి తరలించి అత్యవసర చికిత్స అందిస్తున్నారు. ప్రస్తుతం ఆయన పరిస్థితి విషమంగా ఉన్నట్లు తెలుస్తోంది.
వివరాలు
నిందితుడి అరెస్ట్.. కొనసాగుతున్న దర్యాప్తు
కాల్పుల ఘటనపై సమాచారం అందుకున్న పోలీసులు వెంటనే ఘటనా స్థలానికి చేరుకున్నారు.
నిందితుడిని అదుపులోకి తీసుకుని, కాల్పులకు ఉపయోగించిన లైసెన్స్ కలిగిన తుపాకీని స్వాధీనం చేసుకున్నారు.
ఈ ఘటనకు దారితీసిన పరిస్థితులపై నిందితుడిని విచారిస్తున్నట్లు పోలీసులు తెలిపారు. ఆస్తి వివాదమే కాల్పులకు కారణమా? ఘటన వెనుక మరేవైనా కారణాలు ఉన్నాయా? అనే కోణాల్లో దర్యాప్తు కొనసాగుతోంది.
నగరంలోని జనసంచారం ఎక్కువగా ఉండే ప్రాంతంలో ఈ ఘటన చోటుచేసుకోవడంతో స్థానికంగా భయాందోళనలు నెలకొన్నాయి.