Dubai Gold Walkway: దుబాయ్‌లో గోల్డెన్‌ ఫుట్‌పాత్‌.. బంగారంపై నడుద్దాం రండీ
ఈ వార్తాకథనం ఏంటి
దుబాయ్‌లో పర్యాటకులకు బంగారు ప్రపంచాన్ని పరిచయం చేసేందుకు మరో వినూత్న ప్రాజెక్టు సిద్ధమవుతోంది. అక్కడి గోల్డ్ డిస్ట్రిక్ట్‌లో 24 క్యారెట్ల బంగారంతో ప్రత్యేక నడక మార్గాన్ని ఏర్పాటు చేయాలని అధికారులు ప్రణాళిక రూపొందించారు. 'గోల్డ్ వాక్వే' పేరుతో చేపడుతున్న ఈ ప్రాజెక్టును 2026 చివరి నాటికి అందుబాటులోకి తీసుకురావాలని లక్ష్యంగా పెట్టుకున్నారు. ఇది పూర్తయితే బంగారు ఆభరణాల కొనుగోలుతో పాటు, పసిడి ప్రత్యేకతను ప్రత్యక్షంగా ఆస్వాదించేందుకు పర్యాటకులకు మరో ఆకర్షణ అందుబాటులోకి రానుంది.
Details
పసిడి వ్యాపారానికి కొత్త ఆకర్షణ
ప్రపంచవ్యాప్తంగా బంగారు ఆభరణాల వ్యాపారానికి పేరొందిన దుబాయ్.. పర్యాటక రంగాన్ని మరింత అభివృద్ధి చేసేందుకు కొత్త ఆలోచనలతో ముందుకెళ్తోంది.
అందులో భాగంగానే గోల్డ్ డిస్ట్రిక్ట్‌లో గోల్డ్ వాక్వేను ఏర్పాటు చేయనున్నారు.
ఈ ప్రాంతంలో నడుస్తూ బంగారు ఆభరణాల దుకాణాలను సందర్శించడంతో పాటు, ప్రత్యేకమైన పసిడి అలంకరణలను వీక్షించే అవకాశం కల్పించనున్నారు.
దుబాయ్ గోల్డ్ డిస్ట్రిక్ట్ కమర్షియల్ సెక్టార్ సీనియర్ డైరెక్టర్ రషీద్ అల్ హర్మౌదీ వెల్లడించిన వివరాల ప్రకారం.. పసిడి వ్యాపారంలో దుబాయ్ అంతర్జాతీయ స్థాయిలో తన స్థానాన్ని మరింత బలోపేతం చేసుకోవడం ఈ ప్రాజెక్టు ప్రధాన లక్ష్యం.
దీనితో పాటు బంగారు ఆభరణాల భారీ ప్రదర్శనను నిర్వహించే ఆలోచన కూడా ఉంది.
Details
16.514 కిలోల బంగారు కమ్మలు ప్రత్యేక ఆకర్షణ
గోల్డ్ డిస్ట్రిక్ట్‌లో ఇప్పటికే భారతీయ హస్తకళా నైపుణ్యాన్ని చాటిచెప్పే అద్భుతమైన ఆభరణం సందర్శకులను ఆకట్టుకుంది.
జోయాలుక్కాస్ రూపొందించిన 'మయూర సహస్ర' బంగారు కమ్మలు రెండు గిన్నిస్ ప్రపంచ రికార్డులను సాధించాయి.
22 క్యారెట్ల బంగారంతో తయారైన ఈ కమ్మల బరువు 16.514 కిలోలు. వీటి పొడవు 1.215 మీటర్లు, వ్యాసం 0.682 మీటర్లు.
ఈ కళాఖండాన్ని రూపొందించేందుకు 55 మంది స్వర్ణకారులు మొత్తం 5,840 గంటలు శ్రమించారు.
సంప్రదాయ భారతీయ ఆభరణాల తయారీలోని నైపుణ్యానికి ఇది నిదర్శనంగా నిలిచింది.
గోల్డ్ వాక్వే అందుబాటులోకి వస్తే, బంగారు ఆభరణాల వ్యాపారాన్ని పర్యాటక అనుభవంతో మేళవించే మరో ప్రత్యేక కేంద్రంగా దుబాయ్ గోల్డ్ డిస్ట్రిక్ట్ గుర్తింపు పొందే అవకాశం ఉంది.