Volkswagen: భారత్‌లో ఫోక్స్‌వ్యాగన్‌ పెట్టుబడులు వెనక్కి!
ఈ వార్తాకథనం ఏంటి
భారత్‌లో భారీగా పెట్టుబడులు పెట్టేందుకు సిద్ధమని ప్రకటించిన జర్మనీకి చెందిన ప్రముఖ కార్ల తయారీ సంస్థ వోక్స్‌వ్యాగన్‌ ప్రస్తుతం తన ప్రణాళికలపై వెనక్కి తగ్గినట్లు తెలుస్తోంది. దేశంలో ఎలక్ట్రిక్‌ వాహనాల (ఈవీ) తయారీ ప్లాంట్‌ను ఏర్పాటు చేసేందుకు బిలియన్‌ డాలర్ల స్థాయిలో పెట్టుబడులు పెట్టాలని గతంలో భావించింది. అయితే, తాజాగా ఈ పెట్టుబడుల విషయంలో ఆచితూచి వ్యవహరిస్తున్నట్లు సమాచారం. భారత్‌లో ఈవీ తయారీ కేంద్రాన్ని ఏర్పాటు చేసే అంశంపై జేఎస్‌డబ్ల్యూ గ్రూపుతో భాగస్వామ్య చర్చలు జరుగుతున్న సమయంలో ఈ పరిణామం చోటుచేసుకుంది. ప్రస్తుతం ఈ పెట్టుబడులకు సంబంధించిన ప్రణాళికలను నిలిపివేసినట్లు తెలుస్తోంది.
వివరాలు
స్పందించేందుకు నిరాకరించిన ఫోక్స్‌వ్యాగన్‌ ప్రతినిధులు, జేఎస్‌డబ్ల్యూ వర్గాలు
జేఎస్‌డబ్ల్యూ గ్రూపు అధినేత సజ్జన్‌ జిందాల్‌తో ఫోక్స్‌వ్యాగన్‌ జరుపుతున్న చర్చలు త్వరలోనే కొలిక్కి వచ్చే అవకాశం ఉందని కంపెనీ వర్గాలు సూచించాయి.
దేశీయ భాగస్వామితో చర్చలు పూర్తయిన తర్వాత, తొలుత చైనా మార్కెట్‌ కోసం అభివృద్ధి చేసిన తక్కువ ధర ఎలక్ట్రిక్‌ వాహనాల ప్రాజెక్టును మరింత వేగంగా విస్తరించాలని సంస్థ భావిస్తున్నట్లు సమాచారం.
ఈ ప్రాజెక్టును ముందుకు తీసుకెళ్లేందుకు ఇప్పటికే పలు చర్యలు చేపట్టిన ఫోక్స్‌వ్యాగన్‌.. తదుపరి కార్యాచరణపై స్పష్టత రావడానికి సమగ్ర వ్యాపార ప్రణాళిక కోసం ఎదురుచూస్తున్నట్లు తెలుస్తోంది.
అయితే, భారత్‌లో పెట్టుబడుల ప్రణాళికలపై ఫోక్స్‌వ్యాగన్‌ ప్రతినిధులు, జేఎస్‌డబ్ల్యూ వర్గాలు స్పందించేందుకు నిరాకరించాయి.
ఇదిలా ఉండగా, ప్రపంచవ్యాప్తంగా వ్యయాలను తగ్గించుకోవడంపై ఫోక్స్‌వ్యాగన్‌ ప్రత్యేకంగా దృష్టి సారించింది.
వివరాలు
పెట్టుబడులను సుమారు 15 శాతం మేర తగ్గించుకోవాలని ఫోక్స్‌వ్యాగన్‌ యోచన
యూరప్‌లో కార్లకు డిమాండ్‌ బలహీనంగా ఉండటం, చైనా ఆటోమొబైల్‌ కంపెనీల నుంచి తీవ్ర పోటీ ఎదురవుతుండటం సంస్థకు సవాలుగా మారాయి.
ఈ నేపథ్యంలో వ్యాపార నిర్వహణను మరింత సమర్థంగా మార్చుకోవాలని కంపెనీ భావిస్తోంది.
ఈ వ్యయ నియంత్రణ చర్యల్లో భాగంగా పెట్టుబడులను సుమారు 15 శాతం మేర తగ్గించుకోవాలని ఫోక్స్‌వ్యాగన్‌ యోచిస్తున్నట్లు సమాచారం.
అంతేకాకుండా నిర్వహణ ఖర్చులను తగ్గించుకునేందుకు దాదాపు 10 వేల మంది ఉద్యోగులను తగ్గించే ప్రణాళికలను కూడా రూపొందిస్తున్నట్లు తెలుస్తోంది.
ఈ పరిణామాలు భారత్‌లో సంస్థ చేపట్టాలనుకుంటున్న ఈవీ తయారీ ప్రాజెక్టుపైనా ప్రభావం చూపే అవకాశం ఉంది.