US midterm elections 2026: అమెరికా మధ్యంతర ఎన్నికల్లో భారత సంతతి నేతల హవా.. కీలక పదవుల కోసం పోటీ
ఈ వార్తాకథనం ఏంటి
అమెరికాలో నవంబర్ 3, 2026న జరగనున్న మధ్యంతర ఎన్నికల వేడి పెరుగుతోంది. అధ్యక్షుడు డొనాల్డ్ ట్రంప్ రెండో విడత పాలనలో చివరి రెండేళ్లకు అమెరికా రాజకీయాలను ఎవరు శాసించనున్నారో ఈ ఎన్నికలు నిర్ణయించనున్నాయి. అదే సమయంలో అమెరికా రాజకీయాల్లో భారత సంతతికి చెందిన నేతల ప్రాతినిధ్యం ఎలా ఉండబోతోందో కూడా ఈ ఫలితాలు తేల్చనున్నాయి. ఫెడరల్ కాంగ్రెస్ నుంచి రాష్ట్ర, స్థానిక ప్రభుత్వాల వరకు పలువురు ఇండో-అమెరికన్ అభ్యర్థులు వివిధ పదవుల కోసం పోటీ పడుతున్నారు.
వివరాలు
అమెరికా కాంగ్రెస్‌లో ప్రస్తుత పరిస్థితి
అమెరికా కాంగ్రెస్‌లోని ప్రతినిధుల సభ, సెనెట్ రెండింటిలోనూ ప్రస్తుతం రిపబ్లికన్ పార్టీకి మెజారిటీ ఉంది.
మొత్తం 435 స్థానాలున్న ప్రతినిధుల సభలో రిపబ్లికన్లకు 219, డెమొక్రాట్లకు 214 స్థానాలు ఉన్నాయి.
మరో రెండు స్థానాలు ఖాళీగా ఉన్నాయి. 100 మంది సభ్యులుండే సెనెట్‌లో రిపబ్లికన్లు 53 స్థానాలతో ఆధిక్యంలో కొనసాగుతున్నారు.
ఈ మధ్యంతర ఎన్నికల్లో ప్రతినిధుల సభలోని మొత్తం స్థానాలకు, సెనెట్‌లోని 35 స్థానాలకు ఎన్నికలు జరగనున్నాయి.
వీటితోపాటు పలు రాష్ట్రాల్లో గవర్నర్, మేయర్ పదవుల కోసం కూడా పోలింగ్ నిర్వహించనున్నారు.
కాలిఫోర్నియా, వాషింగ్టన్, వర్జీనియా, అరిజోనా, ఫ్లోరిడా, టెక్సాస్, ఒహియో, న్యూయార్క్, మేరీల్యాండ్ రాష్ట్రాల్లో భారత సంతతికి చెందిన అభ్యర్థులు గెలుపు కోసం ప్రయత్నిస్తున్నారు.
వివరాలు
ప్రతినిధుల సభకు డెమొక్రాట్ల పోటీ
అమెరికా ప్రతినిధుల సభలో తమ స్థానాలను నిలబెట్టుకునేందుకు నలుగురు భారత సంతతికి చెందిన డెమొక్రాటిక్ ప్రజాప్రతినిధులు మరోసారి ఎన్నికల బరిలోకి దిగుతున్నారు.
కాలిఫోర్నియాలోని 17వ నియోజకవర్గం నుంచి రో ఖన్నా పోటీ చేస్తున్నారు.
సిలికాన్ వ్యాలీ పరిధిలో ఉన్న ఈ స్థానంలో రిపబ్లికన్ అభ్యర్థి రితేష్ టాండన్ కూడా బరిలో ఉండటంతో ఇద్దరు భారత సంతతి నేతల మధ్య పోటీ ఆసక్తికరంగా మారింది.
వాషింగ్టన్ రాష్ట్రంలోని 7వ నియోజకవర్గం నుంచి ప్రమీలా జయపాల్ మరోసారి పోటీ చేస్తున్నారు.
ఆమెకు ప్రత్యర్థిగా రిపబ్లికన్ పార్టీ తరఫున భారత సంతతికి చెందిన నిరవ్ షేత్ ఎన్నికల బరిలో ఉన్నారు.
వివరాలు
ప్రతినిధుల సభకు డెమొక్రాట్ల పోటీ
కాలిఫోర్నియాలోని 3వ నియోజకవర్గం నుంచి అమీ బెరా డెమొక్రాటిక్ అభ్యర్థిగా పోటీ చేస్తూ తన స్థానాన్ని తిరిగి దక్కించుకోవాలని లక్ష్యంగా పెట్టుకున్నారు.
వర్జీనియాలోని 10వ నియోజకవర్గం నుంచి సుహాస్ సుబ్రమణ్యం కూడా డెమొక్రాటిక్ అభ్యర్థిగా మరోసారి అదృష్టాన్ని పరీక్షించుకుంటున్నారు.
అరిజోనాలోని 1వ నియోజకవర్గం నుంచి అమిష్ షా పోటీ చేస్తున్నారు.
అత్యవసర వైద్య సేవల విభాగంలో పనిచేసిన వైద్యుడిగా, గతంలో రాష్ట్ర శాసనసభ్యుడిగా ఆయనకు గుర్తింపు ఉంది.
డెమొక్రాటిక్ అభ్యర్థిగా బరిలో ఉన్న ఆయన.. మాజీ ఎన్ఎఫ్ఎల్ ఆటగాడు, రిపబ్లికన్ అభ్యర్థి జే ఫీలీతో తలపడుతున్నారు.
ఫ్లోరిడాలోని 22వ నియోజకవర్గం నుంచి డెమొక్రాటిక్ అభ్యర్థి పియా దాండియా పోటీ చేస్తున్నారు.
వివరాలు
గవర్నర్, అటార్నీ జనరల్ పదవులపై గురి
ఆమెకు ప్రత్యర్థిగా రిపబ్లికన్ పార్టీ అభ్యర్థి కేసీ అస్కర్ ఉన్నారు. మరోవైపు, ప్రైమరీ ఎన్నికల్లో ఇద్దరు భారత సంతతి నేతలకు ఎదురుదెబ్బ తగిలింది.
ఇల్లినాయిస్ సెనెట్ పోటీలో రాజా కృష్ణమూర్తి, మిచిగాన్‌లోని 13వ కాంగ్రెస్ నియోజకవర్గంలో శ్రీ థానేదార్ ఓటమి పాలయ్యారు.
ఈ ఎన్నికల్లో ఒహియో గవర్నర్ పదవికి సంబంధించిన పోటీ ప్రత్యేక ఆసక్తిని రేకెత్తిస్తోంది.
బయోటెక్ రంగంలో పారిశ్రామికవేత్తగా గుర్తింపు పొందిన వివేక్ రామస్వామి,2024లో రిపబ్లికన్ పార్టీ అధ్యక్ష అభ్యర్థిత్వం కోసం జరిగిన ప్రాథమిక పోటీలో పాల్గొన్నారు.
ఇప్పుడు రిపబ్లికన్ అభ్యర్థిగా ఒహియో గవర్నర్ పదవిని లక్ష్యంగా చేసుకున్నారు.
డెమొక్రాటిక్ అభ్యర్థి,రాష్ట్ర మాజీ ఆరోగ్య డైరెక్టర్ అమీ ఆక్టన్‌తో ఆయన పోటీ పడుతున్నారు.
వివరాలు
గవర్నర్, అటార్నీ జనరల్ పదవులపై గురి
రామస్వామికి రన్నింగ్ మేట్‌గా రాబర్ట్ ఎ. మెక్కోలీ ఉన్నారు. గవర్నర్ ఎన్నికల్లో వీరి పోటీపై రాజకీయ వర్గాల్లో ఆసక్తి నెలకొంది.
న్యూయార్క్ అటార్నీ జనరల్ పదవి కోసం కూడా భారత సంతతి అభ్యర్థి రంగంలోకి దిగారు.
రిపబ్లికన్ పార్టీ తరఫున సరితా కొమటిరెడ్డి పోటీ చేస్తూ డెమొక్రాటిక్ నేత లెటీషియా జేమ్స్‌కు సవాల్ విసురుతున్నారు.
ఇక హైదరాబాద్‌లో జన్మించిన మేరీల్యాండ్ లెఫ్టినెంట్ గవర్నర్ అరుణా మిల్లర్ మరోసారి ఎన్నికల బరిలో ఉన్నారు.
గవర్నర్ వెస్ మోర్‌తో కలిసి తిరిగి విజయం సాధించేందుకు ఆమె ప్రయత్నిస్తున్నారు.
వివరాలు
లాస్ ఏంజిల్స్ మేయర్ రేసులో నిత్య రామన్
కాలిఫోర్నియాలోని లాస్ ఏంజిల్స్ నగర మేయర్ ఎన్నికల్లో కేరళ మూలాలున్న డెమొక్రాట్ నిత్య రామన్ పోటీ చేస్తున్నారు.
ప్రస్తుతం నగర కౌన్సిల్ సభ్యురాలిగా ఉన్న ఆమె, రన్‌ఆఫ్ ఎన్నికల్లో ప్రస్తుత మేయర్ కరెన్ బాస్‌ను ఎదుర్కొంటున్నారు.
ఈ పోటీలో నిత్య రామన్ గెలిస్తే లాస్ ఏంజిల్స్ మేయర్‌గా బాధ్యతలు చేపట్టిన తొలి దక్షిణాసియా మహిళగా చరిత్ర సృష్టిస్తారు.
టెక్సాస్ రాష్ట్ర అసెంబ్లీ ఎన్నికల్లోనూ భారత సంతతి అభ్యర్థులు తమ అదృష్టాన్ని పరీక్షించుకుంటున్నారు.
47వ నియోజకవర్గం నుంచి పూజా సేథీ డెమొక్రాటిక్ అభ్యర్థిగా పోటీ చేస్తున్నారు.
66వ నియోజకవర్గం నుంచి సందీప్ శ్రీవాత్సవ అదే పార్టీ తరఫున బరిలో ఉన్నారు. ఆయనకు ప్రత్యర్థిగా రిపబ్లికన్ అభ్యర్థి మ్యాట్ షాహీన్ పోటీ చేస్తున్నారు.
వివరాలు
లాస్ ఏంజిల్స్ మేయర్ రేసులో నిత్య రామన్
మొత్తంగా చూస్తే, 2026 అమెరికా మధ్యంతర ఎన్నికలు భారత సంతతి నేతలకు కీలకమైన రాజకీయ పరీక్షగా మారాయి.
కాంగ్రెస్ సభ్యత్వం నుంచి గవర్నర్, అటార్నీ జనరల్, మేయర్ పదవుల వరకు వివిధ స్థాయుల్లో వారు పోటీ పడుతున్నారు.
ఈ ఎన్నికల ఫలితాలు అమెరికా రాజకీయాల్లో ఇండో-అమెరికన్ల ప్రాతినిధ్యంపై ప్రభావం చూపనున్నాయి.