Bandi Sanjay: మోదీని ఎదుర్కోలేక ఈసీ, ఈవీఎంలపై నిందలా?: బండి సంజయ్
ఈ వార్తాకథనం ఏంటి
కేంద్రహోంశాఖ సహాయ మంత్రి బండి సంజయ్ కాంగ్రెస్పై తీవ్రస్థాయిలో విమర్శలు చేశారు. ప్రధాని నరేంద్ర మోదీని రాజకీయంగా ఎదుర్కొనే ధైర్యం లేకే ఎన్నికల సంఘం, ఈవీఎంలను కాంగ్రెస్ లక్ష్యంగా చేసుకుంటోందని ఆరోపించారు. ప్రస్తుతం ఓటర్ల జాబితా ప్రత్యేక సమగ్ర సవరణ (SIR)పై అధికార, ప్రతిపక్షాల మధ్య తీవ్ర రాజకీయ వివాదం కొనసాగుతున్న నేపథ్యంలో ఆయన ఈ వ్యాఖ్యలు చేశారు. కర్ణాటక, తెలంగాణ, హిమాచల్ప్రదేశ్ రాష్ట్రాల్లో కాంగ్రెస్ విజయం సాధించిన సమయంలో కాంగ్రెస్ వర్కింగ్ కమిటీ (CWC)కి ఈవీఎంల అంశం ఎందుకు గుర్తుకురాలేదని బండి సంజయ్ ప్రశ్నించారు. కేరళలో కాంగ్రెస్ నేతలు సర్ ప్రక్రియ కారణంగానే తాము విజయం సాధించామని గతంలో చెప్పిన విషయాన్ని కూడా కాంగ్రెస్ వర్కింగ్ కమిటీ మర్చిపోయిందా? అని నిలదీశారు.
వివరాలు
సర్ ప్రక్రియలో పనిచేస్తున్న సిబ్బంది రాష్ట్ర ప్రభుత్వాలకు చెందిన అధికారులే: బండి సంజయ్
మోదీ రాజీనామా చేయాలని కాంగ్రెస్ చేస్తున్న డిమాండ్పైనా బండి సంజయ్ స్పందించారు.
వరుసగా మూడుసార్లు దేశ ప్రజలు మోదీని ఎన్నుకున్నందుకే ఆయన రాజీనామా చేయాలా? అని ప్రశ్నించారు.
భారత ప్రజాస్వామ్య వ్యవస్థ గొప్పతనాన్ని,భారతీయుల సామర్థ్యాన్ని ప్రపంచానికి చాటిచెబుతున్నందుకు కూడా మోదీ రాజీనామా చేయాలా? అని అన్నారు.
మోదీ ప్రభుత్వాన్ని బ్రిటిష్ పాలనతో పోల్చడం భారత ప్రజాస్వామ్యాన్ని అవమానించడమేనని వ్యాఖ్యానించారు.
సర్ ప్రక్రియలో పనిచేస్తున్న సిబ్బంది రాష్ట్ర ప్రభుత్వాలకు చెందిన అధికారులేనని బండి సంజయ్ పేర్కొన్నారు.
ఈ ప్రక్రియలో ఏమైనా పొరపాట్లు జరిగితే వాటిని సరిదిద్దుకునే వ్యవస్థ ఉందన్నారు.
అలాంటి అంశాలకు కేంద్ర ప్రభుత్వాన్ని బాధ్యులను చేయడం సరికాదని విమర్శించారు.
సర్ ప్రక్రియ కొత్తగా తీసుకొచ్చినది కాదని, గతంలోనూ ఇలాంటి ప్రక్రియ నిర్వహించారని చెప్పారు.
వివరాలు
ఎన్నికల్లో ఎవరు గెలవాలనేది ప్రజలే నిర్ణయిస్తారు: బండి సంజయ్
ఈ ప్రక్రియకు సుప్రీంకోర్టు కూడా మద్దతు ఇచ్చిందని పేర్కొన్నారు.
ఎన్నికల్లో ఎవరు గెలవాలనేది ప్రజలే నిర్ణయిస్తారని బండి సంజయ్ అన్నారు.
అయితే ఎన్నికల్లో ఎవరు ఓటు వేయడానికి అర్హులనే విషయాన్ని చట్టబద్ధమైన ఓటర్ల జాబితా నిర్ణయిస్తుందని వివరించారు.
ప్రజాస్వామ్యంలో ఓటుకు ఎంత ప్రాధాన్యం ఉందో.. ఓటర్ల జాబితాకు కూడా అంతే ప్రాధాన్యం ఉండాలని అన్నారు.
సర్ ప్రక్రియ విషయంలో ఎన్నికల సంఘం చేసిన తప్పేమిటో కాంగ్రెస్ స్పష్టంగా చెప్పాలని బండి సంజయ్ డిమాండ్ చేశారు.
ఈ ప్రక్రియపై ఆరోపణలకు ఆధారాలు ఉంటే వాటిని బహిర్గతం చేయాలని సవాల్ విసిరారు.
ఓటర్ల జాబితా సవరణపై ప్రస్తుతం రాజకీయంగా తీవ్ర చర్చ జరుగుతున్న నేపథ్యంలో బండి సంజయ్ వ్యాఖ్యలు ప్రాధాన్యం సంతరించుకున్నాయి.