Kazipet Railway Coach: తెలంగాణకు మరో విభజన హామీని నెరవేర్చిన కేంద్రం.. కాజీపేటలో రైల్వేకోచ్ ఫ్యాక్టరీకి గ్రీన్ సిగ్నల్
ఉమ్మడి వరంగల్ జిల్లాకు చెందిన ప్రజలు ఎప్పుడెప్పుడా అని ఎదురుచూస్తున్న కాజీపేట కోచ్ ఫ్యాక్టరీపై కేంద్ర ప్రభుత్వం శుభవార్త ప్రకటించింది. విభజన హామీల్లో భాగంగా, కాజీపేటలో రైల్వే మాన్యుఫ్యాక్చరింగ్ యూనిట్ (ఆర్‌ఎంయూ) ఏర్పాటు చేయడం కోసం కేంద్ర ప్రభుత్వం కీలక నిర్ణయం తీసుకుంది. కాజీపేటలోని వ్యాగన్ ఫ్యాక్టరీని అప్‌గ్రేడ్ చేయాలని సెంట్రల్ రైల్వే ఆదేశాలు జారీ చేసింది. ఈ ప్రక్రియకు సంబంధించి దక్షిణమధ్య రైల్వే జీఎంకు గత ఏడాది జులై 5వ తేదీన అప్‌గ్రేడ్ చేసే ఆదేశాలు అందాయి.
ఎల్‌హెచ్‌బి, ఈఎంయు కోచ్‌ల తయారీ..
ఇక ఈ ఏడాది సెప్టెంబర్‌ 9న, రైల్వే బోర్డు అప్‌గ్రేడ్ చేసిన యూనిట్‌లో ఎల్‌హెచ్‌బీ, ఈఎంయూ కోచ్‌ల తయారీకి అనుగుణంగా సౌకర్యాలను అభివృద్ధి చేయాలని సూచించింది. కాజీపేట రైల్వే మాన్యుఫ్యాక్చరింగ్ యూనిట్‌లో ఈ కోచ్‌ల తయారీకి అవసరమైన విధానాలను రూపొంపేందుకు ప్రణాళికలు రూపొందించాలని కూడా రైల్వే బోర్డు సూచించింది. ఈ విషయం ఇటీవల తెలంగాణ హోంశాఖ ఆధ్వర్యంలో కేంద్ర, రాష్ట్ర అధికారులతో జరిగిన సమావేశంలో వెల్లడి అయ్యింది.
60,000 మందికి ప్రత్యక్ష, పరోక్ష ఉపాధి అవకాశాలు
కోచ్ ఫ్యాక్టరీ ఏర్పాటు కోసం ఇక్కడి ప్రజలు, ఉద్యోగులు ఎన్నో సంవత్సరాలుగా ఉద్యమిస్తున్నారు. 2014లో ఏపీ విభజన చట్టంలో కేంద్ర ప్రభుత్వం ఈ కోచ్ ఫ్యాక్టరీని ఏర్పాటు చేయడానికి ఆమోదం తెలిపింది. 2023లో వ్యాగన్ తయారీ పరిశ్రమ పై ప్రకటన అయితే చేసింది, కానీ అది ఆచరణలోకి రాలేదు. ఇక, దక్షిణ భారతదేశానికి ప్రధాన గేట్‌వే అయిన కాజీపేట జంక్షన్‌ను డివిజన్‌గా ఏర్పరచాలని స్థానికులు, కార్యకర్తలు చాలా కాలంగా డిమాండ్‌ చేస్తూ వస్తున్నారు. ఉత్తర, దక్షిణ ధృవాలను అనుసంధానం చేయడంలో కీలక పాత్ర పోషించే కాజీపేట జంక్షన్ డివిజన్‌గా ఏర్పడితే దాదాపు 60,000 మందికి ప్రత్యక్ష, పరోక్ష ఉపాధి అవకాశాలు కలుగుతాయని అధికారులు అంచనా వేస్తున్నారు.
