Chandrababu: స్థానిక ఎన్నికల్లో రెబల్స్‌కు చంద్రబాబు వార్నింగ్‌.. పార్టీ ఆదేశాలు ధిక్కరిస్తే చర్యలు తప్పవు!
ఈ వార్తాకథనం ఏంటి
ఆంధ్రప్రదేశ్‌లో స్థానిక సంస్థల ఎన్నికల నేపథ్యంలో పార్టీ ఆదేశాలను ధిక్కరించి రెబల్స్‌గా పోటీ చేస్తే కఠిన చర్యలు తప్పవని తెదేపా అధినేత, ముఖ్యమంత్రి చంద్రబాబు నాయుడు హెచ్చరించారు. రెబల్ అభ్యర్థులుగా నామినేషన్లు దాఖలు చేసిన వారితో వాటిని ఉపసంహరింపజేయాలని పార్టీ నేతలకు స్పష్టం చేశారు. పార్టీ అధికారికంగా ప్రకటించిన అభ్యర్థుల విజయానికి ప్రతి ఒక్కరూ కృషి చేయాలని సూచించారు. పార్టీ నేతలతో చంద్రబాబు మంగళవారం టెలికాన్ఫరెన్స్ నిర్వహించారు. ఈ సందర్భంగా స్థానిక ఎన్నికల్లో అనుసరించాల్సిన వ్యూహాలు, అభ్యర్థుల ఎంపిక, ప్రచారంపై నేతలకు దిశానిర్దేశం చేశారు.
వివరాలు
సమర్థులైన అభ్యర్థులను గెలిపించుకోవాలి
కూటమి పార్టీల మధ్య సమన్వయంతోనే అభ్యర్థుల ఎంపిక, ఎన్నికల ప్రచారం జరగాలని స్పష్టం చేశారు.
తాత్కాలిక ప్రయోజనాల కోసం అభ్యర్థులను నిలబెట్టడం సరైన పద్ధతి కాదని పేర్కొన్నారు. కూటమి కేటాయించిన స్థానాల్లో సమర్థులైన అభ్యర్థులను గెలిపించుకోవడంపై దృష్టి సారించాలని తేల్చిచెప్పారు.
ఎన్నికల ప్రచారంలో భాగంగా నేతలు, కార్యకర్తలు ఇంటింటికీ వెళ్లి ప్రజలను కలవాలని చంద్రబాబు సూచించారు. ప్రభుత్వం అమలు చేసిన అభివృద్ధి కార్యక్రమాలు, సంక్షేమ పథకాల గురించి ప్రజలకు వివరించాలని ఆదేశించారు.
గత సార్వత్రిక ఎన్నికల్లో సాధించిన ఫలితాల కంటే స్థానిక ఎన్నికల్లో మరింత మెరుగైన ఫలితాలు సాధించేలా అందరూ సమష్టిగా పనిచేయాలని దిశానిర్దేశం చేశారు.