కాంగ్రెస్ చీకటి పనులు 'రెడ్ డైరీ' రికార్డు అయ్యాయి: ప్రధాని మోదీ
ఈ వార్తాకథనం ఏంటి
ప్రధానమంత్రి నరేంద్ర మోదీ గురువారం రాజస్థాన్‌లోని సికార్‌, రాజ్ కోట్‌లో పలు అభివృద్ధి కార్యక్రమాలకు శంకుస్థాపన చేశారు.
ఈ సందర్భంగా నిర్వహించిన సభల్లో రాష్ట్రంలో అధికారంలో ఉన్న కాంగ్రెస్ ప్రభుత్వం, సీఎం అశోక్ గెహ్లాట్‌పై తీవ్రస్థాయిలో విరుచుకుపడ్డారు.
ముఖ్యంగా గెహ్లాట్ ప్రభుత్వాన్ని మోదీ లక్ష్యంగా చేసుకున్నారు. కాంగ్రెస్ ప్రభుత్వ చీకటి పనులు ఈ 'రెడ్ డైరీ'లో నమోదయ్యాయని మోదీ ఘాటుగా స్పందించారు.
రాజస్థాన్‌లో రాబోయే ఎన్నికల్లో కాంగ్రెస్‌కు రెడ్ డైరీ పెద్ద ఎదురుదెబ్బ అవుతుందని మోదీ పేర్కొన్నారు. రాష్ట్రంలో అభివృద్ధి ప్రాజెక్టులను గెహ్లాట్ ప్రభుత్వం నిలిపివేస్తోందని మోదీ మండిపడ్డారు.
మోదీ
ఇండియా కూటమిపై మోదీ విమర్శలు
'రెడ్ డైరీ' పేజీలు తెరిస్తే రాష్ట్రంలో కాంగ్రెస్ ప్రభుత్వం చేసిన అన్ని అక్రమాలు బయటకు వస్తాయని మోదీ చెప్పారు.
త్వరలో జరగనున్న ఎన్నికల్లో కాంగ్రెస్ గోల్ మాల్ చేయబోతోందని పేర్కొన్నారు. ప్రతిపక్ష కూటమి 'ఇండియా'పై కూడా విమర్శలు గుప్పించారు. 'పాపులర్ ఫ్రంట్ ఆఫ్ ఇండియా' పేరులో కూడా ఇండియా ఉందన్నారు.
దేశం అభివృద్ధి చెందడం కొందరికి ఇష్టం లేదని ప్రతిపక్షాలపై మోదీ మండిపడ్డారు. ప్రజల కలలు నెరవేరుతున్నాయని వారు కలత చెందుతున్నారని పరోక్షంగా విమర్శించారు.
అవినీతిపరులు తమ కూటమి పేరును మార్చుకున్నాయని చెప్పారు. యూపీఏ ప్రభుత్వం గతంలో చేసిన మోసాలను కప్పిపుచ్చేందుకే కూటమి పేరును మార్చినట్లు మోదీ స్పష్టం చేశారు.