JK: విదేశీ గూఢచర్య సంస్థలకు రక్షణ రహస్యాలు? పోలీసుల అదుపులో ఆర్మీ అధికారి భార్య!
ఈ వార్తాకథనం ఏంటి
విదేశీ గూఢచర్య సంస్థలకు దేశ రక్షణకు సంబంధించిన సున్నితమైన సమాచారాన్ని చేరవేస్తున్నారనే ఆరోపణల నేపథ్యంలో పోలీసులు ఓ ఆర్మీ అధికారి భార్యను అదుపులోకి తీసుకున్నారు. దేశ భద్రతపై ప్రత్యక్ష ప్రభావం చూపే కీలక పత్రాలు, ఫొటోలు, ఎలక్ట్రానిక్ డేటాను రహస్యంగా సేకరించడం, ఇతరులకు బదిలీ చేయడం వంటి కార్యకలాపాల్లో ఆమె విదేశీ ఏజెంట్లకు సహకరిస్తున్నట్లు నిఘా వర్గాల నుంచి సమాచారం అందినట్లు అధికారులు వెల్లడించారు.
వివరాలు
సోషల్ మీడియా ద్వారా పరిచయం.. విద్యావేత్తలమంటూ నమ్మించి..
నిఘా వర్గాలు వెల్లడించిన వివరాల ప్రకారం.. సంబంధిత ఆర్మీ అధికారి పరిశోధనలకు సంబంధించిన కార్యకలాపాలను పర్యవేక్షించేవారు.
ఈ క్రమంలో ఆయన భార్యకు కొన్ని నెలల క్రితం సోషల్ మీడియా ద్వారా పలువురు వ్యక్తులు పరిచయమయ్యారు.
వారు తమను తాము విద్యావేత్తలుగా పరిచయం చేసుకున్నారు. వ్యాసాలను ప్రచురిస్తామని నమ్మించి, ఆమెతో వివిధ అంశాలపై రచనలు చేయించారు.
వివరాలు
తొలుత పర్యావరణం.. ఆ తర్వాత రక్షణ రంగంపై వ్యాసాలు
ఎలాంటి అనుమానం కలగకుండా ఉండేందుకు ఆ వ్యక్తులు మొదట పర్యావరణం, భౌగోళిక రాజకీయాలకు సంబంధించిన అంశాలపై వ్యాసాలు రాయమని ఆమెను కోరినట్లు సమాచారం.
ఆ తర్వాత క్రమంగా రక్షణ రంగానికి సంబంధించిన విషయాల వైపు ఆమెను మళ్లించారు.
వారిని నిజమైన విద్యావేత్తలుగా నమ్మిన ఆ మహిళ, వారి ఉద్దేశాలను గుర్తించలేకపోయిందని తెలుస్తోంది.
ఈ విధంగా ఆమెను తమ ఉచ్చులోకి లాగినట్లు అనుమానిస్తున్నారు.
వివరాలు
సైనిక స్థావరాల ఫొటోలు, వీడియోలు పొందుపరిచినట్లు ఆరోపణలు
రక్షణ రంగానికి సంబంధించిన అంశాలపై వ్యాసాలు రాయడంతో పాటు కీలక సైనిక స్థావరాల ఫొటోలు, వీడియోలను కూడా ఆమె వాటిలో పొందుపరిచినట్లు ఆరోపణలున్నాయి.
ఆయుధ వ్యవస్థలకు సంబంధించిన విషయాలను సైతం వ్యాసాల్లో ప్రస్తావించినట్లు సమాచారం.
దేశ భద్రతకు కీలకమైన పత్రాలు, ఫొటోలు, ఎలక్ట్రానిక్ డేటాను రహస్యంగా సేకరించి బదిలీ చేసే వ్యవహారంలో ఆమె పాత్ర ఎంతవరకు ఉందనే కోణంలో పోలీసులు దర్యాప్తు చేపట్టారు.
రక్షణ రంగానికి సంబంధించిన మరిన్ని కీలక వివరాలను ఆమె విదేశీ వ్యక్తులకు చేరవేశారా? ఈ వ్యవహారం వెనుక విదేశీ గూఢచర్య సంస్థల ప్రమేయం ఉందా? అనే అంశాలపై విచారణ కొనసాగిస్తున్నారు.