El Niño: సముద్ర జీవరాశులకూ ఎల్నినో ఎఫెక్ట్ .. చేపల ఉత్పత్తి భారీగా తగ్గే ప్రమాదం
ఈ వార్తాకథనం ఏంటి
ఎల్నినో ప్రభావంతో వాతావరణంలో చోటుచేసుకుంటున్న మార్పులు భూమిపైనే కాకుండా సముద్ర జీవవ్యవస్థపైనా తీవ్ర ప్రభావం చూపనున్నాయి. సముద్ర జలాల్లో ఆక్సిజన్ స్థాయులు తగ్గిపోవడం వల్ల మత్స్య సంపద పెరుగుదల మందగించే అవకాశం ఉందని నిపుణులు హెచ్చరిస్తున్నారు. చేపలకు అవసరమైన ఆహారం కొరత ఏర్పడటంతో పాటు సముద్రంలోని సహజ ఆహార గొలుసు దెబ్బతినే ప్రమాదం ఉంది. దీని ప్రభావంతో మత్స్య ఉత్పత్తి గణనీయంగా తగ్గే అవకాశాలు కనిపిస్తున్నాయి. ముఖ్యంగా పలు దేశాలకు ఎగుమతి చేసే ట్యూనా చేపల దిగుబడి కూడా తగ్గవచ్చని నిపుణులు అంచనా వేస్తున్నారు.
వివరాలు
సాధారణ పరిస్థితుల్లో సముద్రంలో ఏం జరుగుతుంది?
సాధారణ వాతావరణ పరిస్థితుల్లో సముద్రం అడుగుభాగంలో ఉండే పొటాషియం, నైట్రేట్, సల్ఫేట్, సోడియం వంటి పోషక రసాయన మూలకాలు క్రమంగా సముద్ర ఉపరితలానికి చేరుకుంటాయి.
వీటిని కంటికి కనిపించని సూక్ష్మ వృక్ష ఫ్లవకాలు (ఫైటోప్లాంక్టన్) ఆహారంగా స్వీకరిస్తాయి.
కిరణజన్య సంయోగక్రియ ద్వారా ఇవి పెరిగి సముద్ర జలాల్లో ఆక్సిజన్ను సమృద్ధిగా విడుదల చేస్తాయి.
ఈ వృక్ష ఫ్లవకాలనే జంతు ఫ్లవకాలు (జూప్లాంక్టన్) ఆహారంగా తీసుకుంటాయి.
అనంతరం ఈ జంతు ఫ్లవకాలు చిన్న చేపలు, చేపల లార్వాలకు ఆహారంగా మారతాయి. చిన్న చేపలను పెద్ద చేపలు తింటాయి.
చివరకు ఆ చేపలను మనుషులు ఆహారంగా వినియోగిస్తారు. ఇలా ఒకదానిపై మరొకటి ఆధారపడే ఈ ప్రక్రియనే సముద్ర ఆహార గొలుసు (ఫుడ్ చైన్)గా పిలుస్తారు.
వివరాలు
ఎల్నినోతో వేడెక్కుతున్న సముద్రాలు
ఎల్నినో ప్రభావంతో సముద్ర ఉపరితల ఉష్ణోగ్రత అసాధారణంగా పెరుగుతుంది.
ముఖ్యంగా పసిఫిక్ మహాసముద్రంలో ఏర్పడే వేడి గాలులు విస్తరించి సముద్ర జలాలను మరింత వేడెక్కిస్తాయి.
దీంతో సముద్రం అడుగుభాగంలో ఉన్న పోషక మూలకాలు ఉపరితలానికి చేరకుండా అడ్డంకి ఏర్పడుతుంది.
పోషకాలు పైకి రాకపోవడంతో వృక్ష ఫ్లవకాల పెరుగుదల తగ్గిపోతుంది. దాంతో వాటిపై ఆధారపడే జంతు ఫ్లవకాల సంఖ్య కూడా తగ్గుతుంది.
ఈ ప్రభావం చిన్న చేపలపై పడడంతో వాటికి తగిన ఆహారం లభించదు.
చివరకు పెద్ద చేపలకూ ఆహార కొరత ఏర్పడి వాటి సంఖ్య క్రమంగా తగ్గుతుంది.
ఈ పరిస్థితుల కారణంగా ప్రతి ఏడాది లభించే సముద్ర ఉత్పత్తుల్లో 30 నుంచి 40శాతం వరకు తగ్గుదల నమోదయ్యే అవకాశం ఉందని నిపుణులు చెబుతున్నారు.
వివరాలు
రొయ్యల మేతపైనా ప్రభావం
ట్యూనా, నెత్తళ్లు వంటి వాణిజ్యపరంగా కీలకమైన చేపల ఉత్పత్తి కూడా గణనీయంగా తగ్గవచ్చని అంచనా వేస్తున్నారు.
మత్స్యకారులు చేపల వేటలో పట్టే చేపల్లో తినదగినవాటితో పాటు వినియోగించని చిన్న చేపలు కూడా ఉంటాయి.
వాటిని డ్రై ఫిష్గా తయారు చేసి తర్వాత రొయ్యల పెంపకంలో మేతగా ఉపయోగిస్తారు.
అయితే ఎల్నినో కారణంగా చేపల లభ్యత తగ్గితే రొయ్యల మేత తయారీకి అవసరమైన ముడి పదార్థం కూడా కొరతకు గురయ్యే అవకాశముంది.
దీంతో రొయ్యల సాగుపైనా ప్రతికూల ప్రభావం పడే పరిస్థితులు కనిపిస్తున్నాయి.
వివరాలు
సముద్ర జీవరాశి మనుగడకు ముప్పు
ఎల్నినో ప్రభావం సముద్ర జీవవ్యవస్థపై గణనీయంగా ఉంటుందని ప్రొఫెసర్ పి. జానకిరామ్ తెలిపారు.
సముద్ర జలాల ఉష్ణోగ్రత పెరగడం వల్ల ఆక్సిజన్ స్థాయులు తగ్గడంతో పాటు కాలుష్యం కూడా పెరుగుతుందని చెప్పారు.
ఈ పరిస్థితులు సముద్ర జీవరాశి మనుగడకు ముప్పుగా మారుతాయని పేర్కొన్నారు.
ముఖ్యంగా వృక్ష ఫ్లవకాలు నశిస్తే మొత్తం ఆహార గొలుసు దెబ్బతింటుందని, దాని ప్రభావం చిన్న చేపల నుంచి పెద్ద చేపల వరకు విస్తరించి చివరకు మత్స్య సంపదను తీవ్రంగా దెబ్బతీసే ప్రమాదం ఉందని ఆయన వివరించారు.