Mana Mitra WhatsApp: తుఫాన్ బాధితులకు 'మనమిత్ర' అండ.. వాట్సాప్‌లోనే ఫిర్యాదులు.. అత్యవసర హెల్ప్‌లైన్ నంబర్లు ఇవే!
ఈ వార్తాకథనం ఏంటి
ఆంధ్రప్రదేశ్‌లో 'మురసు' తుఫాన్ ప్రభావిత ప్రాంతాల ప్రజలకు ఎదురవుతున్న సమస్యలను త్వరగా పరిష్కరించేందుకు రాష్ట్ర ప్రభుత్వం ప్రత్యేక చర్యలు చేపట్టింది. ఇందులో భాగంగా 'మనమిత్ర' వాట్సాప్ గవర్నెన్స్ సేవలను అందుబాటులోకి తీసుకొచ్చింది. తుఫాన్ కారణంగా విద్యుత్ సరఫరా నిలిచిపోవడం, చెట్లు లేదా గోడలు కూలిపోవడం, ఇళ్లలోకి నీరు చేరడం వంటి సమస్యలతో పాటు ఇతర అత్యవసర పరిస్థితులపై ప్రజలు వాట్సాప్ ద్వారా ఫిర్యాదు చేయవచ్చని ఆర్టీజీఎస్ అధికారులు తెలిపారు. ప్రజలు నమోదు చేసిన ఫిర్యాదులను సంబంధిత అధికారులకు వెంటనే చేరవేసి, సమస్యల పరిష్కారానికి చర్యలు తీసుకునేలా ఈ సేవను రూపొందించినట్లు పేర్కొన్నారు. సమస్యకు సంబంధించిన ఫొటోలను కూడా వాట్సాప్‌లో అప్‌లోడ్ చేసే అవకాశం కల్పించారు.
వివరాలు
మనమిత్రలో సమస్యను ఎలా నమోదు చేయాలి?
తుఫాన్ బాధితులు ముందుగా 9552300009 వాట్సాప్ నంబర్‌కు 'Hi' అని మెసేజ్ పంపాలి.
అనంతరం కనిపించే సేవల జాబితాలో సంబంధిత ఆప్షన్‌ను ఎంచుకోవాలి. ఆ తర్వాత 'Murasu Cyclone Issue' ఆప్షన్‌పై క్లిక్ చేసి, 'Report Issue'ను ఎంపిక చేసుకుని కన్ఫర్మ్ చేయాలి.
అనంతరం 'Registration' ఆప్షన్‌ను ఎంచుకుని తమ పేరు, జిల్లా, మండలం వివరాలను నమోదు చేయాలి.
ఆ తర్వాత తుఫాన్ కారణంగా తమ ప్రాంతంలో ఎదురవుతున్న సమస్యను వివరంగా తెలియజేయాలి. అవసరమైతే సమస్యకు సంబంధించిన ఫొటోలను కూడా అప్‌లోడ్ చేయవచ్చు.
వివరాలు
ఫిర్యాదులు అధికారులకు వెంటనే చేరవేత
మనమిత్ర ద్వారా నమోదు చేసిన ఫిర్యాదులను సంబంధిత ప్రాంత అధికారులకు పంపిస్తారు.
దీంతో తుఫాన్ ప్రభావిత ప్రాంతాల్లో ప్రజలు ఎదుర్కొంటున్న సమస్యలను త్వరగా గుర్తించి, పరిష్కార చర్యలు చేపట్టేందుకు అవకాశం ఉంటుందని ఆర్టీజీఎస్ అధికారులు వెల్లడించారు.
ప్రజలందరూ ఈ సదుపాయాన్ని వినియోగించుకోవాలని కోరారు.
తుఫాన్ సమయంలో అత్యవసర పరిస్థితులు ఎదురైతే ఏపీఎస్‌డీఎంఏ అందుబాటులో ఉంచిన హెల్ప్‌లైన్ నంబర్లను సంప్రదించాలని సూచించారు.
ఏపీఎస్‌డీఎంఏ అత్యవసర హెల్ప్‌లైన్ నంబర్లు:
112
1070
18004250101