Municipal Poll Counting: మున్సిపల్‌ ఎన్నికల ఓట్ల లెక్కింపు.. నాలుగు దశల్లో ఫలితాల ప్రకటన
ఈ వార్తాకథనం ఏంటి
మున్సిపల్‌ ఎన్నికల ఓట్ల లెక్కింపునకు అధికారులు అన్ని ఏర్పాట్లు పూర్తి చేశారు. బ్యాలట్‌ పత్రాల ద్వారా నిర్వహించిన ఈ ఎన్నికల్లో ఓట్లను లెక్కించేందుకు ప్రత్యేక విధానాన్ని అనుసరిస్తారు. తొలుత బ్యాలట్‌ పత్రాలను వేరు చేసి, వాటిని కట్టలుగా కడతారు. అనంతరం డ్రమ్‌లలో వేసి కలిపి, దశలవారీగా ఓట్ల లెక్కింపు చేపడతారు. పోస్టల్‌ బ్యాలట్‌ ఓట్లను ముందుగా లెక్కించి, ఆ తర్వాత సాధారణ బ్యాలట్‌ పత్రాలను లెక్కిస్తారు. ఈ ప్రక్రియలో అనుసరించే నాలుగు దశలు, చెల్లని ఓట్లను గుర్తించే విధానం, రీకౌంటింగ్ నిబంధనల వివరాలు ఇలా ఉన్నాయి.
వివరాలు
తొలి దశ: బ్యాలట్‌ పత్రాలను వేరు చేయడం
వార్డులు, డివిజన్ల వారీగా పోలింగ్‌ కేంద్రాల నుంచి వచ్చిన బ్యాలట్‌ పెట్టెలను తొలుత తెరుస్తారు.
వాటిలోని బ్యాలట్‌ పత్రాలను బయటకు తీసి వేరు చేస్తారు. మేయర్‌ లేదా ఛైర్‌పర్సన్‌ ఎన్నికకు సంబంధించిన బ్యాలట్‌ పత్రాలు గులాబీ రంగులో,వార్డు సభ్యుల ఎన్నికకు సంబంధించిన పత్రాలు తెలుపు రంగులో ఉంటాయి.
వీటిని వేర్వేరుగా వర్గీకరిస్తారు.అనంతరం మేయర్‌ లేదా ఛైర్‌పర్సన్‌,వార్డు సభ్యులకు సంబంధించిన బ్యాలట్‌ పత్రాలను 25 చొప్పున కట్టలుగా కడతారు.
పత్రాలను నిలువుగా మడతపెట్టి, ఆ మడతలు చెదరకుండా ఇరువైపులా రబ్బర్‌ బ్యాండ్లు వేస్తారు.
ఈ కట్టల్లోని బ్యాలట్‌ పత్రాల సంఖ్యను పోలింగ్‌ కేంద్రం నుంచి వచ్చిన లెక్కలతో సరిపోల్చి పరిశీలిస్తారు.
వివరాలు
రెండో దశ: డ్రమ్‌లలో బ్యాలట్‌ పత్రాల కలయిక
చివరగా 25 కంటే తక్కువ బ్యాలట్‌ పత్రాలు మిగిలితే వాటిని విడిగా ఒక కట్టగా చేసి ప్రత్యేక ట్రేలో ఉంచుతారు.
25 బ్యాలట్‌ పత్రాలు ఉన్న కట్టలను మేయర్‌ లేదా ఛైర్‌పర్సన్‌,వార్డు సభ్యుల కోసం వేర్వేరుగా ఏర్పాటు చేసిన చిన్న డ్రమ్‌లలో వేస్తారు.
ప్రతి వార్డు లేదా డివిజన్‌కు సంబంధించిన మేయర్‌ లేదా ఛైర్‌పర్సన్‌ బ్యాలట్‌ పత్రాల కట్టలను రిటర్నింగ్‌ అధికారి టేబుల్‌ వద్దకు తీసుకెళ్లి పెద్ద డ్రమ్‌లో వేస్తారు.
వార్డు సభ్యుల బ్యాలట్‌ పత్రాలను సంబంధిత వార్డు కౌంటింగ్‌ టేబుళ్ల వద్దకు పంపించి అక్కడి డ్రమ్‌లలో వేస్తారు.
బ్యాలట్‌ పత్రాలు చిరిగిపోకుండా,దెబ్బతినకుండా జాగ్రత్తలు తీసుకుంటూ చెక్కకర్ర లేదా మెత్తని వస్తువుతో డ్రమ్‌లలోని కట్టలను బాగా కలుపుతారు.
వివరాలు
మూడో దశ: ఓట్ల లెక్కింపు
ఈ సమయంలో సంబంధిత అభ్యర్థుల కౌంటింగ్‌ ఏజెంట్లను టేబుళ్ల వద్దకు అనుమతిస్తారు.
ప్రతి డ్రమ్‌ నుంచి యాదృచ్ఛికంగా 40 కట్టలను బయటకు తీసి కౌంటింగ్‌ టేబుళ్లకు పంపిస్తారు.
ఒక్కో కట్టలో 25 బ్యాలట్‌ పత్రాలు ఉంటాయి. అంటే ఒక్కో విడతలో 1,000 బ్యాలట్‌ పత్రాలను లెక్కిస్తారు.
మేయర్‌ లేదా ఛైర్‌పర్సన్‌, వార్డు సభ్యుల ఓట్లను వేర్వేరుగా లెక్కిస్తారు.
కౌంటింగ్‌ సిబ్బంది తొలుత బ్యాలట్‌ పత్రాలను పరిశీలించి చెల్లని ఓట్లను పక్కన పెడతారు.
అనంతరం అభ్యర్థుల వారీగా చెల్లుబాటయ్యే ఓట్లను వేరు చేస్తారు.
డ్రమ్‌లలోని బ్యాలట్‌ పత్రాలన్నీ పూర్తయ్యే వరకు ఈ ప్రక్రియ కొనసాగుతుంది. ప్రతి విడతలో వచ్చిన ఓట్లను లెక్కించి రౌండ్ల వారీగా ఫలితాలను ప్రకటిస్తారు.
వివరాలు
మూడో దశ: ఓట్ల లెక్కింపు
లెక్కింపు పూర్తయ్యాక అభ్యర్థుల వారీగా వేరు చేసిన బ్యాలట్‌ పత్రాలను 50 చొప్పున కట్టలుగా కడతారు.
వాటన్నింటినీ ఒక పెద్ద బండిల్‌గా చేసి, బ్యాలట్‌ పత్రాల సంఖ్యను తెలిపే కాగితాన్ని చుట్టి భద్రపరుస్తారు.
మొత్తం ఓట్ల లెక్కింపు పూర్తయ్యాక ప్రతి అభ్యర్థికి, నోటాకు వచ్చిన ఓట్లను రిజల్ట్‌ షీట్‌లో నమోదు చేసి ప్రకటిస్తారు.
వివరాలు
నాలుగో దశ: ఫలితాల ప్రకటన, రీకౌంటింగ్
రౌండ్ల వారీగా ఓట్ల లెక్కింపు పూర్తయ్యాక పోలైన మొత్తం ఓట్లు, అభ్యర్థుల వారీగా వచ్చిన ఓట్ల వివరాలను రిటర్నింగ్‌ అధికారి రిజల్ట్‌ షీట్‌లో నమోదు చేసి వెల్లడిస్తారు.
అనంతరం ఒకటి నుంచి రెండు నిమిషాలు వేచి చూస్తారు. రీకౌంటింగ్ కోరుకునే అభ్యర్థులకు రాతపూర్వకంగా దరఖాస్తు చేసుకునేందుకు 15 నిమిషాల సమయం ఇస్తారు.
రీకౌంటింగ్‌కు సహేతుకమైన కారణాలు ఉన్నాయని రిటర్నింగ్‌ అధికారి భావిస్తే అందుకు ఆదేశిస్తారు.
అప్పుడు పోస్టల్‌ బ్యాలట్‌ ఓట్లతో సహా అన్ని ఓట్లను మళ్లీ లెక్కిస్తారు. ఈ ప్రక్రియ అనంతరం తుది ఫలితాలను ప్రకటిస్తారు.
వివరాలు
చెల్లని ఓట్లను ఎలా గుర్తిస్తారు?
బ్యాలట్‌ పత్రంపై ఓటరు ఎవరో గుర్తించేలా రాతలు లేదా ప్రత్యేక గుర్తులు ఉంటే ఆ ఓటును చెల్లనిదిగా పరిగణిస్తారు.
అలాగే బ్యాలట్‌ పత్రంపై ముద్ర లేకపోయినా, అభ్యర్థి గుర్తు వద్ద కాకుండా వేరే చోట ముద్ర వేసినా తిరస్కరిస్తారు.
ఎన్నికల కోసం ఇచ్చిన ప్రత్యేక ముద్రకు బదులుగా వేరే ముద్రతో ఓటు వేసినా,ఒకరి కంటే ఎక్కువ మంది అభ్యర్థులకు ఓటు వేసినా ఆ బ్యాలట్‌ పత్రం చెల్లదు.
ఓటు ఏ అభ్యర్థికి వేశారో స్పష్టంగా తెలియకపోయినా, నకిలీ బ్యాలట్‌ పత్రమైనా, పూర్తిగా చిరిగిపోయినా తిరస్కరిస్తారు.
పోలింగ్‌ అధికారి సంతకం లేదా గుర్తింపు ముద్ర లేని బ్యాలట్‌ పత్రాన్ని కూడా చెల్లనిదిగా పరిగణిస్తారు.
వివరాలు
తొలుత పోస్టల్‌ బ్యాలట్‌ ఓట్ల లెక్కింపు
ఇలాంటి పత్రంపై 'రిజెక్ట్‌డ్‌' అని రాసి రిటర్నింగ్‌ అధికారి సంతకం చేస్తారు. అనంతరం ఆ బ్యాలట్‌ పత్రాన్ని సంబంధిత అభ్యర్థికి, కౌంటింగ్‌ ఏజెంట్‌కు చూపిస్తారు.
మున్సిపల్‌ ఎన్నికల్లో సాధారణ బ్యాలట్‌ పత్రాల లెక్కింపునకు ముందుగా పోస్టల్‌ బ్యాలట్‌ ఓట్లను లెక్కిస్తారు. లెక్కింపు ప్రారంభమయ్యే సమయానికి అందిన పోస్టల్‌ బ్యాలట్‌ కవర్లను ఒక్కొక్కటిగా తెరుస్తారు. ప్రతి కవరు నుంచి డిక్లరేషన్‌ పత్రాన్ని తీసి క్షుణ్ణంగా పరిశీలిస్తారు.
కవరులో డిక్లరేషన్‌ పత్రం లేకపోయినా, దానిపై సరైన సంతకం లేదా సంబంధిత అధికారి అటెస్టేషన్‌ లేకపోయినా ఓటును తిరస్కరిస్తారు. అలాగే డిక్లరేషన్‌లోని బ్యాలట్‌ నంబర్‌, కవరుపై ఉన్న సంఖ్య సరిపోలకపోయినా ఆ కవరును తెరవకుండానే తిరస్కరిస్తారు.
వివరాలు
తొలుత పోస్టల్‌ బ్యాలట్‌ ఓట్ల లెక్కింపు
సక్రమంగా ఉన్న డిక్లరేషన్‌ పత్రాలను వేరే ప్యాకెట్‌లో ఉంచి సీల్‌ చేస్తారు. అనంతరం చెల్లుబాటయ్యే పోస్టల్‌ బ్యాలట్‌ ఓట్లను లెక్కించి అభ్యర్థుల వారీగా రిజల్ట్‌ షీట్‌లో నమోదు చేస్తారు. ఈ వివరాలను ప్రకటించిన తర్వాత సాధారణ బ్యాలట్‌ పత్రాల లెక్కింపు కొనసాగుతుంది.