Ceasefire: పాక్‌తో కాల్పుల విరమణకు గడువు లేదు : రక్షణ శాఖ
ఈ వార్తాకథనం ఏంటి
భారత్-పాక్‌ మధ్య ఉద్రిక్తతల తర్వాత అమలులోకి వచ్చిన కాల్పుల విరమణ ఒప్పందంపై వచ్చిన వార్తలపై రక్షణ శాఖ వర్గాలు స్పందించాయి.
ఈ ఒప్పందం నేటితో ముగుస్తున్నట్లు వస్తున్న వార్తలను ఖండించాయి. ఈ కాల్పుల విరమణకు ఎటువంటి ముగింపు తేదీ లేదని స్పష్టం చేశాయి.
మే 10న ఇరు దేశాల డీజీఎంవోలు నిర్వహించిన చర్చల్లో తీసుకున్న నిర్ణయాలే కొనసాగుతున్నాయని వెల్లడించాయి.
ఆ రోజు జరిగిన డీజీఎంవో చర్చల్లో తీసుకున్న నిర్ణయాలపై ఎటువంటి కాలపరిమితి విధించలేదని పేర్కొన్నాయి. ఆదివారం డీజీఎంవో స్థాయిలో ఎలాంటి చర్చలు జరగలేదని కూడా స్పష్టం చేశాయి.
Details
పాకిస్థాన్ కు గట్టి బుద్ధి చెప్పిన భారత్
పహల్గాం ఉగ్రదాడి అనంతరం భారత్ చేపట్టిన ప్రతీకార చర్యలు పాకిస్థాన్‌ను తీవ్ర ఒత్తిడిలోకి నెట్టి పోయాయి.
ఎదురుదాడులు చేసే ప్రయత్నంలో పాకిస్థాన్‌కు భారత బలగాల ప్రతీకార చర్యలు గట్టి బుద్ధి చెప్పాయి.
తాను చెలరేగిన ఘర్షణలను తగ్గించేందుకు సిద్ధంగా ఉన్నట్లు పాక్‌ తెలిపిన తర్వాతే భారత్ కాల్పుల విరమణకు అంగీకరించింది.
ఈ నేపథ్యంలో మే 10న ఇరు దేశాల డీజీఎంవోలు తాత్కాలిక కాల్పుల విరమణ అవగాహనకు వచ్చారని, దీనిని కొనసాగించేందుకు ఇరుదేశాలూ ఆసక్తిని చూపినట్లు సంబంధిత వర్గాలు తెలిపాయి.