Amit Shah: ప్రధాని మోదీ జైలుకు వెళ్లినా తన పదవికి రాజీనామా చేయాల్సిందే : అమిత్ షా
ఈ వార్తాకథనం ఏంటి
ప్రధానమంత్రి,ముఖ్యమంత్రి, మంత్రులు వంటి ఉన్నత పాదాధికారులు ఏవైనా కేసులో అరెస్ట్ అయ్యి 30 రోజులు జైలులో ఉండే పరిస్థితి వస్తే, వారి పదవులకు ఆటోమేటిక్‌గా రాజీనామా జరగేలా, లేకపోతే చట్టం వారి పై చర్యలు తీసుకునేలా 130వ రాజ్యాంగ సవరణ బిల్లు కేంద్రం ప్రవేశపెట్టనుంది. దీనికి సంబంధించిన మూడు బిల్లులను ఇటీవలే కేంద్ర హోంమంత్రి అమిత్ షా పార్లమెంటులో పరిచయం చేశారు. విపక్ష పార్టీలు దీన్ని తీవ్రంగా వ్యతిరేకించి,జాయింట్ పార్లమెంటరీ కమిటీలో (JPC) పంపాలని కోరాయి. ఈ సవరణపై అమిత్ షా ఇటీవల వ్యాఖ్యలు చేశారు.
వివరాలు
ఏదైనా కేసులో అరెస్ట్ అయితే, 30 రోజుల్లో బెయిల్ పొందాలి
"ముఖ్యమంత్రి, ప్రధానమంత్రి వంటి ఉన్నత నేతలు జైల్లో ఉన్నా ప్రభుత్వాన్ని నడిపించడం సరైన విషయం కాదు. మన ప్రజాస్వామ్యానికి ఇది గౌరవప్రదం కాదు. ఏ నాయకుడు ఏదైనా కేసులో అరెస్ట్ అయితే, 30 రోజుల్లో బెయిల్ పొందాలి. లేకపోతే ఆయన తన పదవికి రాజీనామా చేయాల్సి ఉంటుంది. ఇలా చేయకపోతే చట్టం వారిని తప్పిస్తుంది. ఈ నిబంధన ప్రధానమంత్రి పదవికి కూడా వర్తిస్తుంది. ప్రధాని జైలుకు వెళ్ళిన సందర్భంలో ఆయన కూడా రాజీనామా చేయాల్సి ఉంటుంది. ఈ సవరణలో ప్రధాని మోదీ స్వయంగా ఈ అంశాన్ని చేర్చారు" అని అమిత్ షా చెప్పుకొచ్చారు.
వివరాలు
ఇందిరాగాంధీ 39వ సవరణ
గతంలో ఇందిరాగాంధీ 39వ సవరణను ప్రవేశపెట్టిన విషయాన్ని షా గుర్తు చేశారు. ఆ సవరణలో రాష్ట్రపతి, ఉపరాష్ట్రపతి, ప్రధాన మంత్రి, సభ స్పీకర్‌లను భారతీయ న్యాయస్థానాల నుంచి రక్షించడం ప్రతిపాదించబడింది. ఈ సందర్భంలో అమిత్ షా విపక్షాలపై కఠినంగా మండిపడ్డారు. ప్రభుత్వానికి రాజ్యాంగ సవరణ ప్రవేశపెట్టే హక్కు ఉందని, దానిపై అభ్యంతరాలు వ్యక్తం చేసే హక్కు ప్రతి ఒక్కరికి ఉందని తెలిపారు. కానీ, పార్లమెంట్‌లో బిల్లులు ప్రవేశించకుండా అడ్డుపడుతూ ఆందోళనలు చేస్తే అది సరికాదు అని ఆయన వ్యాఖ్యానించారు.
వివరాలు
సభ్యుడు జైలులో ఉంటే.. పార్టీకి చెందిన ఇతర సభ్యులు ప్రభుత్వాన్ని నడుపుతారు
ఈ రాజ్యాంగ సవరణ బిల్లు పార్లమెంట్‌లో లేదా అసెంబ్లీలో ఎవరి మెజారిటీని ప్రభావితం చేయదు. ఒక సభ్యుడు జైలులో ఉన్నప్పుడు కూడా, పార్టీకి చెందిన ఇతర సభ్యులు ప్రభుత్వాన్ని నడిపుతారని తెలిపారు. బెయిల్ పొందిన తర్వాత ఆ సభ్యులు తిరిగి తమ విధులను కొనసాగించగలరని ఆయన తెలిపారు. జైల్లో ఉన్నా ప్రభుత్వాన్ని నడిపే పరిస్థితి దేశంలో రాకూడదని ఈ సందర్భంగా అమిత్‌షా స్పష్టం చేశారు.