Rahul Gandhi: విపక్షాల ప్రజాస్వామ్య మార్చ్‌కు పోలీసుల అడ్డంకులు.. సుప్రీంలో పిటిషన్
ఈ వార్తాకథనం ఏంటి
సీఈసీ జ్ఞానేశ్‌ కుమార్‌ రాజీనామా చేయాలనే డిమాండ్‌ను మరింత బలంగా వినిపించేందుకు ఇండియా కూటమి సుప్రీంకోర్టు వరకు మార్చ్‌ చేపట్టాలని నిర్ణయించింది. కాంగ్రెస్‌ అగ్రనేత రాహుల్‌ గాంధీ నేతృత్వంలో పలువురు ప్రతిపక్ష నాయకులు ఈ ర్యాలీలో పాల్గొన్నారు. అయితే, సుప్రీంకోర్టు వైపు వెళ్తున్న విపక్ష నేతలను పోలీసులు అడ్డుకున్నారు. 'మార్చ్‌ ఫర్‌ డెమోక్రసీ' పేరుతో విపక్ష ఎంపీలు, నాయకులు ఈ నిరసన కార్యక్రమాన్ని నిర్వహించారు. ఓట్ల చోరీ ఆరోపణలతో పాటు ప్రధాన ఎన్నికల కమిషనర్‌ (సీఈసీ) జ్ఞానేశ్‌ కుమార్‌కు వ్యతిరేకంగా సుప్రీంకోర్టులో స్వయంగా పిటిషన్ దాఖలు చేయాలనే ఉద్దేశంతో రాహుల్‌ గాంధీతో పాటు ఇతర నేతలు బయల్దేరారు.
వివరాలు
భగవాన్‌ దాస్‌ రోడ్డు వద్ద పోలీసులు బారికేడ్ల ఏర్పాటు
ఈ మార్చ్‌లో కాంగ్రెస్‌ అగ్రనేత ప్రియాంక గాంధీ, పార్టీ అధ్యక్షుడు మల్లికార్జున్‌ ఖర్గే, బిహార్‌ ప్రతిపక్ష నేత తేజస్వీ యాదవ్‌, సమాజ్‌వాదీ పార్టీ అధినేత అఖిలేశ్‌ యాదవ్‌, సుప్రియా సూలే, సంజయ్‌ రౌత్‌, శశి థరూర్‌, సచిన్‌ పైలట్‌, తెలంగాణ ముఖ్యమంత్రి రేవంత్‌ రెడ్డి తదితరులు పాల్గొన్నారు.
వీరికి మద్దతుగా వేలాది మంది కార్యకర్తలు ర్యాలీలో భాగమయ్యారు.
అయితే, భగవాన్‌ దాస్‌ రోడ్డు వద్ద పోలీసులు బారికేడ్లు ఏర్పాటు చేసి విపక్ష నాయకులను ముందుకు వెళ్లకుండా నిలువరించారు.
దీంతో అక్కడ కొంత ఉద్రిక్త వాతావరణం నెలకొంది. సుప్రీంకోర్టు వరకు వెళ్లాలనే విపక్షాల ప్రయత్నానికి పోలీసుల అడ్డంకులు ఎదురయ్యాయి.
వివరాలు
సుప్రీంకోర్టులో కాంగ్రెస్‌ పిటిషన్
మరోవైపు,సీఈసీ జ్ఞానేశ్‌ కుమార్‌కు వ్యతిరేకంగా కాంగ్రెస్‌ పార్టీ సుప్రీంకోర్టులో పిటిషన్ దాఖలు చేసింది.
పోలీసుల అడ్డంకులతో రాహుల్‌ గాంధీ ర్యాలీ వద్దే ఆగిపోవాల్సి వచ్చింది.
దీంతో ఆయన స్వయంగా న్యాయస్థానానికి వెళ్లి పిటిషన్ దాఖలు చేయలేకపోయారు.ఈ నేపథ్యంలో రాహుల్‌ తరఫున ఆయన న్యాయబృందం సుప్రీంకోర్టులో పిటిషన్ సమర్పించింది.
అంతకుముందు,ఓట్ల చోరీ అంశాన్ని సుప్రీంకోర్టు ప్రధాన న్యాయమూర్తి (సీజేఐ)జస్టిస్‌ సూర్యకాంత్‌ దృష్టికి తీసుకెళ్లాలని ఇండియా కూటమి నిర్ణయించింది.
ఈ అంశంపై విజ్ఞాపన పత్రం సమర్పించేందుకు తమకు సమయం కేటాయించాలని సీజేఐని కోరింది.
అయితే,విపక్షాల అభ్యర్థనకు సీజేఐ అంగీకరించలేదు. న్యాయస్థానంలో ఇప్పటికే విచారణలో ఉన్న అంశాన్ని విపక్ష నాయకులతో చర్చించడం చట్టవిరుద్ధమవుతుందని జస్టిస్‌ సూర్యకాంత్‌ స్పష్టం చేశారు.
ఈ విషయాన్ని వివరిస్తూ విపక్షాలకు లేఖ రాశారు.