'మోదీ' ఇంటిపేరుపై రాహుల్ గాంధీ ఆరోపణలు; రెండేళ్ల జైలు శిక్ష విధించిన సూరత్ కోర్టు
లోక్‌సభ ఎన్నికల ప్రచారంలో భాగంగా 2019లో మోదీ ఇంటి పేరుపై కాంగ్రెస్ అగ్రనేత రాహుల్ గాంధీ కీలక ఆరోపణలు చేశారు. ఆ ఆరోపణల నేపథ్యంలో అదే ఏడాది రాహుల్‌పై బీజేపీ ఎమ్మెల్యే పూర్ణేష్‌ మోదీ చేసిన ఫిర్యాదు మేరకు పరువు నష్టం కేసు నమోదైంది. అయితే ఈ కేసులో గురువారం సూరత్ కోర్టు ఎంపీ రాహుల్ గాంధీని దోషిగా తేల్చింది. రాహుల్‌కు రెండేళ్ల జైలు శిక్ష విధిస్తూ తీర్పు చెప్పింది. ఆ తర్వాత రాహుల్‌కు కోర్టు బెయిల్ మంజురు చేసింది. చీఫ్ జ్యుడీషియల్ మేజిస్ట్రేట్ గతవారం ఇరుపక్షాల తుది వాదనలు విని, నాలుగేళ్ల నాటి పరువు నష్టం కేసులో తుది తీర్పును వెల్లడించారు. ఈ తీర్పు నేపథ్యంలో రాహుల్ గురువారం సూరత్ చేరుకున్నారు.
2019లో కర్ణాటకలోని కోలార్‌లో జరిగిన ర్యాలీలో రాహుల్ ఆరోపణలు
బీజేపీ ఎమ్మెల్యే పూర్ణేష్‌ మోదీ చేసిన ఫిర్యాదు ప్రకారం, 'దొంగలందరికీ మోదీ అనే ఇంటిపేరు ఎలా వచ్చింది?' అని రాహుల్ వ్యాఖ్యానించారు. లోక్‌సభ ఎన్నికలకు ముందు 2019లో కర్ణాటకలోని కోలార్‌లో జరిగిన ర్యాలీలో రాహుల్ ఈ ఆరోపణలు చేశారు. సూరత్ కోర్టు ఇచ్చిన తీర్పుపై రాహుల్ తరఫున వాదించిన న్యాయవాది కిరీట్ పన్వాలా మాట్లాడుతూ.. సత్యం పరీక్షించబడుతుందన్నారు. రాహుల్‌పై అనేక తప్పుడు కేసులు పెట్టారని ఆరోపించారు. తనకు న్యాయం జరుగుతుందని కాంగ్రెస్ సీనియర్ నాయకుడు, ఎమ్మెల్యే అర్జున్ మోద్వాడియా అన్నారు. ఈ కేసులో రాహుల్‌పై భారతీయ శిక్షాస్మృతి (ఐపీసీ) సెక్షన్లు 499, 500 (పరువు నష్టం)కింద కేసులు నమోదు చేశారు.
