Ram temple donation theft: అయోధ్య రామమందిర విరాళాల కేసులో ఛార్జిషీట్.. పిటిషనర్లకు సుప్రీంకోర్టు అనుమతి
ఈ వార్తాకథనం ఏంటి
అయోధ్య రామమందిరానికి భక్తులు సమర్పించిన విరాళాల దుర్వినియోగం కేసులో ప్రత్యేక దర్యాప్తు బృందం (సిట్) ఛార్జిషీట్ దాఖలు చేసినట్లు ఉత్తరప్రదేశ్ ప్రభుత్వం సుప్రీంకోర్టుకు వెల్లడించింది. ఈ విషయాన్ని పరిగణనలోకి తీసుకున్న సర్వోన్నత న్యాయస్థానం.. ఇకపై కేసు విచారణ స్థానిక కోర్టులోనే కొనసాగుతుందని స్పష్టం చేసింది. ఈ వివాదంపై దాఖలైన పిటిషన్లను కొట్టివేసింది. సిట్ దర్యాప్తులో విరాళాల దుర్వినియోగం జరిగినట్లు గుర్తించామని యూపీ ప్రభుత్వం తరఫున హాజరైన సొలిసిటర్ జనరల్ తుషార్ మెహతా ధర్మాసనానికి వివరించారు. కొందరు నిందితులు ఆలయానికి వచ్చిన విరాళాలతో పెట్టుబడులు పెట్టగా, మరికొందరు ఆ మొత్తాన్ని బ్యాంకుల్లో డిపాజిట్లుగా ఉంచినట్లు తెలిపారు.
వివరాలు
కోర్టు నియమించిన సిట్ సెప్టెంబర్ 21న సుప్రీంకోర్టుకు కీలక సమాచారం
సుప్రీంకోర్టు ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్‌మాల్య బాగ్చీ, జస్టిస్ వి. మోహనలతో కూడిన ధర్మాసనం ఈ కేసును విచారించింది.
రామమందిర విరాళాల దుర్వినియోగంపై స్వతంత్ర దర్యాప్తు జరిపించాలని కోరుతూ కొందరు సుప్రీంకోర్టులో రిట్ పిటిషన్లు దాఖలు చేశారు.
ఈ నేపథ్యంలో కేసు విచారణలో అయోధ్య స్థానిక కోర్టుకు సహాయపడేందుకు ధర్మాసనం పిటిషనర్ల వాదనలను నమోదు చేసింది.
అయితే, విరాళాల దుర్వినియోగం కేసులోని ఆరోపణలపై తాము ఎలాంటి అభిప్రాయాన్ని వ్యక్తం చేయడం లేదని స్పష్టం చేసింది.
ఈ కేసులో కోర్టు నియమించిన సిట్ సెప్టెంబర్ 21న సుప్రీంకోర్టుకు కీలక సమాచారం ఇచ్చింది.
సెప్టెంబర్ 25వ తేదీలోగా లేదా అంతకంటే ముందే తొలి ఛార్జిషీట్ దాఖలు చేస్తామని అప్పట్లో వెల్లడించింది.
వివరాలు
ఆలయ నిర్మాణ స్థలంపై విచారణకు నిరాకరణ
సుప్రీంకోర్టు 2019లో ఇచ్చిన తీర్పు ప్రకారం కేటాయించిన స్థలంలోనే అయోధ్య రామమందిరం నిర్మించారా? లేదా? అనే అంశాన్ని తేల్చాలని కోరుతూ దాఖలైన మరో పిటిషన్‌ను సుప్రీంకోర్టు విచారించేందుకు నిరాకరించింది.
సీజేఐ జస్టిస్ సూర్యకాంత్, జస్టిస్ జోయ్‌మాల్య బాగ్చీ, జస్టిస్ వి. మోహనలతో కూడిన ధర్మాసనం సోమవారం ఈ మేరకు స్పష్టం చేసింది.
ఇలాంటి అభ్యర్థనలను తాము విచారించబోమని తెలిపింది. శ్రీరామ జన్మభూమి కేసు ట్రస్టు ఈ పిటిషన్‌ను దాఖలు చేసింది.
ప్రస్తుతం నిర్మించిన ఆలయ ప్రాంగణం కచ్చితమైన స్థానం, సరిహద్దులు, భౌగోళిక కోఆర్డినేట్లను గుర్తించేందుకు స్వతంత్ర కమిటీ లేదా కమిషన్‌ను నియమించాలని కోరింది.
రెవెన్యూ, సర్వే అధికారులు, భారత పురావస్తు శాఖ నిపుణులతో సర్వే నిర్వహించాలని కూడా పిటిషనర్లు విజ్ఞప్తి చేశారు.