Supreme Court: ఢిల్లీ నిరసనల కేసు.. అక్టోబర్ 15కు సుప్రీంకోర్టు విచారణ వాయిదా
ఈ వార్తాకథనం ఏంటి
దిల్లీలో ఇటీవల జరిగిన నిరసనల సందర్భంగా మహిళా జర్నలిస్టులపై పోలీసులు దాడి చేశారన్న ఆరోపణలపై సుప్రీంకోర్టు స్పందించింది. ఈ ఘటనపై వివరణ ఇచ్చేందుకు ఢిల్లీ పోలీసులకు చెందిన సీనియర్ అధికారి కోర్టుకు హాజరుకావాలని మంగళవారం (అక్టోబర్ 13) ఆదేశించింది. భారత ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం ఈ అంశాన్ని పరిశీలించింది. నిరసనలను కవర్ చేస్తున్న జర్నలిస్టులకు, ముఖ్యంగా మహిళా జర్నలిస్టులకు రక్షణ కల్పించాలని కోరుతూ నెట్‌వర్క్ ఆఫ్ విమెన్ ఇన్ మీడియా, ఇండియా (NWMI) దాఖలు చేసిన పిటిషన్‌ను సీనియర్ న్యాయవాది ఇందిరా జైసింగ్ కోర్టు దృష్టికి తీసుకెళ్లారు. ఈ ఆరోపణలపై పోలీసుల నుంచి వివరణ తీసుకోవాల్సిన అవసరం ఉందని ప్రధాన న్యాయమూర్తి పేర్కొన్నారు.
వివరాలు
జర్నలిస్టులపై దాడుల ఆరోపణలు.. కోర్టు ధిక్కరణ పిటిషన్
దీనిపై సీనియర్ అధికారి కోర్టులో ఉండాలని, ఆరోపణలకు పోలీసులు సమాధానం చెప్పాలని అన్నారు.
ఈ పిటిషన్‌కు సంబంధించి సొలిసిటర్ జనరల్‌కు ముందస్తు నోటీసు ఇచ్చినట్లు ఇందిరా జైసింగ్ తెలిపారు.
పోలీసుల చర్యలకు సంబంధించిన మరో కేసుతో కలిపి గురువారం (అక్టోబర్ 15)ఈ పిటిషన్‌ను విచారణకు తీసుకుంటామని సీజేఐ వెల్లడించారు.
ఇదిలా ఉండగా,నిరసనలను కవర్ చేస్తున్న జర్నలిస్టులపై పోలీసులు దాడి చేశారంటూ ఫ్రీడమ్ స్పీచ్ కలెక్టివ్ అనే సంస్థ కోర్టు ధిక్కరణ పిటిషన్ దాఖలు చేసింది.
అక్టోబర్ 10న సుప్రీంకోర్టు ఇచ్చిన ఆదేశాల ప్రకారం నిరసనలను కవర్ చేసే మీడియా ప్రతినిధులను వేధించకూడదు.
అయితే, ఆ ఆదేశాలను ఉల్లంఘించి పోలీసులు జర్నలిస్టులపై దాడి చేశారని సీనియర్ న్యాయవాది గోపాల్ శంకరనారాయణన్ కోర్టు దృష్టికి తీసుకెళ్లారు.
వివరాలు
మహిళా జర్నలిస్టుల రక్షణకు పిటిషన్
మరోవైపు, నిరసనలు, బహిరంగ కార్యక్రమాలను కవర్ చేసే సమయంలో జర్నలిస్టుల భద్రత, గౌరవాన్ని కాపాడేందుకు తగిన ఆదేశాలు ఇవ్వాలని కోరుతూ నెట్‌వర్క్ ఆఫ్ విమెన్ ఇన్ మీడియా, ఇండియా (NWMI) ప్రత్యేకంగా రిట్ పిటిషన్ దాఖలు చేసింది.
పోలీసుల చర్యలపై ప్రస్తుతం జరుగుతున్న విచారణలో జర్నలిస్టులు నిరసన ప్రదేశాలకు వెళ్లకుండా అడ్డుకోవడం,వారిని అదుపులోకి తీసుకోవడం లేదా బలవంతంగా అక్కడి నుంచి తొలగించడం వంటి అంశాలపై ప్రత్యేక దృష్టి పెట్టలేదని పిటిషన్‌లో పేర్కొంది.
స్వతంత్రంగా వార్తలను సేకరించి, రిపోర్టింగ్ చేసే జర్నలిస్టులకు అవసరమైన రక్షణ కల్పించాలని కోరింది.
వివరాలు
మహిళా జర్నలిస్టుల రక్షణకు పిటిషన్
ముఖ్యంగా వార్తా సేకరణ లేదా రిపోర్టింగ్ కోసం విధులు నిర్వహిస్తున్న మహిళా జర్నలిస్టులు నిరసనలు, బహిరంగ సభలు, జనసమూహాల నియంత్రణ చర్యలు లేదా ప్రజా ప్రాధాన్యం ఉన్న ఇతర కార్యక్రమాల వద్ద ఉన్నారనే కారణంతో వారిని శారీరకంగా ఇబ్బంది పెట్టడం, బెదిరించడం, అకారణంగా అదుపులోకి తీసుకోవడం లేదా బలవంతంగా తొలగించడం జరగకుండా చూడాలని కేంద్ర ప్రభుత్వాన్ని పిటిషన్‌లో కోరింది.