NCERT: ఎన్సీఈఆర్టీ 9వ తరగతి పాఠ్యాంశంలో 'సర్'కు చోటు.. ఎన్నికల ప్రక్రియపై పాఠాలు
ఈ వార్తాకథనం ఏంటి
ఎన్సీఈఆర్టీ రూపొందించిన కొత్త 9వ తరగతి సాంఘిక శాస్త్రం పాఠ్యపుస్తకంలో ప్రత్యేక సమగ్ర ఓటర్ల జాబితా సవరణ (SIR) ప్రక్రియకు చోటు కల్పించింది. అర్హులైన పౌరులు ఓటర్ల జాబితా నుంచి తప్పిపోకుండా, అనర్హులు జాబితాలో చేరకుండా నిర్ధారించే విధానంగా ఈ ప్రక్రియను పుస్తకంలో వివరించింది. 'అండర్స్టాండింగ్ సొసైటీ: ఇండియా అండ్ బియాండ్' పేరుతో ఉన్న పాఠ్యపుస్తకంలోని ఒక విభాగంలో, ప్రత్యేక సమగ్ర సవరణ ద్వారా ఓటర్లందరినీ గుర్తించి జాబితాలో చేర్చినట్లు పేర్కొంది. ముఖ్యంగా అవగాహన లేక ఓటరుగా నమోదు చేసుకోని లక్షలాది మంది 18 ఏళ్లు నిండిన యువతకు ఓటు హక్కు కల్పించి జాబితాలో చేర్చినట్లు వివరించింది.
వివరాలు
స్వేచ్ఛాయుత, నిష్పక్షపాత ఎన్నికలకు సవాళ్లు
అలాగే ఓటరు మరణించడం, నివాసం మారడం, నకిలీ నమోదు ఉండటం లేదా శాశ్వతంగా ఆచూకీ తెలియకపోవడం వంటి కారణాల ఆధారంగా కూడా ఓటర్ల జాబితా నుంచి పేర్లను తొలగించే ప్రక్రియలో SIR కీలక పాత్ర పోషిస్తుందని ఎన్సీఈఆర్టీ పేర్కొంది. నకిలీ వార్తలు, తప్పుడు సమాచారం, బెదిరింపులు వంటి సవాళ్లు ఎదురైనా స్వేచ్ఛాయుతంగా, నిష్పక్షపాతంగా ఎన్నికలు నిర్వహిస్తున్నందుకు భారత ఎన్నికల సంఘాన్ని పాఠ్యపుస్తకం ప్రశంసించింది. 'స్వేచ్ఛాయుత, నిష్పక్షపాత ఎన్నికలకు సవాళ్లు' అనే శీర్షిక కింద దేశవ్యాప్తంగా వేలాది పోలింగ్ కేంద్రాలు, వందలాది రాజకీయ పార్టీల మధ్య 96.8 కోట్ల మంది ఓటర్లకు ఎన్నికలు నిర్వహించడం అత్యంత క్లిష్టమైన ప్రక్రియగా పేర్కొంది.
వివరాలు
సర్కు నేటితో ఏడాది
ప్రత్యేక సమగ్ర ఓటర్ల జాబితా సవరణ (SIR) ప్రక్రియ అమలులోకి వచ్చి నేటితో ఏడాది పూర్తైంది. తొలిసారిగా బిహార్ అసెంబ్లీ ఎన్నికలకు ముందు పైలట్ ప్రాజెక్టుగా ఈ ప్రక్రియను అక్కడ ప్రారంభించారు. బిహార్లో దాదాపు 65 లక్షల నకిలీ ఓటర్ల పేర్లను తొలగించిన అనంతరం ఎన్నికల సంఘం సవరించిన ఓటర్ల జాబితాను రూపొందించింది. ఆ తర్వాత ఉత్తరప్రదేశ్, పశ్చిమ బెంగాల్, గుజరాత్, తమిళనాడు, కేరళతో పాటు మొత్తం 9 రాష్ట్రాలు, 3 కేంద్ర పాలిత ప్రాంతాల్లో ఈ ప్రక్రియ పూర్తయింది. ఇప్పటివరకు దేశవ్యాప్తంగా ఓటర్ల జాబితాల నుంచి సుమారు 6 కోట్ల నకిలీ ఓటర్ల పేర్లను తొలగించినట్లు పేర్కొంది. మిగిలిన రాష్ట్రాలు,కేంద్ర పాలిత ప్రాంతాల్లో ప్రస్తుతం ప్రత్యేక సమగ్ర సవరణ ప్రక్రియ కొనసాగుతోంది.