Telangana: తెలంగాణలో ఉద్యోగుల బదిలీలకు గ్రీన్సిగ్నల్
ఈ వార్తాకథనం ఏంటి
తెలంగాణలో చాలా కాలంగా బదిలీల కోసం ఎదురుచూస్తున్న ప్రభుత్వ ఉద్యోగులకు రాష్ట్ర ప్రభుత్వం ఊరట కలిగించే నిర్ణయం తీసుకుంది. ముఖ్యమంత్రి రేవంత్ రెడ్డి నాయకత్వంలోని ప్రభుత్వం ఉద్యోగుల బదిలీలపై అమలులో ఉన్న నిషేధాన్ని ఎత్తివేస్తూ కీలక ఉత్తర్వులు జారీ చేసింది. దీంతో బదిలీల ప్రక్రియకు మార్గం సుగమమైంది. రాష్ట్ర ప్రభుత్వ ప్రధాన కార్యదర్శి విడుదల చేసిన ఉత్తర్వుల ప్రకారం, మే 1వ తేదీ నుంచి మే 31వ తేదీ వరకు అర్హత కలిగిన ప్రభుత్వ ఉద్యోగులకు బదిలీలకు అనుమతి కల్పించారు. ఒకేచోట మూడు సంవత్సరాలు పూర్తి చేసిన ఉద్యోగులు బదిలీలకు అర్హులుగా పరిగణించబడతారు.
వివరాలు
మొత్తం ఉద్యోగుల్లో గరిష్ఠంగా 40 శాతం మందికే బదిలీలు
గత కొంతకాలంగా పెండింగ్లో ఉన్న బదిలీల అంశంపై ప్రభుత్వం తాజాగా సానుకూలంగా స్పందించింది. ముఖ్యంగా ఉద్యోగుల నుంచి వస్తున్న విజ్ఞప్తులను పరిగణనలోకి తీసుకుని ఈ నిర్ణయం తీసుకున్నట్లు తెలుస్తోంది. దీంతో,రాష్ట్రవ్యాప్తంగా సాధారణ బదిలీల ప్రక్రియ మళ్లీ ప్రారంభం కానుంది. ఇప్పటికే చివరిసారిగా 2024లో ప్రభుత్వ ఉద్యోగుల బదిలీలు నిర్వహించారు. ఈసారి కూడా ఒకేచోట నాలుగేళ్లు పూర్తి చేసిన ఉద్యోగులను తప్పనిసరిగా బదిలీ చేసే విధానం అమలు చేయనున్నారు. అయితే మొత్తం ఉద్యోగుల్లో గరిష్ఠంగా 40 శాతం మందికే బదిలీలు అమలు చేయనున్నట్లు ప్రభుత్వం స్పష్టం చేసింది. అదేవిధంగా భార్యాభర్తలు వేర్వేరు ప్రాంతాల్లో పనిచేస్తున్న వారు, ఆరోగ్య సమస్యలు ఉన్న వారు, వికలాంగులుగా గుర్తింపు పొందిన ఉద్యోగులకు బదిలీల్లో ప్రాధాన్యత ఇవ్వనున్నట్లు ఉత్తర్వుల్లో పేర్కొన్నారు.