Telangana: విద్యుత్ బిల్లులపై వినియోగదారులకు ఊరట.. ఏడాది పాటు పెంపు లేనట్లే..
ఈ వార్తాకథనం ఏంటి
తెలంగాణ ప్రజలకు ప్రభుత్వం ఊరటనిచ్చే నిర్ణయం తీసుకుంది. విద్యుత్ ఛార్జీలపై భారం తగ్గించే దిశగా కీలక ప్రకటన చేసింది. ట్రూఅప్ పేరిట వినియోగదారులపై విధించే సర్ఛార్జిని ఏడాది పాటు వసూలు చేయకుండా నిలిపివేస్తున్నట్లు విద్యుత్ నియంత్రణ మండలి ప్రకటించింది. దీంతో కరెంట్ బిల్లులపై అదనపు భారం పడకుండా ప్రజలకు ఉపశమనం కలగనుంది. సాధారణంగా విద్యుత్ కొనుగోలు ఖర్చులు పెరిగినప్పుడు ఆ భారాన్ని వినియోగదారులపై మోపేందుకు సర్ఛార్జి విధించే అవకాశం ఉంటుంది. యూనిట్కు సుమారు 30 పైసల వరకు వసూలు చేసేందుకు విద్యుత్ పంపిణీ సంస్థలకు అనుమతి ఉంటుంది. అయితే దీనికి ప్రభుత్వం,నియంత్రణ మండలి అనుమతి తప్పనిసరి.
వివరాలు
ఏడాది పాటు ఉపశమనం
గతంలో ఈ అనుమతి ఇవ్వకపోవడంతో 2023 నుంచి 2025 మధ్య కాలంలో పంపిణీ సంస్థలపై దాదాపు రూ.10 వేల కోట్ల భారం పడింది. ఇప్పుడీ సర్ఛార్జి వసూలును ఏడాది పాటు నిలిపివేయడంతో ప్రజలకు తక్షణ ఉపశమనం లభించనుంది. అయితే ఈ నిర్ణయం కారణంగా పంపిణీ సంస్థలు వడ్డీ రూపంలో సుమారు రూ.300 కోట్ల వరకు నష్టపోయే అవకాశం ఉంది. ఒకవేళ భవిష్యత్తులో కూడా ఈ వసూలును కొనసాగించకూడదని ప్రభుత్వం నిర్ణయిస్తే, ఆ మొత్తాన్ని ప్రభుత్వం భర్తీ చేయాల్సి ఉంటుంది. సర్ఛార్జి వసూలుకు అనుమతి ఇవ్వాలని పంపిణీ సంస్థలు నియంత్రణ మండలిని కోరే అవకాశం ఉన్నప్పటికీ, ప్రస్తుతం అలాంటి అభ్యర్థన చేయడం లేదని తమ పత్రాలలో స్పష్టం చేశాయి.
వివరాలు
త్వరలో రైతు డిస్కం ఏర్పాటు
గత రెండేళ్లలో విద్యుత్ కొనుగోలు,ఇతర ఖర్చుల వల్ల ఈ సంస్థలపై రూ.7,635 కోట్ల అదనపు భారం పడింది. అయినప్పటికీ, ఆ భారాన్ని ప్రజలపై మోపకుండా ఏడాది పాటు సర్ఛార్జి నిలిపివేయడం గమనార్హం. విద్యుత్ రంగంలో ఖర్చులు పెరిగితే ట్రూఅప్ అని, ఖర్చులు తగ్గితే ట్రూడౌన్ అని వ్యవహరిస్తారు. ట్రూఅప్ అమలు చేస్తే సర్ఛార్జి రూపంలో వినియోగదారుల నుంచి అదనపు వసూలు జరుగుతుంది. అదే ట్రూడౌన్ అమలు చేస్తే బిల్లులు తగ్గే అవకాశం ఉంటుంది. ఇదిలా ఉండగా, రైతుల కోసం ప్రత్యేక విద్యుత్ పంపిణీ సంస్థను ఏర్పాటు చేసేందుకు ప్రభుత్వం సన్నాహాలు చేస్తోంది.
వివరాలు
త్వరలో రైతు డిస్కం ఏర్పాటు
ఈ కొత్త వ్యవస్థతో విద్యుత్ రంగంలో పలు మార్పులు తీసుకురావాలని లక్ష్యంగా పెట్టుకుంది. ఈ పరిణామాల నేపథ్యంలోనే ప్రస్తుతం సర్ఛార్జి వసూలు చేయకూడదని నిర్ణయం తీసుకుంది. ప్రస్తుతం నిత్యావసరాల ధరలు పెరిగి సామాన్యులపై భారం పెరిగిన పరిస్థితిలో, కరెంట్ బిల్లుల రూపంలో అదనపు భారాన్ని మోపకూడదనే ఉద్దేశంతో ప్రభుత్వం ఈ నిర్ణయం తీసుకుంది. ఈ చర్యతో పంపిణీ సంస్థలపై భారం పెరిగినా, ప్రజలకు మాత్రం ఇది పెద్ద ఊరటనిచ్చే నిర్ణయంగా భావించవచ్చు.