Heavy Rains: బిగ్ అలర్ట్, ఏపీలోని ఈ జిల్లాలకు భారీ వర్ష సూచన
ఈ వార్తాకథనం ఏంటి
వాతావరణ శాఖ తెలిపిన ప్రకారం, నైరుతి పశ్చిమ మధ్య బంగాళాఖాతంలో కేంద్రీకృతమైన అల్పపీడనం బలహీనపడింది.
అయినప్పటికీ, ఏపీలో రేపు (నవంబర్ 14) కొన్ని ప్రాంతాల్లో మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ అంచనా వేసింది.
ఈ నెల 15, 16 తేదీల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉందని పేర్కొంది.
ఆంధ్రప్రదేశ్ విపత్తుల నిర్వహణ సంస్థ ఐఎండీ అంచనాలను తీసుకుని కీలక సూచనలు చేసింది.
వర్షాలు పడే నేపథ్యంలో రైతులు వరికోతలు, ఇతర వ్యవసాయ పనులలో జాగ్రత్తలు తీసుకోవాలని సూచించారు.
వివరాలు
ఈ జిల్లాలకు భారీ వర్ష సూచన…
పంట పొలాల్లో నిలిచిన నీటిని త్వరగా బయటకు పోయేలా ఏర్పాటు చేసుకోవాలని, పండించిన ధాన్యాన్ని సురక్షిత ప్రదేశాలలో ఉంచాలని, ఆ మధ్య ఉధ్యానవన పంట మొక్కలు/చెట్లు పడిపోకుండా సపోర్టు ఇవ్వాలని సూచించింది.
అలాగే, రేపు (నవంబర్ 14) కృష్ణా, గుంటూరు, బాపట్ల, ప్రకాశం, నెల్లూరు, అనంతపురం, సత్యసాయి, తిరుపతి జిల్లాల్లోని కొన్ని ప్రాంతాల్లో మోస్తరు నుంచి భారీ వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది.
అలాగే, అల్లూరి, కోనసీమ, పగో, ఏలూరు, పల్నాడు, నెల్లూరు, కర్నూలు, నంద్యాల, వైఎస్ఆర్, అన్నమయ్య, చిత్తూరు జిల్లాల్లో కొన్ని ప్రాంతాల్లో తేలికపాటి వర్షాలు కురిసే అవకాశం ఉందని అంచనా వేసింది.
వివరాలు
తెలంగాణలో ఇలా…
తెలంగాణలో, నిన్నటి వరకు పొడి వాతావరణం ఉండగా, అల్పపీడన ప్రభావం కారణంగా నవంబర్ 13 నుంచి రాష్ట్రంలోని కొన్ని ప్రాంతాల్లో తేలికపాటి నుంచి మోస్తారు వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది.
నవంబర్ 16 వరకు తెలంగాణలో తేలికపాటి నుంచి మోస్తారు వర్షాలు కురుస్తాయని అంచనా వేసింది. అయితే, ఎలాంటి హెచ్చరికలు ఇవ్వలేదని తాజా బులెటిన్‌లో తెలిపింది.
నవంబర్ 17 నుండి తెలంగాణలో మళ్లీ పొడి వాతావరణం ఉంటుందని అంచనా వేసింది.
హైదరాబాద్ లో ఆకాశం సాధారణంగా మేఘావృతమై ఉండడంతో, ఉపరితల గాలులు ఈశాన్య దిశలో వీచే అవకాశం ఉందని పేర్కొంది.